Matayo 11
11
Etoolika ꞉Yeso Yoana Laipatisani
(Luka 7:18–23)
1Kore payie eidip Yeso aitaarriyiana loochi ooiteng'eni lenyena pukura tomon o oare, nelo teinie alo aiteng'enicho, nelikoo too lkerenketi le inia kop.
2Kore payie ening ꞉Yoana Laipatisani etii jila mbaa naasita ꞉Kristo, neipaaki looiteng'eni lenyena 3meipara aajoki, <<Iyie dei apa ilo Mesia olotu tana ikianyu likae?>>
4Newoliki ꞉Yeso ajoki, <<Enchom entiliki Yoana nenia nining'itoto o nidolitata: 5#Isa 35:5,6, Isa 61:1Etodolichete lmodook, epuo lootigiligilete tee nkejek, eichiunyieki loata moyian ee lbolot, etining'ichete lming'anak, naa keitipiutae lootuata, nelikini laisinak Lomon Supati. 6Emayiana pooki ng'ae lamaajur nanu.>>
Eibalunyie Yeso ajo loiboni le Nkai Yoana
(Luka 7:24–28)
7Kore epuoito looiteng'eni le Yoana, neng'asu Yeso aliki lturrur mbaa naaipirita ninye, <<Nyo apa impung'o aapuo aadol to lkees? Loperriai oyukuto ꞉siwuo? 8Oo taa, nyo impung'o aapuo aaing'or? Ltung'ani oichopito nkilani naapuyiapui? Mara, kore lolo ooichop nkilani naapuyiapui, naa nkajijik ee lkinkii ewuenie. 9Kake nyo impung'o aapuo aaing'or? Loiboni le Nkai? Ee, kajoki ntae, kelang ꞉Yoana Loiboni le Nkai.
10 #
Mal 3:1
<<Aa kore ninye, naa keimakita ꞉Lkigerot aajo,
<Teyielo ajo kareu lkipaaret lai tekue iyie,
likintibiraki nkoitiei ino tekue iyie.>
11<<Kajoki ntae sipata nadede, kore too pooki otiiwua ꞉ng'oriei, meatae hoo lkitok alang Yoana Laipatisani, kake kore lara kini te nkitoria e chumata, keikitok alang ninye.
Etanya ꞉ltung'ana Yoana o Yeso
(Luka 7:30–35)
12 #
Luka 16:16
<<Kore apake ang'asu ng'amata e Yoana Laipatisani ana metabaki taata, ketumuto nkitoria e chumata larrabal, neisimaa lolo torrok la larrabal aaibooyo, payie mebulaa. 13Amu keibonutua apa ꞉loibonok le Nkai o nkitanapat metabaki ng'amata e Yoana. 14#Mal 4:5; Mat 17:10–13; Mrk 9:11–13Oi siake tanaa ing'amaa, amu ninye Elija apa olotu. 15Kore loata nkiyiaa, nchoo ening!
16<<Nyo sa aitunyunyukie ltung'ana le ana pukunoto? Inji etuwuana ana nkera naawueni to ng'oji nemirichiereki, neipot ꞉mboitieii enche aajoki,
17<Ikitukutakita ntae ndulen,
neitu iranyrany,
nikitaranyakita ntae sinkoliotin lo lkichiret
neitu inchirchir.>
18<<Amu keyewuo Yoana menya ndaa, nemematicho, kake nejo ltung'ana <Lairirua eata.> 19Nelotu Nkerai e Ltung'ani, nerruticho, nematicho, kake nejo ltung'ana, <Eng'ura ele ogut naa lamerani, nera lchore laa laitalakunok le kodi o loo ng'ok.> Kore ng'eno e Nkai, naa keyielouni taa asat enyena, neikeni aajo kedede.>>
Oi siake lolo kerenketi leitu eirriidu
(Luka 10:13–15)
20Neng'asu ꞉Yeso akusakan lolo kerenketi oataasie mbaa kumo e nking'asia, amu eitu eirriidu ninche. 21#Isa 23:1–18; Ese 26:1—28:26; Yoel 3:4–8; Amos 1:9,10; Sak 9:2–4Nejo, <<Oi sii ake iyie Korasin! Oi sii ake iyie Betesaida! Amu kore tanaa ketaasaki apa te Tiro o Sidon mbaa e nking'asia naataasaki taatua ntae, anata apa eibelekenyete ninche, neichop nkilani ee lkuniyiani, newueni too nkuron. 22Kake kajoki ntae, kore kenya ta mparri e nkiguana, naa keiteleleki nkiguana e Tiro o ne Sidon aaitalang ntae. 23#Isa 14:13–15, Ng'as 19:24–28Amaa! Iyie Kapernaum, mara mikiliepieki aaitabaki chumata? Ikintodouni aaitodoki nemeneng'a, amu tanaa ketaasate apa mbaa e nking'asia naataasate te iyie te Sodom, anata duo ewuon eatae ilo kerenket. 24#Mat 10:15; Luka 10:12Kake kajoki ntae, keikachieki kenya Sodom ta mparri e nkiguana alang iyie.>>
Keiyeng'iyeng'ie ꞉Yeso ltung'ana
25Kore te inia kata nejo Yeso, <<Kaarrep iyie Papa, Laitoriani le chumata o nkop. Amu isudorie kuna baa lkursaii o laing'eni, nimbalakinyie lolo lemeitoki eyielo. 26Ee, Papa, amu inia naa apa yieunoto ino! 27#Yoa 3:35, Yoa 1:18, 10:15Kaaitarasaka Papa lai ntoki pooki, apik nkaina. Meatae hoo ꞉loyielo Nkerai mara Papa ake, nemeata sii ꞉loyielo Papa mara lolo oaatachama ꞉Nkerai aibalakinyie.
28<<Ootun natii, ntae pooki ooinaurete, neitelekaki lkurupani ooirochi naa kayeng'iyeng'ie ntae. 29#Yer 6:16Entipik ate lororoi lai, nikinteng'enarere nanu, amu kabor nanu ta ltau, naanana ocheke, naa itumtum ntae nkiyeng'iyeng'ata ee nkurruki inchi. 30Amu kore lororoi lai, naa kelelek, neneneng sii lkurupa lai.>>
Currently Selected:
Matayo 11: saq
Označeno
Share
Copy
Want to have your highlights saved across all your devices? Sign up or sign in
© 2021, Bible Translation and Literacy