Genesis 38
38
Ja Juda sok Tamari
1Ja k'ak'u jumasa jawi, spila sb'aj ja Juda sok ja smoj alijel jumasa, ti waj kulan b'a Adulam ti' ajyi b'a snaj jun ma' lek wax yila sb'aj sok sb'i'il Hira. 2Ja Juda ti sna'a sb'aj tiw ja yak'ix ja Sua sb'a Canaani, ja' nupani sok. 3Och tukb'uk satk'inal ja ixuk jawi, ajyi jun yal skerem, jaxa Juda ya sb'i'iluk Er.
4-5Tsa'an ja sche'um ja Juda cho ajyi chab' yal skeremtik: June ya sb'i'iluk Onan, jaxa juni Sela. Ja jun iti, ye'n tsa'an, ti'xa manxi b'a Quezib.
6Ja Juda sle'a yi sche'um ja yunin Eri, ya nupanuk sok jun ak'ix sb'i'il Tamar. 7Jaxa Dyosi, mi lek yila ja jastal wa sk'u'lan ja Eri, ja'yuj sch'aya el sna'jel.
8Ja'yuj ja Juda ti yal yab' ja Onani: —Ja ya'n we'n oj nupanan sok ja sche'um ajyi wa b'ankili, we'n sb'ej oj ja wi' yuj ja we'n sb'alucha ja ixuki, b'a jach' yuj ja we'n oj ajyuk yuntikil ja cham a b'ankili.
9Jaxa Onani, wa sna'a, ja yuntikil oj ajyuk sok ja sche'um ja sb'ankili, mi ye'n oj sb'ajuk jani sb'a jas sb'ankili. Ja'yuj, yajni wa sta'a sb'aj sok ja sche'um ja sb'ankili, wa stalna lek sb'aj b'a mi oj ya' tukb'uk satk'inal ja ixuki. Jach' sk'u'lan jastal jaw b'a mi oj ya' ajyuk yuntikil ja cham sb'ankili. 10Ja Dyosi, mi lek yila ja jastal wa sk'u'lan ja Onani, ja'yuj cho sch'aya el sna'jel.
11Jaxa Juda ya sna' ja Tamari, tix ajyi bi'uda'il man oj k'i'uk ja Sela. Yuj wax xiw ja Juda lek oj cho chamuk ja Sela jastal cham ja sb'ankil jumasa. Jaxa Tamari, ti waj b'a snaj ja stati.
12Ek' ja k'ak'u cham ja sche'um ja Juda. Jex ok' ja Juda yuj ja cham ja sche'umi, tsa'an ti waj b'a Timnat b'a wa'n joxjel yi ja schej jumasa yuj ja ya'tijumi. Waj mojtajuk yuj ja Hira yuj ja jel lek wax yila sb'aje'i.
13Ay ma waj aljuk yab' yuj ja Tamari, b'ej ay b'a Timnat ja yalib'i, wajum b'i yi' jan k'u' chej. 14Ja'yuj ja Tamari, sopo ja sk'u' sjuna lapan yuj it wa sje'a cham k'ujol ayi, smusu ja sat sok jun k'u'uts, ti waj kulan b'a wax ajyi ochel b'a Enaimi, lajan ay sok ja b'ej wax waj b'a Timnati. Jaxa Tamari, wanxa sna'a yuj niwanxa ja Sela, jasa, ja Juda mi sk'ana oj ya nupanuk sok.
15-16Yajni yila ja Juda ja ixuk makan ja sati, mi jak sk'ujol ta ja'uk ja yalib'i. Wax yala yuj jun ixuk yuj tuktukil winik ay sok, ti och mojan soka, ti yal yab'a:
—K'elawile, ¿Mi maxa k'ana oj b'a'anan mok?
Ja ixuki, ti yala'a:
—Jaxa tax kala wab' leki, ¿Jasunk'a oj ja wa' ki' b'a?
17—Oj jekawi junuk ja yal jchivo jumasa, —xchi ja Juda.
—Lek ay, xchi ja Tamari—, kechani ta ay jas oj ja wakan ki' b'a jach' oj na' yuj oj ja tup'on merani, —xchi ja Tamari.
18—¿Jasun waxa k'ana oj ka'kan a wi b'a? —xchi ja Juda.
—A' kanki sok yak'il wa seyo, sok wa najb'ante' yaman a wuji, —xchi ja Tamari.
Jaxa Juda, lekni yab' ja jas ch'ak k'anjuk yi'a, ti'xa sta'a sb'aje'a, ja k'ak'u jawi, tukb'i kan satk'inal ja Tamari. 19Ti'xta waj ja Juda, ti'xa ya eluk ja k'u'uts makan sok ja sat ajyi, cho slapa ja sk'u' sjuna b'a wa sje'a cham k'ujol ayi.
20Tsa'an ja Juda, sjeka yi ja Hira it ma' lek wax yila sb'aj sok oj waj ya'kan ja yal chivo b'a oj cho ya kumxuk spetsanil ja jas ya'oj kan yi' ja Tamari, b'a'ya ja ma' lek wax yila sb'aj soki mixa sta'a ja k'oti. 21Ja'yuj sjob'oyi ja ma' ti' kulane tiwi:
¿B'ay ja ixuk it wa sta'a sb'aj sok tuktukil winik ja it k'ajyel ti wax ajyi kulan b'a sb'ejlal Enaimi?
Ti yalawe ja ye'nle'i:
—Ja ili, mey ixuk b'a tuktukil winik ay soka.
22Ti'xa kumxi ja ma' lek wax yila sb'aj sok ja Juda, ti yal yab'a:
—Mi jta'a, ja ixuk it waxa wala. Ja ma' ti kulane tiwi, yalawe kab' ja smeranili, mey ixuk ma' wa sta'a sb'aj sok tuktukil winik ja ili, —xchiye.
23Ti yala ja Juda:
—Tix kan sok spetsanil ja jas ka'oj kan yi'i— Kechan mi ma' oj b'ob' yal yuj mi jk'u'lan ja jas kala oj k'u'luki. Ja ke'n jeka a wi ja yal chivo, jaxa we'n waxa wala mixa a ta'a.
24Ek' mojan oxe ixaw, ay ma waj aljuk yab' yuj ja Juda:
—Ja smeranil wa walib' Tamari, ay ma sta'ata sb'aj sok tuk ay satk'inal tak.
Ja'yuj ti yala ja Juda:
—Nutsuwik ele, sak'an tsikawik ele—.
25Yajni wa'nexa ya'jel eluk ja Tamari, ti sjeka aluman yab' ja yalib'i: —Ja ma ye'n sb'aj spetsanil ja it jumasa, ye'n ja ma' ya'oj tukb'ukon satk'inali. K'ela lek, b'ob'ta oj ja na' ma' sb'aj—.
26Jaxa Juda yajni sna'a sb'aj ja seyo sok ja snajb'ante'i, ti yala'a:
—Ja iti, ke'n smul, ja ye'n mi smuluk, ke'n mi jk'ana oj nupanuk sok ja kunin Sela.
Ja Juda, mixani sta'a sb'aj sok pilan majke ja Tamari.
27Tsa'an ja Tamari, yajni waj ajyuk ja yalatsi, chab'e ajyi. 28Yajni wa'ne manxel ja yal alats jumasa Jawi, june ja ye'nle'i, ja ya el b'ajtan ja sk'ab'i, jaxa ixuk ma' wa'n skoltajel ja Tamari, smocho sok jun chakal k'u'uts ja snuk' sk'ab ja alats jawi, ti yala'a: —Ja iti, ja manxi b'ajtan—. 29Ja yal alats jawi, cho snolo k'e ja sk'ab'i, ja ma' manxi b'ajtani ja juni. Ja'yuj ti yala ja ixuki: —K'elawil tak we'n a jama ja b'eji. Ja'yuj ya'we sb'i'iluk Fares. 30Tsa'an manxi ja ma mochob'al sok chakal k'u'uts ja sk'ab'i, yuj ja jach' mochob'ali, ja'yuj ya'we sb'i'iluk Zerah.
Currently Selected:
Genesis 38: YABD
Označeno
Deli
Kopiraj
Want to have your highlights saved across all your devices? Sign up or sign in
© Sociedad Bíblica de México 2021