लूका 20
20
यीशु रै अधिकार रा सवाल?
(मत्ती 21:23-27; मरकुस 11:27-33)
1अक्क दिन जैहणै सो मणु जो मन्दरा मन्ज उपदेश दिच्छु अतै सुसमाचार हुणाऊ करदा थू, ता प्रधान याजक, स्याणै, शास्त्री नेता मणु सोगी तसेरै नेड़ै ईच्ची खड़ियै; 2अतै बलणा लगै, “असिओ दस्स, तू इन्या कम्मा जो कसेरै हक्का सोगी करदा, अतै ऐसा कुण हा जिनी तिजो ऐह हक्क दितुरा?” 3तिनी तियां जो जवाव दिता, “अऊँ तूसु थऊँ अक्क गल्ल पूछदा; मिन्जो दस्सा 4यूहन्ना रा बपतिस्मा स्वर्गा री तरफ थऊँ थू या मणु री तरफा थू?”
5ता सो अप्पू मन्ज कणैणा लगै, “अगर अहै स्वर्गा री तरफ थऊँ दसदै, ता ऐस बलणा, ता तुहै विस्वास कजो ना करू?” 6अतै जे अहै बलदै, “मणु री तरफा थऊँ, ता ईयां मणु ही असिओ पत्थर मारनै, क्ओकि ऐह सचमुच जाणदै हिन कि यूहन्ना भविष्यवक्ता थू।”
7ता तियैं जवाव दिता, “असिओ न पता सो कसेरी तरफा थऊँ थू।”
8यीशुऐ तियां जो वलु, “ता मुँ भी तुसिओ ना दसणा कि ऐह कम अऊँ कसेरै हक्का सोगी करदा।”
दुष्ट किसाना रा उदाहरण
(मत्ती 21:33-46; मरकुस 12:1-12)
9ता सो मणु जो ऐह उदाहरण हुणाणा लगा “कसकि मणुऐ अंगुरा रा बगीचा लाऊ, अतै जिमीदारा जो ठेका दी करी कई दिना तिकर परदेसा जो चली गो। 10फिरी कई दिन बाद जैहणै अंगुरा री फसला रा टैमं आ ता तिनी अपणै नौकरा जो तियां जिमीदारा बल्लै भैजु कि कुछ फळा रा हिस्सा लेई ईन, पर तियैं जिमीदारै सो नौकर मारी मारी करी खाली हत्थै दड़ाई लायै 11फिरी तिनी अक्क होर नौकर भैजु, अतै तियैं तैस जो भी मारी मारी अतै बेईज्ती करीके फेरी भैजु। 12फिरी तिनी मालकै त्रिया नौकर भैजु, ता फिरी तियैं तैस जो भी मारी मारी के भैजु।”
13“ता तिनी अंगुरा रै बगीचे रै मालकै सोचु, अऊँ कै करू? मुँ अपणै प्यारे जिन्नै पुत्रा जो भैजणा, भूच्ची सकदा सो सेरा आदर करन। 14जैहणै जिमीदारै तसेरै पुत्रा जो इन्दै हेरू ता अप्पू मन्ज बल्लू, ऐह ता वारिस हा; ऐसिओ मारी दीन ता ऐह सब मीरास इन्दी भूच्ची गाणी हा। 15ता तियैं जिमीदारै तैसिओ अंगुरा रै बगीचे थऊँ बाहर नी करी मारी दिता।”
ता यीशुऐ पूछु, “मिन्जो दस्सा जैहणै तैस मालका जो पता लगणा ता तैस ईयां जिमीदारा सोगी कै करना?”
16“कै तैस ईच्ची करी तियां सबी जो मारी ना दिणा, अतै तैस अंगुरा रा बगीचा कसकि होरी जो ना दि दिणा।”
ता हुणनैबाळै बलणा लगै। “प्रमात्मां करा ऐसा ना भोआ।” 17यीशुऐ तआंरी कनारी हेरू अतै वलु, “कै तुहै जाणदै पवित्र शास्त्रा मन्ज कै लिखुरा
‘जैस पत्थर जो मिस्त्रिये बेकार ठहराऊ थू,
सो पत्थर ही कोणै रा सिरा बणु।’”
18“जैस कसी तैस पत्थर पुर पैणा तैस चकनाचूर भूच्ची गाणा, या जे सो पत्थर कसकि पुर पैला ता भी तैस सो पिह दिणा।”
कैसर जो कर दिणा
(मत्ती 22:15-22; मरकुस 12:13-17)
19तैस टैमैं ही शास्त्री अतै प्रधान याजक तैसिओ पकड़ना चाहन्दै थियै, क्ओकि सो समझी गै ऐह गल्ल तिनी तियां जो ही कणैई थी, पर सो तसेरै सोगी चलुरै मणु थऊँ ड़री गै।
20तसेरी कोई गलती या कमजोरी पकड़नै तांयें तियैं अपणै कुछ मणु तसेरै चेलै रै भेषा मन्ज तैसा भिड़ा मन्ज भैजै कि सो तसेरी खबर तियां जो दिन्दै रैहन, अतै सो रोमी राज्यपाल वलै तसेरी शिकायत करी सकन। 21ता तियैं मणुऐ तैस थऊँ पूछु, “हे गुरू, अहै जाणदै तू ठीक बलदा अतै सखांदा भी हा, अतै कसी रा पक्ष भी ना लैन्दा, पर प्रमात्मैं रा रस्ता सच्चाई सितै दसदा। 22अहै पुछणा चाहन्दै, कै कैसर जो कर दिणा ठीक हा या ना?”
23सो तंयारी चलाकी जो जाणी करी, अतै तियां जो वलु, “अक्क रोमी सिक्का मिन्जो दसा। 24ऐत मन्ज कसेरा नां अतै छाप लगुरी हा?” तियैं वलु, “कैसर रा।”
25ता यीशुऐ तियां जो वलु, “जैडा कैसर रा हा सो कैसर जो देआ; अतै जैडा प्रमात्मैं रा हा सो प्रमात्मैं जो देआ।”
26सो तसेरै जवाव हुणी करी हैरान भूच्ची करी चुप रैह, अतै तैसिओ फसाई ना सकै
मरनै थऊँ बाद दोबारा जीणा अतै बैह
(मत्ती 22:15-22; मरकुस 12:13-17)
27तैहणै कुछ सदूकि जैड़ै बलदै थियै कि मरनै थऊँ वाद दोबारा जी उठणा हा कि ना, सामणै ईच्ची करी तैस थऊँ पुछणा लगै, 28“हे गुरू, मूसा रै विधान मन्ज असु तांयें ऐह लिखुरा, ‘अगर कोई मरी गच्छा, अतै तसेरी घरावाळी जिन्दा भोआ पर कोई औलाद ना भोआ, ता तैस मणु रा भाई तैहा विधवा सितै बैह करीके अपणै भाई तांयें वंश पैदा करा।’ 29मना कोई सत भाई थियै, पैहला भाई बैह करीके बिना औलाद रा मरी गो। 30फिरी दूये अतै त्रियै भी तैहा ही जनानी सितै बैह करी लैऊ 31ईयां ही सो सब सत बिना बच्चै रै मरी गै। 32आखिर मन्ज सो जनानी भी मरी गई। 33ठेरैतांये दोबारा जीणै थऊँ बाद सो जनानी तियां मन्ज कसेरी भूणी हा, क्ओकि सो ता सबी री घरावाळी थी।”
34यीशुऐ तियां सोगी वलु, “बैह ता धरती पुर मणु तांयें हा। 35पर मरनै थऊँ बाद स्वर्गा मन्ज ईयां कुछ ना भूणा। तैड़ी ना बैह भूणै, अतै ना ही बैह तांयें कसकि जो दिणा 36तियां कदी भी ना मरना, सो स्वर्गदूता सैई भूणै अतै दोबारा जी भूणै री वजह थऊँ प्रमात्मां री औलाद भूणै। 37पर मरूरै जीणा या ना? मूसा भी ऐह गल्ल सावित करी गच्छुरा, जैहणै तिनी झिन्ड़ा री कथा रै बारै मन्ज लिखुरा। मूसा प्रभु जो अब्राहम, इसहाक, अतै याकूब रा प्रमात्मां भी बलदा हा 38प्रमात्मां मुरदै रा ना पर जिन्दै रा प्रमात्मां हा; ठेरा मतलब ऐह हा कि ऐह सब आत्मिक रूप थऊँ प्रमात्मैं सामणै जिन्दा हिन।”
39ऐह हुणी करी कुछ शास्त्री मणु बलणा लगै, “हे गुरू तैंई बड़ा छैळ बल्लू हा।” 40फिरी तियां जो यीशु थऊँ पुछणै री होर हिम्मत ना भूई।
मसीहा कसेरा पुत्र हा?
(मत्ती 22:41-46; मरकुस 12:35-37)
41फिरी यीशुऐ तियां थऊँ पूछु, “मसीह जो दाऊद री औलाद कियां बलदै हिन? 42दाऊद भजन संहिता री कताबा मन्ज अप्पू ही बलदा
‘प्रभुऐ मेरै प्रभु सितै वलु,
43मेरै सज्जी कनारी बैह,
जैहणै तक अऊँ तेरै बैरी जो तेरै पैरा थलै ना करी दिछुं।’”
44“दाऊद ता तैसिओ प्रभु बल्लू करदा; ता फिरी सो तसेरी औलाद कियां हा?”
ढ़ोन्गी मणु थऊँ सावधान
(मत्ती 23:1-36; मरकुस 12:38-40)
45जैहणै मणु तसेरी गल्ला हुणु करदै थियै ता तिनी अपणै चेलै सितै बल्लू, 46“झूठै शास्त्री थऊँ चौकनै रेआ, जियां जो लम्बै-लम्बै चोळै लाणा अतै बजारा मन्ज मणु थऊँ नमस्कार हुणना अतै यहूदी रै सभागार मन्ज या धाम-दाबता मन्ज उच्चै जिन्नै सिंहासना पुर बैहणा खरा लगन्दा हा। 47ऐह मणु जो दसणै लम्बी लम्बी प्रार्थना करदै हिन पर ऐह विधवा रै घरा बार जो हड़प करी गान्दै हिन, ईयां जो बड़ा भारी दण्ड़ मुळना।”
Currently Selected:
लूका 20: GBKNT
Označeno
Share
Copy
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.