Matayo 12
12
Laitoriani le Sabato
(Marko 2:23–28; Luka 6:1–5)
1 #
Nkit 23:25
Kore te inia kata, neimaa ꞉Yeso lchampai mparri e Sabato. Kore tankaraki natara looiteng'eni lenyena ꞉sumach, neng'asu aagilu nkuechi ee lperes le nkano payie enya. 2Kore payie edol ꞉Lparisayo, nejoki Yeso, <<Ng'ura! Egilita looiteng'eni linono nkitanapat, amu egilita lperes le nkano aanya mparri e Sabato.>>
3 #
1Sam 21:1–6
Newoliki ajoki, <<Amaa, eitu apake isomsom inia nataasa apa Daudi payie etum o lboitieii lenyena sumach, 4#Lal 24:9neikuna ꞉ninye payie ejing nkaji e Nkai, nenya ninche mukateni naaitakaki Nkai? Kore nenia mukateni, naa meiririkino too nkitanapat payie enya ꞉ninche, mara ake laitainok la lasar. 5#Nki 28:9,10Amaa, eitu isomsom too nkitanapat nchere, ketigila apa laitainok la lasar etii nkaji e Nkai aasicho nkitanapat e Sabato, nemeata kusaka? 6Kake, kajoki ntae, ketii ene loata tipat alang nkaji e Nkai. 7#Mat 9:13, Osea 6:6Naa tanaa iyielolo naipirita kulo rereii oojo, <Kayieu lng'er alang lasar,> anata duo eitu idung'okiki nkiguana lolo lemeata kusaka. 8Naaku, Nkerai e Ltung'ani Laitoriani le Sabato.>>
Eichiunyie ꞉Yeso ltung'ani ta mparri e Sabato
(Marko 3:1–6; Luka 6:6–11)
9Kore payie eing'uaa ꞉Yeso inie ng'oji, nelo ana metabaki Sinagogi enche. 10Netii inie ltung'ani oikaolo nkaina. Neipar ꞉Lparisayo Yeso aajoki, <<Keichiaakino taatua nkitanapat tininchiunyie ta mparri e Sabato?>> Naa keiparutua ana payie etum ntoki naibung'ie Yeso nelikoo meiguanareki. 11#Luka 14:5Nejoki, <<Amaa teneata lobo linchi nker natodoka udoto nagut ta mparri e Sabato, mara keyietu ailiepunyie? 12Amaa! Mara keata ltung'ani tipat alang nker? Kore tankaraki inia, naa keichiaakino teneasi mbaa supati mparri e Sabato.>> 13Nejoki ilo tung'ani, <<Intorioi nkaina ino.>> Neitorioo nkaina, neichiu asupatu aitoki ana anda nkae.
14Neipung Lparisayo, neiparakino loseg oarie ninye.
Laisiaayiani gelunoti le Nkai
15Kore tankaraki nayielo Yeso loseg lenche, neing'uaa inie, neirukurukore ꞉ltung'ana kumo, neichiunyie pooki. 16Neitaarriyian ninche payie meibalie ninye. 17Ketaasate kuna payie ebaya apa natejo loiboni le Nkai Isaya.
18 #
Isa 42:1–4
<<Nele laisiaayiani lai lategelua,
ilo lacham, netachamayie ꞉ltau lai.
Kapik ninye Ltau lai,
neitore lochon pooki te sipata.
19Meichankarra, nemebuak,
nemeata ltung'ani oning ltoilo lenye too nkoito.
20Nemegil lperesi oilienye,
nemear sii nkitampi e ltaa napuru,
ana meisula sipat.
21Neisilig nkarna enye ꞉lochon.>>
Etukusakanaki Yeso pecheu
(Marko 3:20–30; Luka 11:14–23)
22Neyakini Yeso ltung'ani oata lairirua, naa modooni, nemeiro. Neichiunyie ꞉Yeso ninye, meiroro, nedolicho. 23Neing'asia ltung'ana pooki, nejo, <<Mara mebaki naa ninye Layieni le Daudi, ilo Aitejeunoni oaanyutae?>>
24 #
Mat 9:34, 10:25 Kake kore payie ening ꞉Lparisayo ana nejo, <<Mearaa ninye lairiruani mara ake to ngolon e Beelsebul, lkitok laa lairiruani.>>
25Kore ana nateyielo Yeso mparrunot enche, nejoki ninche, <<Meatae nkitoria naoro arere koon nemeidaaya, nemeatae lkerenket anaa nkaji naoro arere koon naitache. 26Kore tanaa kemiraa ꞉Chitani Chitani, naa koon naa erare. Kaji aitoki eiko nkitoria enye teneitache? 27Naa amaa, tanaa kaaraa nanu lairirua to ngolon e Beelsebul, to ngolon e ng'ae earaa looiteng'eni linchi? Naaku naa, keaku ninche looiguanare ntae. 28Kake tanaa kaaraa nanu lairiruani ta Ltau le Nkai, naaku eidipa nkitoria e Nkai ayeu nitii ntae. 29Anaa, aji eiko ltung'ani tenejing nkaji e ltung'ani ogol aisimarie ntokitin enyena, mara ketang'asa aen ilo openy nkaji? Kore inia kata, netum inia aji enye. 30#Mrk 9:40Kore lamaatii tenebo naa lmang'antita lai, naa kore lemeiturrur o nanu naa kesachaa. 31Naa kore tankaraki inia, kajoki ntae, kepalikini ltung'ana ng'oki o ldeket pooki, kake kore ilo otediaa Ltau Sinyati, naa mepalikini. 32#Luka 12:10Kore pooki ng'ae oiro rerei torno te Nkerai e Ltung'ani naa kepalikini, kake kore pooki ng'ae oiro rerei torno ta Ltau Sinyati, naa mepalikini tana ng'amata anaa ta ng'amata nalotu kenya.
33 #
Mat 7:20; Luka 6:44 <<Tanaa keisupat lcheni naa keisupati lng'anayio lenyena, naa tanaa keitorno lcheni, naa keitorrok sii lng'anayio lenyena. Naaku, taa lng'anayio lenyena eyielouni lcheni. 34#Mat 3:7, 23:33; Luka 3:7, Mat 15:18; Luka 6:45Ntae ichioi ee lasuria, aji inkoko tiniroro lomon supati, nirara maate torrok? Amu kore nenia naabore ltau lo ltung'ani, naa ninche eiro nkutuk enye. 35Kore ltung'ani supat neiu supati taatua nchumat enyena, neiu sii ltung'ani torno ntorrok taatua nchumat enyena. 36Kajoki naa ntae, kore rerei pooki lemeata tipat ooiro ꞉ltung'ana, naa keipari kenya ta mparri e nkiguana. 37Amu te rerei lino ikinkenakini sipat, naa te rerei lino sii kidung'okini nkiguana.>>
Keiguanareki ꞉lolo lemeiruk aajo kera Yeso Mesia
38 #
Mat 16:1; Mrk 8:11; Luka 11:16 Neitoki Lparisayo o laiteng'enak loo nkitanapat aajoki ninye, <<Laiteng'enani, ikiyieu nikidol nkitodolunoto te iyie.>>
39 #
Mat 16:4; Mrk 8:12 Newoliki ninche ajoki, <<Ltung'ana le mpukunoto torno o le mpukunoto nemeata nkurukoto ooyiaya nkitodolunoto e nking'asia, kake meata nkitodolunoto naichori, mara ake nkitodolunoto e loiboni le Nkai Yona. 40#Yona 1:17Naa kore ana natepero apa Yona mperot uni, kuarie o parkiji, to nkocheke e sinkir sapuk, naa keper sii Nkerai e Ltung'ani mperot uni, kuarie o parkiji, taatua lodo le nkop. 41#Yona 3:5Keitachoo kenya lewa le Ninawi o kulo tung'ana le mpukunoto torno o le mpukunoto nemeata nkurukoto ta mparri e nkiguana. Kore lolo lewa le Ninawi, nedung'oki nkiguana torno kulo tung'ana, tankaraki keibelekenyete apa ninche, te likoroto e Yona, naa eng'ura ketii ene lara kitok alang Yona!>> 42#1Lki 10:1–10; 2Ng'a 9:1–12Keipung'unyieki kenya nkinkii naing'uaa kopikop ta mparri e nkiguana, tenebo o kulo tung'ana, neiguanare ninche. Amu keyewuo eing'uaa neiting'ie nkop ainining'u ng'eno e Solomon, naa eng'ura, ketii ene lara kitok alang Solomon!
Nchukunoto e lairiruai
(Luka 11:24–26)
43-44<<Kore payie eipung'u lairiruai taatua ltung'ani, neimaa ng'ojitin nemetii nkare, eyiaya neyeng'iyeng'are. Kake tenelau, nejo, <Karrinyokino nkaji ai naipung'unyie apa.> Kore payie ebau, nedol ajo nkaji narok ake inia, netooroki, neitibiraki, 45nelo ariku lkulie airiruani sapa torrok oaalang ninye, nejing nemany inie. Nerroyo nkichon e siedi e ilo tung'ani alang napa ekue. Nejia naa kenya etiiu kulo tung'ana le ana pukunoto torno.>>
Ng'otonye Yeso o lalachera lenyena
(Marko 3:31–35; Luka 8:19–21)
46Kore ewuon eirorie Yeso lturrurri, neitache ng'otonye o lalachera lenyena to boo eyieu neirorie ninye. 47Nejoki ꞉ltung'ani obo ninye, <<Keitache ng'utunyi o lalachera linono to boo naa ikiyieu ꞉ninche nikirorie iyie.>> 48Neng'amaa ajoki, <<Ng'ae dei yieyio, naa oo ng'ae lalachera lainien?>> 49Neutaki looiteng'eni lenyena ta nkaina ajoki, <<Kore yieyio o lalachera lainien, naa kulo. 50Amu kore pooki ng'ae oaas nenia naayieu ꞉Papa lai oti chumata, naa ninye lalache lai o nkanache ai o yieyio lai.>>
Currently Selected:
Matayo 12: saq
Označeno
Share
Copy
Want to have your highlights saved across all your devices? Sign up or sign in
© 2021, Bible Translation and Literacy