Genesis 31
31
Ja Jacobi, spaka yuj ja Labani
1Ja yuntikil jumasa ja Labani, yalawe ja'yuj jel ja jastik sb'a ja Jacob yuj ja sts'akatal ja state'i. 2Ja iti, ch'ak yab' ja Jacobi, cho yila jastal stukb'es ja smodo ja Laban sok ja ye'n. 3Ti'xa alji yab' yuj ja Dyosi: —Kumxan b'a slu'um wa nan a tat sok wa moj alijel jumasa. Ke'n oj koltaya sok spetsanil ja jas oj ja k'u'luki.
4Jaxa Jacobi, sjeka spayjel ja Raquel sok ja Lea, ab'i wajuke b'a wits b'a wa'n stalnajel ja schej jumasa. 5-7Ti alji yabye tiwi:
—Wa tatexi, mixax yilawon lek ja jastal ja b'ajtan jani. Ja we'nlexi, waxa na'awex jastal jipa jb'aj sok ja ya'teli. Jaxa ye'n wani slo'layona, jitsan majke stukb'eslan ki ja jts'akoli. Jaxa Dyos yuj ja jtati mi b'a yala mi oj skoltayona, sok mi sk'ana oj sk'u'luki b'a mi sb'ejuk. 8Spakaxil ay, yuj k'a wa sk'ana ja Laban oj stup'on sok yal chej jumasa b'a tuktukil yelaw, spetsanil ja chej jumasa, ay tuktukil yelaw ja yuntikile'i, ma wa sk'ana oj stup'on sok b'a ay jun tuk yelaw, spetsanil ja nole chej jumasa ay jun b'a tuk yelaw. 9Jach' japjiyi jastal it ja swakax wa tatex yuj ja Dyosi, ke'n ch'ak ya' ki'.
10—Jun majke'il ajyi jun jwayich. Ja b'a jwayich jawi, kila ja chej jumasa b'a wa'n sta'jel swawi, sok swaw chej b'a ay sb'i'anal ja yelawi, sok ay b'a t'ob'an yaman sk'ik'il. 11-12Cho jmakla yala kab' ja Dyosi: —Kilata jastal mix yilawa lek wa ni'ali. Ja'yuj ta wan k'axa k'ela lek ja swaw oj sta sb'aj sok ja chej jumasa, ti oj ja wila spetsanil ay sb'i'anal ja yelawi sok ay t'ob'an yaman k'ik' ja yelaw ja swaw jumasa. 13Ke'non ja Dyos it sje'a sb'aj a wi' b'a Betel it a pek'a yi aceite ja toni, cho ja'ni b'a a wala. Oj ja pila b'aj sok ja Labani, kumxan b'a Canaan ja'ni b'a manxiya, xchi ja Dyosi.
14Ti yalawe ja Raquel sok ja Lea:
—Ja ke'ntikoni, mixa wanukotikon smajlajel ojto ya jdotetikon ja jtatikoni, 15Ja ye'n wax yila lajan sok tuk chonab' jakelotikon. Mi kechanuk schonowotikon chikan ja sb'olmalil cho yi' aj kan lom ja jastal jel a'tijiya yuj ja ke'ntikoni. 16Spetsanil ja jastik sb'aji japji yi yuj ja Dyos ja jtatikoni, jb'ajni ke'ntikon sok ja kuntikiltikona. Ja'yuj k'u'lan spetsanil ja jas oj yala wab' ja Dyosi.
17-19Ja Laban ja k'ak'u jawi waj sjox ja schej jumasa, jaxa Raqueli, yelk'an yi ja stat ja sk'u'lub'al dyos ja smoj alijel jumasa. Ti'xta'a ja Jacobi, yal yab' schab'il ja sche'um sok ja yuntikil jumasa, b'a ojxa k'e'uke ja cameyo jumasa. Cho ch'akni stsom ja schanste jumasa, sok spetsanil ja jastik ch'ak sta' b'a Padan-arami, elye ja tiwi, ti ch'ak wajuke b'a Canaan b'a ajyi ja stat Isaaki. 20-21Ch'ak yi spetsanil ja jastik sb'aji, slo'la ja Laban yuj ja mi yal yab' ta yuj ojxa wajuki. Yajni sk'utsu ja niwan ja' Eufratesi, ti waj b'a wits jumasa b'a Galaad.
Ja Labani, snocho ja Jacobi
22Ja k'ak'u waj ja Jacobi, Ek' oxe k'ak'u ti'to yab' ja Labani, 23-25ti ela waj yi' spatik waj sok ja smoj alijel jumasa. Manto b'a sjukil k'ak'u ti slajawe b'a wits jumasa b'a Galaad, jaxa Jacobi yujni ti jijlel tiwa. Cho ti'ni jijli tiw ja Laban sok ja smoj jumasa. Jun a'kwal ja Dyosi, sje'a sb'ajyi ja Laban b'a jun swayich ti yala yab'a: —Laban mok jas a wal yab' ja Jacobi—.
26Jasa, ja Labani, ti yal yab' ja Jacobi:
—¿Jas lom a lo'layon b'a? ¿Jas lom jach' a wi'ajki ja kuntikil ja lajan sok wajum lutjuke yuj ab'al k'umal b'a? 27¿Jas lom a paka ajnel ja mi jas a wala kab'i? Ja lek a walukxta kab'i, ja ke'n oj jk'u'l jun k'in ja yajni oj elani. 28—Ja jas a k'u'lani, yuj jomel olomil. Mixa wa kujts'uk ja kuntikil sok ja kij jumasa—. 29Mi wokoluk wax kab' oj k'u'luk a wi'ex b'a mi sb'ejuk, b'a'ya, ja a'kwale yal kab' ja Dyos yuj wa tati, mok b'i jas kala wab'i. 30Yuj k'a jelxa t'ilan waxa wab' oj wajan sok ja b'a'y wa nan a tati, mey sb'ej ja lom waxa welk'an ki ja jdyos jumasa.
31-32Ja Jacobi, mi sna'a ta ay jas yelk'unej ja Raqueli, ja'yuj ti yala'a:
—Ja smeranili, yuj och jxiwel lek t'ilan oj ja japki wa wuntikil jumasa. Jaxa yuj wa dyos jumasa, ochan le'a we'na. Ta ay k'a jas a ta'a ja b'a yoj jas jb'aj ke'n yuj a b'aj we'na oj b'ob' a wi'e. Ta yuj k'a cho tey il ja ma' yi'oj wa dyos jumasa, mi oj kan sak'an ja jawi. Ti oj yil ja jmoj alijeltik jumasa.
33Ti och ja Laban b'a snaj ja Jacob it tojb'el sok k'u'utsi, tsa'an och ja sb'a Lea sok ja sb'a chab' a'tijum ixuki, mi jas ta'a; tsa'an och ja sb'a Raqueli. 34-35Jaxa Raqueli, ti snak'a ja sdyos ja stat b'a yib'el ja siya ja cameyo, sok ti kulan sb'aj ja ye'n, ja'yuj ti yal yab' ja stati: —Kechan mok tajkan ta yuj k'a mi la k'e'yon tek'ani, yuj ja tey ja kixawi, xchi ja Raqueli.
Jachuk, a'nima sle'a lek ja sdyos jumasa ja Laban b'a spetsanil ja na'its jumasa tojb'el sok k'u'utsi, mi sta'a. Yajni ch'ak sle'i, yajni mi sta'a, 36ti'xa tajki ja Jacobi, ti stajb'ana:
—¿Jas lom waxa lokowon ab'al b'a? ¿Jasunk'a jmul ja lom waxa wi'aj jpatik jastal jun ma' milwanel b'a? 37Ch'akta a k'el spetsanil ja jas jb'aji, ¿Jasunk'a a ta'a yuj a b'aj we'n b'a? Yuj k'a ay jas a ta'a, ti'xa wa' monton il b'a sti sat ja jmoj alijeltik jumasa, b'a jach' ye'n oj yal e' kab'tik jasunk'a oj k'u'ltiki.
38—B'a yojol ja jun tajb'e jab'il (20) ti ajyiyon amoki, me'x mila jun chej b'a oj k'uxe, mi b'a ch'ay lom ja yuntikil wa chej sok wa chivo jumasa. 39Ta ay k'a b'a wax milji junuk yuj chante b'a k'ul, ja ke'n wax tupu a wi; ta ay k'a ma' wax yelk'an b'a k'ak'u ma' b'a a'kwal junuk ja chante jumasa, wanixa tajb'ayona. 40-41Ja jun tajb'e jab'il (20) ti ajyiyon amoki, jelni wokol ek' kuja: Snajtil ja k'ak'u ti wax tup kik' yuj ja sk'ixnal ja k'ak'u, jach'ni b'a a'kwali, ti wala chamyon che'e, —mix jak jwayel—. Chan lajune (14) jab'il a'tijiyon amok yuj ja chab' a wuntikili, wake jab'il jtalna wa chej jumasa, —mi kechan jun majke'uk wa koki ja jts'akoli—. 42—Ti'xta lek, jel lek ja Dyos yuj ja jtat awel Abrahami jel skoltayon— Ja Dyos yuj ja jtat Isaaki jel lek jmok yajni yila k'umb'elonxa sok jelxa axwelon, jaxa a'kwale yal awab'i. Ja lek mokxta jach' sk'u'lan ja Dyosi, ja we'n sem jach' telan jk'ab' wa elkona.
43Ti yala ja Labani:
—Ja ixuk jumasa iti, kuntikil ke'na, ja yal untik iti, kij ke'na, ja chej jumasa iti, ja' smoj ja jb'aj jumasa. —Mi jas ay ja il b'a mi jb'ajuk ke'na, mi lekuk ja oj k'u'luk a wi' b'a mi sb'ejuki. 44Jel lek la jk'u'l jun jlo'iltik b'a oj makunuk kujtik jchab'iltik, xchi ja Labani.
45Ja'yuj ti yi'aj jun niwan ton ja Jacobi, b'a oj sk'u'l jun niwan oy, 46cho yal yab' ja smoj alijel jumasa a stsom'e jan jitsan ton. Jaxa ye'nle'i, jach'ni sk'u'lane'a, tsa'an yajni ch'ak stsom'e ja ton jumasa b'a sjoyanal ja niwan oyi, ti'xa ochye kulana wa'ela. Ja tsoman ton jumasa jawi 47ja Labani, ya sb'i'iluk b'a arameo —Jegar Saduta—, jaxa Jacobi ya sb'i'iluk b'a hebreo —Galaad. 48-50Ja'yuj ti yala ja Labani:
—Man ya'n k'ak'u, ja monton ton iti, oj makunuk kujtik b'a oj ya jak jk'ujoltik ja jlo'iltiki. Jaxa yajni najatxa aytik jujunotiki, ye'nani ja Dyos oj stalnayotiki. Ta mixa yajta ja kuntikili, ma cho nupaniya sok pilan ixuk, na'a, ye'n ja Dyos ja ma' yab' ja lo'il jk'ulantiki.
Ja'yuj mi kechanuk Galaad ya sb'i'iluk ja monton ton jawi, cho ya sb'i'iluk Mispa, wa sk'ana yale —Ja Dyosi wanix talnani'a—.
51Tsa'an ja Labani, cho yal yab' pilan majke ja Jacobi:
—Ja monton ton it sok ja niwan oy ka k'e tek'an b'a stij satiki, 52oj makunuk b'a oj ya jak jk'ujoltik ja jlo'iltiki. Mi ma' oj ek' kujtik ja b'a stik'anal iti, kechan b'a oj jle' ch'ayelaltik. 53Ti wax ka' b'a jnalantik b'a oj sk'el'otik ja Dyos yuj ja Abraham sok ja Nahor ja jtat aweltik jumasa—.
Jaxa Jacobi, yala, lek, sok ja sb'i'il ja Dyos it wa stoyo ja stat ja Isaaki; 54Tsa'an ja b'a wits jawi, ti smila jun chante, stsikayi b'a smajtan ja Dyosi, cho sloko wa'el spetsanil ja smoj alijel jumasa, spetsanile ti ek' yujile tiw ja a'kwali.
55Sajto lek k'e' ja Laban ja pilan k'ak'u, yajni ch'ak yujts'uk ja yij jumasa sok ja yuntikili, jel tsamal ja jas yala a ek'uk a wujilex lek, —xchi—, ti'xa kumxi b'a snaja.
Currently Selected:
Genesis 31: YABD
Označeno
Deli
Kopiraj
Want to have your highlights saved across all your devices? Sign up or sign in
© Sociedad Bíblica de México 2021