Genesis 22
22
Ja Abrahami, sk'u'an ja Dyosi
1-2Ek' chab' oxe jab'il, ja Dyosi, wa sk'ana oj yil ta wax k'u'aji yuj meran ja Abrahami, ja'yuj spaya ti yala yab'a:
—Abraham, wax k'ana oj ja wa'ki b'a jmajtan ja Isaac wa wunin it kechan ye'n sok jexa k'ana. I'aj och b'a Moria b'a wits oj je'a wi'i.
3B'a pilan k'ak'u, sajto lek k'e' ja Abrahami, sk'utsu jitsan si' b'a oj stsom jun niwan k'ak'. Schapa ja sburro ti waj b'a alji yab' yuj ja Dyosi. Ja' smoj wajum ja yunin Isaac sok chawane ja ya'tijum jumasa. 4-5B'a yoxil k'ak'u, ti yal yab' ja ya'tijum jumasa ja Abrahami: —Ti la kanyex il sok ja burro, jaxa ke'n sok ja kunini, oj wajkotikon b'a wits jaw it wax ilxi najat ay leki. Ti oj toytikon tiw ja sb'i'il ja Dyosi, tsa'an oj kumxukotikon jan a mokex ja we'nlexi, —xchi ja Abrahami.
6Ti yi'aj ja si' ja Abrahami, ya k'e'yi b'a stejleb' ja Isaaki; cho yi'aj ja k'ak' sok ja kuchilo, jachuk schawanil wajye. 7Jaxa Isaaki, sjob'oyi Abrahami:
—Tatey, ti ki'ojtik ja k'ak' sok ja si'i, ¿B'a'xa ay ja chej oj tsiktik yi ja Dyos b'a? —xchi ja Isaaki.
8Ti sjak'a ja Abrahami:
—Ja jawi, ye'n wa sna'a ja Dyos b'a'y ja chej oj ya'ki'tiki, —xchi ja Abrahami.
Jachuk lajani cho wajye'a. 9Yajni k'otye b'a yalunej ja Dyosi, ja Abrahami, sk'u'lan jun altar b'a sat ja altar jawi, ti ya' kajan ja si' b'a oj stsiki; tixa smocho yi ja yok sk'ab' ja yunin Isaaki ya k'e kajan b'a sat ja altari. 10Ti'xa yaman yuj ja kuchilo ja Abrahami, ojxa smil ja yunini. 11Ja yajni yab' wa'n k'umajel yuj ja Dyos man b'a satk'inali. Jaxa Abrahami, —ti sjak'a'a. 12Jaxa Dyosi, ti yala'a:
—Mok jas mi sb'ejuk oj ja k'u'lyi ja yal keremi. Wanxax na'a, yuj ja waxa k'u'an ja kab'ali, jach'ni yuj ja mi a wala mi oj ja wa'ki b'a jmajtan wa wunin it kechan ye'ni.
13Ti'xta'a ja Abrahami, yila jun chej b'ech'an lek k'ab' k'i'ix ja sxulub'i, Yi'aj ja chej jawi, stsikayi ja Dyos b'a slok'ol ja yunini. 14Ja'yuj ja Abrahami, ya sb'i'iluk ja tiwi, —Ye'n wax ya'a ja Dyos ja jas t'ilani—. Ti jak tiw ja lo'il it wax maklaxi man ya'n: —B'a syaxk'ul ja Dyosi, wax ya'a ja jas t'ilani—
15Ja Dyosi, spaya b'a schab'il majke ja Abrahami, man b'a satk'inali, 16-18ti yal yab'a:
—Yuj ja mi a wala mi oj ja wa'ki wa wunin yuj ja kechan ye'ni, ke'n wax kala wab'i, jel lek oj kil'a. Jel oj ka pojxuk wa wintil jumasa jastal ja k'anal jumasa b'a satk'inali, ma jastal ja jijkab' b'a sti' niwan paman ja'i, mi ma oj b'ob' yajtab'en. Wa wintil jumasa oj syam sb'aje sok ja swinkil ja chonab' jumasa, cho ojni yi'e kana. Ke'n wax kala wab'i, spetsanil ja kristyano jumasa b'a lu'umi, jel lek oj yil'e, yuj wa wintil jumasa, ja'yuj ja cho a k'u'anon ja we'n—
19Tsa'an yuj ja iti, ti'xa kumxi ja Abraham b'a kan ja ya'tijum jumasa, lajanxa ch'ak kumxuke b'a Beerseba b'a schonab'ilei.
Ja yuntikil ja Nahori
20-23Tsa'an ay ma waj aljuk yab' yuj ja Abrahami: —Wa b'aluch Milca sok wa moj alijel Nahori, ayxa waxake yuntikile—.
Ja sb'i'ile ja it jumasa:
Us,
Buz,
Quemuel,
Quesed,
Hazo,
Pildas,
Idlaf,
Betuel.
Ja ma b'ajtan manxi ja Usi. Ja Quemueli, Aram sb'i'il ja stati, jaxa stat ja Rebeca Betuel sb'i'il. 24Mi kechanuka, ja Nahori, ajyi chane yuntikil sok ja Rama schab'il sche'umi. Ja sb'i'ile'i ja it jumasa:
Teba,
Gaham,
Tahas
sok Maaca.
Currently Selected:
Genesis 22: YABD
Označeno
Deli
Kopiraj
Want to have your highlights saved across all your devices? Sign up or sign in
© Sociedad Bíblica de México 2021