Lubaakico N̰amaakeetee Iisa Masi 12
12
Erod deewaa Zak o Piyer pa ga bakammaa daŋayi
1Gaa oko wikinne kaaka pa, ga sultan Erod#12.1 Erod kaaka pa, ay Erod Agirippa ka omma. waciɗe ga deegeyɗiy giimi ku Zerizalem daare ma temekka saananti Iisa Masi. 2Gaa beneyyiɗe gu deeɗiya ma seepane Zak ma ay sinti Yaaya. 3Maa ga elliɗe ga liyaw keeke deyyo daanayo oko Yawudigeyyo, gaa baamiyya kulla Piyer aacco meeni ku laalane ta mappayi bala muɗugu maa gu kolaa goo Pak. 4Gaa maa ga baamiyya Piyer, gaa issiyya daŋayi. Gaa apirɗe asaakargee ga eddiɗiy durgee pooɗi, pooɗi pooɗi, gu elelɗiya Piyer. Gata pa aŋakke ga caaɗiyee parlane unco giimo gii laalane ta Pakti taata ƴiile. 5Gaa maa ga alɗo daŋayi kaaka, gu giimi ma temekka saananti Iisa Masi inniyyee Mella ta tirta teete.
Malaykatti Mellayi cemekkaa Piyer min daŋayi
6Gaa ma aandoŋtí meene maa ga sultan Erod caaɗiyyee parlane oko Piyer unco giimo, ga Piyer pa oƴee ɗaɗɗakkico taraakee seera o gu onokkegu pittee serco ma janaazargee o taraakee daare nowotte biití burgo ta daŋayi. 7Gaa kaytiŋ ka, ga malaykatti Mella Miltine oomiyyee suluuluyyi. Gaa dawwiyɗe racal. Gaa asiyya eesa Piyer ga miiniyya, gaa beneyyiyyee gaa: «Wacu koɗok!» Gu janaazargee maa gu onoɗɗeegu pittee suubiɗe. 8Gaa malaykat beneyyiyyee gaa: «Onnica abuucum o ki issiy n̰uurcam.» Gaa Piyer leeɗiya aleŋ maa ga malaykat beneyyiyee. Gaa beneyyiyyee payya oko Piyer gaa: «Issica kalkapcum kii jobbinno.»
9Gaa Piyer oomiɗe min daŋayi ga joboɗɗiya malaykat. Gata pa leewe gaa walaŋ ga lattaati malaykaddi kaaka maa ga leyyee ay seene ɗa, gaa walaŋ gi ya waano ka. 10Guu ƴiiliyya were ka taraakeyyo ka omma, guu ƴiiliyya payya were ka taraakeyyo ku seera. Guu sarɗe pe pa oko biití burgo ta sarni ma cemekkay min daŋayi. Maa gu saritti, gii iyyiɗe pe kayti ka unco waŋ gu oomiɗe biití burgutti, guu galɗe butuuli guu jeepiyya. Gaa kaytiŋ ka ga malaykatti Mellayi masiliyyee.
11Gaa Piyer leeɗiyoo kabarre oko gaari kotti ma asiyee. Gaa beneyyiɗe gaa: «Haŋka pe na ibine kadar ga ay ma seene ga Mella Miltine n̰aamawga malaykatti, ga asinno ipira min pitti Erod, o min oko gaari paracco ku miɗɗa maa gu Yawudigee aŋka gu leeɗaw.»
12Maa ga ibiniyya keeke, gaa kaatiɗe girti Mariyam ma ay yaati Yaaya maa gu kolaa kulla goo Mark. Aatti ger kaaka pa gu giimi maani temekke gu enewɗo Mella. 13Gaa Piyer asiɗe katta biití burgutti. Gii lubaaká kaƴi aɗe maa gu semeeti goo Rood asiɗe gi asiyyee iyya. 14Gaa maa gi ibinicca ur̰uuti Piyer, gii deeɗiti daanati ta kaw namma gi alɗica iyya ɗa burgo. Gii yookiɗe gi deeɗiyo taasa oko giimi ma temekke kotti gee: «Piyer aaye biití burgutti!» 15Guu tiilitti goo: «Ka awakka e?» Gii gita pa ɗilliyyoo gee: «Ay seene.» Guu leeɗiti goo: «Alaa ga ay malaykatti.»
16Gaa Piyer kokoɗɗiyo missa. Gaa maa gu iyyiyyee, guu elliyya. Guu ajjibiɗe ta tirta. 17Maa ga un̰n̰iɗe, gaa tooriyyooga pitti gaa gu ƴaapu ka. Gaa gemmiyyoo baŋ ga Mella Miltine cimmiya gaa me min daŋayi. Gaa beneyyiyyoo payya gaa: «Anne taasa oko Zak#12.17 Zak keeke pa, ay sinti Miltine kee Iisa o ga ay kaƴi kulla min taattuweeco giimi ma temekka saananti Iisa Masi geegar ka Zerizalem. o oko seneeta ma dowwiy galbigeeco oko Iisa daare.» Gaa oomiɗe min iŋaa, gaa kaatiɗe were kaƴi.
18Maa ga were walɗe, guu asaakargee gu kellemco oomiɗe, guu enewɗo zeneeco goo: «Gata Piyer deero pe ini me keeke?» 19Gaa sultan Erod n̰aamiɗe gaa gu diyyiya, guu alɗiya gassa ɗa. Gaa inniɗiy ma gaari ma deyyee oko Piyer, gaa beneyyiɗe gaa gu deyyiy. Gaa min oko kiɗa ta Yudee, ga sultan Erod deeɗe nunta wikinne paalta geegar ka Sezaree.
Muutti Sultan Erod
20Gaa sultan Erod boŋsiyyo ta tirta teete oko giimi ku geegar ka Tir o ka Sidon. Guu guta pa boodiɗe, guu kaatiɗe elliti Erod ku maa gu deeɗo taaca. Guu deeɗiya gassa miiɗi kaaka maa gu kolaa goo Bilastus ma ay lubaaka ka girti sultan Erod. Gaa deeɗiyee beneyya oko sultanni ku maa gu taaciɗo asan gi tiyawco asaa min kiɗaati.
21Gaa oko meene maa gu caɗee, ga sultan Erod issiɗiy kaɗiŋgeetee ku salaatiniyyiti, gaa nuntiɗe wikirti ka caaɗiti parlanti, gaa beneyyiɗe unco giimi paracco. 22Maa gu giimi giyyiyya beneyti kaaka, guu cayyikiɗe ma raɗɗa goo: «Ay gimu ɗa ma beneyya, ay zooru!» 23Gaa oko wikinne kaaka saa, ga Mella Miltine n̰aamiyyee malaykatti oko sultan Erod ga itiriyyee paraayi ta tirta asan ga oyyica darjanti Mellayi oko gata. Gaa ziiti acciɗe diiri, gaa maatiɗe.
24Gaa beneyti Mellayi tacalɗo ka ta ƴiila o giimi ma dowwiy galbigeeco oko Iisa gayaa ka gu gayawɗo ta ƴiila. 25Maa gu ini Barnabas ma giiti Sol gaamiyya lubbico maa gu giimi ku Antiyos n̰akamɗiy Zerizalem, guu yookiɗe Antiyos. Maa gu yokowɗo pa, gu marrikkiki kulla Yaaya maa gu kolaa goo Mark.
Currently Selected:
Lubaakico N̰amaakeetee Iisa Masi 12: mmy
Označeno
Deli
Kopiraj
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.