Matthew 6
6
Wakù pe we'nàtok Tùulon kon pàk
1“Tùttuseichi mettàik wakù kupù auya'nokon yau ayupo kùkkuttàu, kappon yamùk uya ànkupù kon yentoppe. Sàlà yamùk kupù auya'nokon ayupo yau, eyepeppù kon yepolo auya'nokon Àkàipùnù kon epùn pon winàpai pen màlà.
2“Màlàpàk yà'làlà tùlù auya'nokon ipla tùwessen yemyak yau, kùsekalettài yetatoppe, tùusennakasan uya ikupù Jew yamùk wepilittok itak tau, molopai asantau kasa. Màlà ku'nàinan mùkyamlo kappon yamùk uya tapulàtok kon pe. Ailon kulu sàlà, tok uya tamù'nawàlà tepeppù kon yepokasak màlà. 3Tùse yà'là là pùn sa'ne kappon pùikattà auya'nokon yau mùkuttàik ewechi yakon nà uya ittu pùla. 4Amak yai tùkussen pe iwechi màlà. Molopai Àkàipùnù kon Katù amak yai ikupù auya yennài uya eye'ma màlà,” teppù Jesus uya.
Wàpùlemantok pàk Enupantok
(Luke 11.2-4)
5“Àwàpùlema kon yau, kappon yamùk uya eyene kon iche kettàu, tùusennakasan kasa! Àpùlemapai nokon mùkyamlo satippe Jew yamùk wepilittok itak tau, molopai asanta yena po. Sàlà ku'nàinan mùkyamlo tamù'nawolon kon uya tentok kon pe. Ailon kulu sàlà, tok uya màlà tamù'nawàlà tepeppù kon yepokasak. 6Tùse àwàpùlema kon yau, tùkkenan pata yak mùtàtàik, ànù'là uya eyene kon tukaik, molopai tewincha nen uchi àwàpùlema kon pa, mùkkàlà tensen pen pàk. Katù Àkàipùnù kon amak yai mùkussatài'nùk yennài uya eye'ma kon màlà.
7“Àwàpùlema kon yau tukke itesek lùppù pe neken kentakklomatàu, Katù ittunnan pen kasa là, tukke tùuselupa kon pàk Katù uya teta kon pe yekamannan. 8Tok kasa kettàu, Katù mùkkàlà àkàipùnù kon molopai iche ewettok kon ittunài mùkkàlà tùpàk yenna auya'nokon wapiya. 9Sàlà kasaichi mapùlematàik, ‘Ina Kàipùnù epùn pon, tàwà wakù eyesek tùnamasen pe nechii.
10Tàwà itepulu pe ewettok nùyàpùi, tàwà eyeselu nekkupùi sàlà non po, epùn yau nai'nùk kasa.
11Ina yekkyali ke ina ilepakà sàlà pe.
12Ina makuyi pàk esentuppakà. Ina winàkàik iwemakuimassak kon pàk nàlà ina nùsentupayai'nùk kasa.
13Ina kùsettùtak sa'man ittuntok yak, tùse Ene Makui winàpai làkku ina ikukkà, Masapùla àponalok màlà itepulu pe we'nàtok epùn po, molopai apàikkek, molopai apulàntok tàwàlàlà. Emen, tukaik, teppù Jesus uya. 14Masapùla ewinàkài'nokon iwemakuimasak kon pàk eusentuppa kon yau, Àkàipùnù kon epùn pon usentuppa nàlà màlà àpàkù'nokon. 15Tùse tùulon kon pàk eusentuppa kon pùla iwechi yau, Àkàipùnù kon usentuppa amakuyi kon pàk pen màlà,” teppù Jesus uya.
Tùuta'lettàik pùla Wàpùlemantok pàk Enupantok
16“Molopai tùuta'lettàik pùla ewechi kon yau, ichewankono'masappe itenpata kettàu, tùusennakasan kasa. Tùutàsan mùkyamlo iwan pe tùusense, tamù'nawolon kon uya kulu tùuta'lettàik pùla tùwechi kon yentoppe. Ailon kulu sàlà, tok uya màlà tamù'nawàlà tepeppù kon yeposak. 17Tùuta'lettàik pùla àuko'mamù kon yau, eyenpata kon mùkukatàik molopai appai kon mayankatàik, 18kappon yamùk uya àwàpùlema kon tùuta'lettàik pùla ittu tukaik. Àkàipùnù kon, tùusensen pen uya neken ittu màlà. Molopai Àkàipùnù kon amak yai mùkussatài'nùk yennài uya, eyepeppù kon ke elepa kon màlà,” teppù Jesus uya.
Epùn pon Mamin Yamùk
(Luke 12.33-34)
19“Mamin kùppilittàu talà non po, ikalanpanài molopai ene yamùk lùkkwà uya imattanùttok yau, molopai amak ton wewontok yonanse yau. 20Tùse làkku, epùn po mamin ipilikà, ikalanpanài molopai ene yamùk lùkkwà uya imattanùttok pen yau, molopai amak ton wewontok yonanse pata pen yau. 21Masapùla eyewan wechi màlà molo tàwàlà eyemamin wettok yau,” teppù Jesus uya.
Esak Weyu
(Luke 11.34-36)
22“En màlà lanpu walai esak pona. Wakù pe eyenu kon wechi yau tamù'nawàlà eyesak kon wechi màlà tùweyu ke. 23Tùse eyenu kon wechi àli pe yau, tamù'nawàlà eyesak kon wechi màlà ewalupàttau. Màlàpàk akkwa ayau'nokon nai'nùk wenasak ewalupà pe yau, ewalupà pe kulu iwechi màlà!” teppù tu'ma Jesus uya.
Katù Molopai Mamin Yamùk
(Luke 16.13; 12.22-31)
24“Ànù'là pùla iwechi màlà asa'lon kon itepulu yamùk yapyoto pe tùwessen. Yattai pùla tewinannà yeya'noma ya, molopai yakon kupù ya tù'nùn pe. Wapùla ailon pe iwechi màlà tewinan pàk molopai yakon yenpàtù ya. Asakklàma Katù molopai pùlayatta yesappe ewechi kon pen màlà eyepulu kon pe.
25“Sàlà kasaichi iwechi pàk tekamayaik àpàkù'nokon, ewemattok kon pàk kataimelunpatàu. Yà'là napù uya sa' uchi ko wapùla yà'là inchi uya, wapùla yà'là yau wechi kùkatàu. Wema'nàtok ken na' màlà kùyali yentaino pen? Molopai esak ken na' màlà pon yentaino pen? 26Masa tolon yamùk yentàk kon. Tùwàppànsan pen, wapùla kùyali pili'nàinan itùwùk tak pen. Àkàipùnù epùn pon mùkkàlà tok mainanpanài! Tolon yamùk yentaino kon lùiwa pen ken na' uchi amyamlo? 27Ànùk ken àkklottau'nokon nai'nùk usemokka kusan peiwa, màlà pàk tùutaimelunpa winà?
28“Molopai yà'là pe ken iwechi pàk utaimelunpan pon pàk? Masa yuk yùpùlù yamùk yentàk kon. Tùwe'wotokomasan pen, wapùla tùpon kon konekannan pen. 29Tùse tekamayaik àpàkù'nokon Solomon nà wepontàppù wakù pe tewinnà yuk yùpùlù kasa pen màlà, tukke lànen temamin ke iwechi tùse. 30Katù mùkkàlà wanak pontànài, wanak nulà nai'nùk sàlà pe, ippla nai'nùk ewanawà, tùpottàsen apok ke. Àpontà kon ya pen kulu ken na' uchi, màlà yamùk yentai? Attu'mùla kulu ailon tetok auya'nokon man! 31Màlàpàk uchi kataimelunpatàu, Yà'là napù uya sa' uchi ko, wapùla yà'là inchi uya, wapùla yà'là yau là wechi?’ tukaik. 32Sàlà yamùk màlà ailon Katù ittunnan pen utaimelunpatok ipàk tàwàlà. Àkàipùnù epùn pon mùkkàlà tamù'nawàlà sàlà yamùk iche ewechi ittunài,” teppù Jesus uya. 33“Tùse làkku, wapiya itepulu pe iwettok yemyak ettùtàk kon, molopai tamù'nawàlà iche iwettok kasa molopai tamù'nawolon sàlà yamùk tùlù ya màlà eyemyak kù'nokon. 34Màlàpak uchi kataimelunpatàu ewanawolok pàk. Masapùla tùyiwalà utaimelunpantok ipàk yesappe iwechi màlà. Màlàpàk wei kaichalà utaimelunpantok wechi màlà molo,” teppù nàlà Jesus uya.
Currently Selected:
Matthew 6: PNTR
Označeno
Share
Copy
Want to have your highlights saved across all your devices? Sign up or sign in
Patamuna New Testament Revised © United Bible Societies, 1973, 2019.