Genesis 28
28
1Ja Isaaki sjeka spayjel ja Jacobi, tsa'an yajni ya'tayi ja slekil sk'ujoli, ti yal yab'a:
—Mok nupanan sok ixuk sb'a Canaan. 2Jel lek ja ti la waj b'a Padan-aram b'a snaj wa tat awel Betueli, nupanan sok junuk wa moj alijel yak'ix wa tatjun Labani. 3Ja' jex k'ana yuj ja jel lek oj yil'a ja Dyos it jel ja yipi, a ya'wi jitsan lek wa wuntikil jumasa. Cho jenix k'ana yuj ja we'n oj wa' pojxuk ja swinkil ja niwan chonab'i. 4Ye'n ja Dyos jel lek oj yil'a ja we'n sok wa wintil jumasa, jach'ni jastal jel lek ilji ja Abrahami. Jach' oj b'ob' a b'ajuk ja lu'um b'a majan aya ja ya'n, yujni ye'n a'jiyi ja Abraham yuj ja Dyosi—.
5Tsa'an yuj ja iti, ti spila sb'aj ja Isaac sok ja Jacobi, ja Jacobi, ti waj b'a Padan-aram ja b'ay ja smoj alijel jumasa ja snani.
6-8Yajni yab' spetsanil ja Esau ja jas ch'ak aljuk yab' ja Jacob yuj ja state'i, jaxa Jacobi, ti waj b'a Padan-aram, ti sna'a yuj ja mix k'ot sk'ujol ja stat ja ixuke sb'a Canaani. 9Ja'yuj, pilan yuj ja sche'um jumasa yi'oji, cho nupani sok june ja yak'ixuk ja Ismael yunin ja Abrahami, ja ak'ix jawi sb'i'il Mahalat, ja' swats ja Nebaioti.
Ja swayich ja Jacobi
10El ja Jacob b'a Beerseba ti waj b'a Haran. 11Yajni k'ot b'a lu'um jawi, ti'xa kan way tiwi, yujni a'kwalxa'a, yi'aj june ja ton jumasa tey tiwi, ja sen oloman, ti'xa och wayuka. 12Ja a'kwal jawi ajyi jun swayich. Ja b'a swayichi, yila jun k'ejlub' te' k'otel man b'a satk'inal, ja b'a k'ejlub' te' jawi, wax k'e'i wax ko'ye ja yanjel jumasa ja Dyosi. 13B'a man cha'an yuj ja k'ejlub' te' jawi, ti alji yab' yuj ja Dyosi:
—Ke'n Dyoson yuj ja Abraham sok ja Isaaki. Ja we'n sok wa wintil jumasa oj ka'wi ja lu'um b'a b'a'ana. 14—Ja wa wintil jumasa jel oj pojxuke jastal ja ts'ub' lu'umi— Oj sb'ut' e spetsanil ja niwan chonab' iti. Yuj ja we'n sok wa wintil jumasa, jel lek oj iljuke yuj ja Dyos spetsanil ja swinkil ja lu'umi. 15Ja ke'n ti oj ajyukon a moka, mi oj ka'a kan a tuch'il man oj b'ob'uk ja jas kaloj a wab'i. Chikan b'a oj wajana ojni jtalnaya'a, oj ka kumxan ja b'a lu'um iti.
16-17Yajni ya' sb'aj ja Jacobi, wa'n lek xiwel ti yala: —Ja ili, jel niwan— Ja smeranili tey il ja Dyosi, jaxa ke'n mi jach' wax na'a. —Ja iti, jani snaj ja Dyosa. —Ja iti, ja b'a oj ajyuk ochel b'a satk'inali.
18Ja pilan k'ak'u sajto lek k'e' ja Jacobi, yi'aj ja ton it makuni yuj b'a sen olomi, ya k'e tek'an jastal oy, spek'a yi aceite ti yala'a: ja ton iti, tsa'ub'al. 19A'nima ja b'ajtani, ja chonab' b'a ajyi ja ton jawi, sb'i'il Almendro, jaxa Jacobi ya sb'i'iluk Betel. Wa sk'ana yale —Snaj Dyos.
20Tsa'an, yala ja Jacob jach' oj sk'u'l jastal iti:
—Yuj k'a oj smojtayon sok oj stalnayon ja Dyos b'a wajumoni, oj k'a ya'ki jk'u' jwex sok jwa'el, 21ta tsamal k'a oj ya kumxukon b'a snaj ja jtati, yujni ye'n Dyos kuja. 22Ja ton it ka k'e tek'an jastal oyi, ja wa sje'a b'a ti' oj ch'ak jakuke spetsanile stoyjel ja Dyosi, sok spetsanil ja jas oj ya'ki ja Dyosi, ye'nani ojni ka'yi ja b'a slajunila.
Currently Selected:
Genesis 28: YABD
Označeno
Deli
Kopiraj
Want to have your highlights saved across all your devices? Sign up or sign in
© Sociedad Bíblica de México 2021