Lubaakico N̰amaakeetee Iisa Masi 10
10
Korney o malaykat
1Lekka miiɗi kaƴi aɗe maa gu semeetee goo Korney ma aaye geegar ka Sezaree. Gata pa ay tattuwco asaakargee orooruwee orro ku Rooma maa gu kolaa goo ‘Asaakargee ku kiɗa ta Itali’. 2Gata pa ma gimtee paracco ku giiri, bakammiya talta ka Mellayi o gu ɓayakkee. Gata gayay maani saamuweeco Yawudigeyyo, o ga lollokkaa diiman Mella. 3Gaa meene kaƴi ma usur ga Mella beneyyiyyee aleŋ ma waano oko Korney. Gaa elliɗe malaykatti Mellayi ma ase un̰n̰a girti, gaa kolliyya gaa: «Korney!» 4Maa ga Korney elliyya samaane malaykat, gaa ɓayɗe ta tirta, gaa inniyya gaa: «Miltu, ay me?» Gaa malaykat tiiliyyee gaa: «Mella giyyica innicum o ga ellica samaanicum maa ki leewayo oko saamuweyyo, o ga rawattikum ɗa. 5Haŋka pa ki n̰aamu giimi geegar ka Jappa gu deeɗiki asa gimu kaƴi aɗe maa gu semeetee goo Simo, o gu kolaa kulla goo Piyer. 6Gata pa sobee wikirti lubaaka kaƴi aɗe ka tukko. Gata kaaka pa kulla gu semeetee goo Simo. Girti pa aaye biití baharre ta yaata.»
7Maa ga malaykat gaamiyya beneyti kaaka, gaa yookiɗe. Gaa Korney kolliɗe lubaakeetee seera, gaa kolliɗe kulla askarti kaƴi ka kattee ƴiila ma bakammiya kee ka Mellayi. 8Gaa Korney gemmiyyoogu gaartee kotti. Gaa n̰aamiɗiy Jappa.
Tiyaw maa ga Mella gaa gi samaane aymiti
9Gaa ma ta sokkonta, maa gu gimtee koo maa ga Korney n̰aame alɗo butuuli katta Jappa, ga Piyer kalappe kayaati giiri inniti Mellayi ma gaayile raɗɗa. 10Gii maya deeɗiya ga aŋkiɗo tiyaw. Gaa maa gu lewɗe tiyaw kaaka, gi asiyyee aleŋ waano. 11Gaa elliɗe samaane iyyenta o latta kaƴi aɗe ma beraa kiɗaati ma ay aleŋ targane yaata pirriyenta o gi baamenta min beneeti poɗɗacco. 12Gaa aatti gi lekkiɗiy gaaruwi pay pay ma lekka asina pooɗi o ma soysoyya kiɗaati o ɗiiɗi kulla pay pay. 13Gaa giyyiɗe ur̰e ma beneyye min samaani gee: «Piyer, wacu ki daɓisiyɗo, kii aymiɗo.» 14Gaa Piyer tiiliɗe gaa: «Kaw Miltu! Na ayme ɗa kaytiŋ gaaraw maa gu hukumnigee ku Kitamniti Muusa toɗokke aymiti e baŋ ga latta ma negekkano unti Mellayi.» 15Gii ur̰e taata tiiliyyee payya gee: «Maa ga Mella gaa gu samaane aymiti, ga kii pa aɗiko lee ɗa kii gu negekkay giimi unti.» 16Gaa beneyyi keeke ɗilliyyee subbatiŋ oko Piyer aleŋ beneyyi gata ka. Gii targane tee yookiɗe samaani.
17Guu gaari kooko appe kaawiyyeeca kayaati Piyer, gaa moyowɗo baŋ gu gaari kooko appe garaa pe ini me. Gaa oko wikinne kaaka, gu gimtee Korney maa ga n̰akamme un̰n̰iɗe girti Simo, guu gassiyya. Guu waraɗɗe paaɗe biití burgutti. 18Guu kolliɗe gu inniɗe goo: «Ay keeke aɗe ay ger maa ga Simo maa gu kolaa goo Piyer sobowɗe e?»
19Maa ga Piyer moyowɗo missa gaari maa ga elle koo baŋ gu garaa ini me, gii Ruuhanti Mellayi beneyyiyyee gee: «Giyyu ƴa, lekka giimi kunne subba ma aŋka ellicum. 20Kaaka pa ki wacu, beeru ki kaatiɗo ma guta. Aɗica bamma ɗa seera seera, asan ga ay naata ma n̰akammamgu.» 21Gaa Piyer beeriɗe ga deeɗiy gassa giimi guta, gaa beneyyiyyoo gaa: «Ay naa keeke appe maa ku deyekka. Ay ini me ma asaawikitoŋ?» 22Guu tiiliyyee goo: «Ay Korney tattuwco asaakargee orooruwee orro ma n̰akammini. Gata pa ay gimu ɗayaŋ ma ɓayakka Mella o gu Yawudigee ku were paratti beneyya samaane ma gaartee. Gaa malaykatti Mellayi beneyyiyee gaa ga n̰aamu giimi gu asiɗo wikircum ki asiɗo kaata girti, ga deeɗiy giyya beneyyiŋgeecam maa ki lekkee.» 23Gaa Piyer issiɗiy giiri giimi guta gu walɗe paaɗe.
Piyer wikirti Korney
Gaa ta sokkonta ga waciɗe ga marriɗe paaɗe ma guta. Guu seneeta daare ma dowwiy galbigeeco oko Iisa min Jappa iziyya Piyer. 24Guu sarɗe Sezaree ma gittee. Wikinne kaaka pa, ga Korney timmiy gimtee o lanjigeetee ku katta gu ocoɗɗiya Piyer. 25Gaa maa ga Piyer on̰owɗo girti, gaa Korney joobiyya ga darsiyyee unti, gaa salammiyya ma karaamane. 26Gaa Piyer cipiliyya, gaa beneyyiyee gaa: «Wacu kancum. Naa kulla ay gimu ka aleŋ kii.» 27Guu on̰owɗo paaɗe o gu beneyya namma gu deeɗe gassa giimi maani ma temekke. 28Gaa Piyer beneyyiyyoo gaa: «Ku lekka kabarre kadar ga nii Yawudigee gu hukumnigeetini toɗokkini nunto ma giimi ma ay Yawudigee ɗa o un̰n̰o gerraco. Gaa Mella soopa gaariyyawca saa purta gaa ga ya gimu kaƴi na alɗiki lee ɗa naa ga lekka latta ma negekkaa unti Mellayi o gi samaane ɗa gi nunto ma gata. 29Ay ɗakko appe ga maa ku kollinno na asiɗe bala meelo. Haŋka pa na aŋka ƴa na ibiniyya baŋ ga ayme ku asikkino.»
30Gaa Korney tiiliyyee gaa: «Lekka meeni subba aleŋ saha teete, wikinne ka usurti, maa na enewɗiya Mella. Gaa kaytiŋ ka, ga lekkiɗe gimu ma ase warra untu ma kaɗiŋgeetee purta tal. 31Gaa beneyyiyyaw gaa: “Korney, Mella giyyica innicum o ga rawattikiti ɗa samaanicum maa ki leewayo oko saamuweeco Yawudigeyyo. 32Haŋka pa ki n̰aamu giimi geegar ka Jappa gu deeɗiki asa gimu kaƴi aɗe maa gu semeetee goo Simo o gu kolaa kulla goo Piyer. Gata pa sobee wikirti lubaaka kaƴi aɗe ka tukko. Gata kaaka pa kulla gu semeetee goo Simo. Girti pa aaye biití baharre ta yaata.” 33Ay ɗakko appe na n̰aamiɗe koɗok giimi gu kaatiyyam Jappa gu deeɗikum asa iŋee. Gaa kii pa oyyiɗe asaw. Haŋka pa, ni ay gata appe keeke parattini unti Mellayi ku maa ni giyyiyya beneyyi paratti maa ga Mella garawwiyam gaa ki asaaniiga beneyya.»
34Gaa Piyer beneyyiɗe gaa: «Ay haŋka pe na ibine ma tirta kadar ga Mella aparra ɗa giimi, leeway sawa ka. 35Innasoopa, ga kulla gimu aɗe caŋ ga dee kee ka balle ŋawwa, gaa ɓayaɗɗo Mella o ga leewa ɗayaŋ unti, ga daanee oko Mellayi. 36Tippa, ga Mella n̰aamiyooga beneyti oko giimi ku Isirayel. Beneyyi kaaka pa ay kabarre ta daana ta aapiyati ma Mella ma asaa min oko Iisa Masi ma ay Milco giimi paracco. 37Ku ibina kadar gu gaari kooko pa diile ƴa omma kiɗa ta Galilee, o ga min iŋaa gu sare kiɗa ta Yudee parattí, min maa ga Yaaya beneyɗiyo oko giimo ga gu meeliy gaarco ku miɗɗa gaa batisiyɗiy. 38Ku ibina baŋ ga Mella biryee gaa me gudirane ta Ruuhanti oko Iisa ma ay ka geegar ka Nazaret. Ku ibina kulla baŋ ga Iisa amiliyoo gaa me oko wereeriyee ku kiɗa taata ma liyaawi ku samaane oko giimo, o ga rayyadday giimi paracco maa ga Seetanne bamakke, asan ga Mella aaye ma gata.
39«Nii pa, ay suyuudigee ma gaari paracco maa ga Iisa leelo kiɗaaco Yawudigeyyo o geegar ka Zerizalem. Guu taattuweeco Yawudigeyyo deeɗiya ma paapo kuruwayi. 40Innasoopa, ga oko meene ma daa ta subba ga Mella naɗiya min muuti. Gaa Mella gaariyyooga oko giimi daare gu elliyya kadar ga geewa. 41Iisa pa oomiyoo ɗa oko Yawudigeyyo paracco, ay niita ka maa ga Mella aparre min omma ni deeɗo suyuudigeetee. Maa ga Iisa naɗiɗe gata kaaka pa min muuti, ni teero o ni aar̰e ma gata sawa. 42Gata pa beneyyini gaa ni aɗica taasa kabarre ta daana oko giimo kadar ga ay gata maa ga Mella aparre ga asiyyo caaɗa parlane oko giimi paracco ma geewa o ma matakke. 43Nabiinigee pa paracco beneyye min tippa ma gaartee Masi goo ga kulla gimu aɗe goŋŋa ma dowwica galbanti oko gata, ga Mella saamayyeegu zunubgeetee ma gudirane ta semeetee Iisa.»
44Gaa oko wikinne maa ga Piyer beneyɗo missa pa, ga kaytiŋ ka gi Ruuhanti Mellayi beeriyyo oko giimi kotti ma geewaa beneyti. 45Guu Yawudigee paracco ma dowwiy galbigeeco oko Iisa ma maree ma Piyer ajjibiɗe oko maa ga Mella biriyyooca ta kaw Ruuhanti taata oko giimi ma ay Yawudigee ɗa kulla. 46Guu gittee Piyer ibiniyya keeke asan gu geeway giimi ma ay Yawudigee ɗa kotti guu beneyya beneyyiŋgee daare maa gu ibina ɗa o gu logokka tattuwti Mellayi. Gaa Piyer beneyyiɗe gaa: 47«Haŋka pa mileŋ gu giimi kooko gassica paaɗe Ruuhanti Mellayi kulla aleŋ tantine, ke toɗokkayooca ɗa batisiyo ma ammi.»
48Gaa Piyer beneyyiyyoo gaa gu batisiyiy ma semeetee Iisa Masi. Gaa Korney ma lanjigeetee inniyya Piyer goo ga nambayo meeni paalta.
Currently Selected:
Lubaakico N̰amaakeetee Iisa Masi 10: mmy
Označeno
Deli
Kopiraj
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.