Genesis 25
25
Cham ja Abrahami
1Ja Abrahami, ay pilan sche'um ajyi sb'i'il Quetura, 2ja yuntikil ajyi sok ja ixuk jawi, ja it jumasa:
Zimran,
Jocsan,
Medan,
Madian,
Isbac,
Suah.
3Ja Jocsani, ja state ja Seba sok ja Dedani. Ja yintil jumasa ja Dedani, ja asureo jumasa, letuseo sok ja leumeo jumasa.
4Ja Madiani, ajyi jo'e yuntikil, ja' sb'i'ile ja it jumasa:
Efa,
Efer,
Hanoc,
Abida,
Eldaa.
Spetsanil ja it jumasa ja yintil ye'n ja Quetura.
5-6Ja k'ak'u sak'anto ja Abrahami, ch'ak ya'yi spetsanil ja jastik sb'aj ja yunin Isaaki. Jaxa yuntikil sok ja tuk sche'um jumasa, ay jas k'eb'ayi cho spila sb'aje sok ja Isaaki, ti a'ji wajuke b'a stojol wax jak ja k'ak'u.
7Ja Abrahami: ajyi sak'anil jun syen ox tajb'e sok jo' lajune jab'il, (175) 8-10cho jel lek ajyi, man k'ot ja k'ak'u chami. Ja chab' yuntikil Isaac sok ja Ismaeli, ti smukuwe b'a mukan ja sche'um Sara lajan ti kanye b'a k'e'en Macpela it tey mojan b'a wits Mamre. Ja Abrahami, ye'n smana yi ja Efron ja k'e'en jawi.
11Tsa'an, yajni chamta ja Abrahami, jaxa Dyosi, jel lek yila ja Isaac it tey mojan sok ja sat ja' sb'i'il —Ja sposo ja Dyos sak'an sok ja ma' spetsanil wax yila—
Ja yuntikil jumasa ja Ismaeli
12-16Ja iti, ja b'a ochel ju'un ja yintil jumasa ja Ismael yunin ja Abraham sok ja Agari, ja' ya'tijum ixuk ja Sara it sb'a Egipto. Ja' sb'i'ile ja it ja lajchawe ma' niwak ya'tel yuj ja k'ole jumasa sb'a Ismaeli, schojlal ay jastal manxiye jach'ni, cholan ay ja snaje sok ja slu'ume jumasa, ja
Ja Nebaiot ye'n b'ajtan manxi ti tsa'ane ja:
Quedar,
Adbeel,
Mibsam,
Misma,
Duma,
Masa,
Hadar,
Tema,
Jetur,
Nafis,
Quedma.
17Ja Ismaeli, ajyi sak'anil jun syen jun tajb'e sok juk lajune jab'il (137), yajni chami ti mukji sok lajan ja ma' ek' paxta yuji. 18Ja yintil jumasa ti ajyiye b'a lu'um jumasa b'a Havila man b'a ko'el k'inal, mojan sok ja mojon b'a Egipto, b'a Asur, b'a pilan lu'um ja b'ay ja smoj alijel jumasa.
Jach' ek' yujile ja Isaac sok ja Jacobi
(25:19—36:43)
Ja yuntikile ja Isaac: Ja Jacob sok Esau
19Jach' ek' yuj jastal it ja Isaac 20Ja k'ak'u nupaniye ja Isaac sok ja Rebeca yunin ja Betuel swats ja Labani, ay yi'oj chab' tajb'e jab'il, (40) ja ye'nle'i, arameo'e, ti kulane b'a Padan-aram.
21Ja Rebeca mix b'ob' yil sat untikanel, ja'yuj sk'uman ja Dyos ja Isaac yuj ja ye'n. Jaxa Dyosi, smakla ja jastal wa'n sk'anjel yi ja Isaaki, jaxa Rebeca, ti'xa tukb'i satk'inala. 22Ja ye'n sna'a k'inal yuj lojuk oj ajyuk ja yuntikil ja' yuj ti wa'n syamjel sb'aje yoj slukum ja yal keremtiki. Ja'yuj tajb'ani, ti yala'a: —Dyos kuj, ¿Jasyuj ja jach' wa'n ek'el kuj jastal it ja ke'n b'a? 23Jaxa Dyosi, ti sjak'a yi'a:
—Wa wuntikili, wa slaja jastal chab' niwak chonab'.
Yuj chab' chonab' pilan aye,
b'ajtan yuj ja me'x manxiye'i.
June ja ye'nle jel tsats oj ya' sb'aj,
jaxa juni jel ko'el oj ya' sb'aj,
ja b'ankilali, ye'n oj ya'telta ja yijts'ini.—
24Yajni k'ot ja k'ak'u manxiye'i, 25Ja ma' b'ajtan manxi, chak lek ja sb'ak'teli, cho spetsanil sb'ak'tel jel ja stso'otsili: ja'yuj ya'we yi ja sb'i'ili Esau 26Tsa'an yuj ja Esauji, ti manxi ja yijts'ini, jaxa ye'n yawe sb'i'iluk Jacob,#25:26 Ja b'i'ilal Jacob, b'a hebreo wa sk'ana yale top okal ma jun lo'lanum. yuj ja k'ak'u manxi ye'i, ja yaman lek yuj ja stop yok ja Esauji. Ay yi'oj ox tajb'e jab'il (60) ja Isaac ja k'ak'u manxi ja yuntikili.
27-28Ja Esauji ja wax k'ot sk'ujol ja paxyal b'a k'uli. Ja'yuj jex k'anji yuj ja stati. Jaxa Jacobi, jel jun k'ujol ja jel tsamal wax yab' ja ti wax kan b'a na'itsi, ja'yuj jex k'anji yuj ja snani, mi jachukuk sok ja Esauji.
29Jun k'ak'u ja Jacobi, wa'n schapjel jun wa'el b'a jex ajb'ani. Jaxa Esauji wantox kumxi jan b'a wits sok jel wa'nx yab'i, 30ti yawa ja Jacobi:
—Wa'non chamel wa'in. —A'xa ki, ja chakal wa'el jaw wa'na stojb'esjeli—.
Ja'yuj ja Esau wax cho na'xi sb'aj sok ja sb'i'il Edom.#25:30 Ja b'i'ilal it b'a hebreo wa sk'ana yale chak.
31Ti yala ja Jacobi:
—A'ki ja jas ojto a'juk a wi yuj ja we'n b'ankilala, jaxa ke'n jel tsamal oj ka'wi ja wa'el chapan kuji.
32Jaxa Esauji ti yala'a:
—Man ya'n oj k'eb'awi, —xchi ja Esauji, yujni wa'non chamel wa'ina—.
33Ja Jacobi, sajb'es ja Esau b'a ya yal t'ilan a ya'kan ja jas ojto a'jukyi yuj ja ye'n b'ankilali. Ja Esauji, yalani oj ya'kana, 34jaxa Jacobi, ya'yi ja wa'el yal sat te' chapan yuji. Jaxa Esau wa' yu'aj ja'; tsa'an yajni ch'ak wa'uki, stulu sb'aj waji, mi jas t'ilan yila yuj ja jas ojto a'jukyi yuj ja ye'n b'ankilali.
Currently Selected:
Genesis 25: YABD
Označeno
Deli
Kopiraj
Want to have your highlights saved across all your devices? Sign up or sign in
© Sociedad Bíblica de México 2021