LUUTI 3
3
Luuti i Hinii Maajɔngaa
1Naomi ngi yemɔi ndeilɔ ngi ma, yɛ, “Nya nyahaloi, ngi hindo gɔkɔli ma bi va, kɔ i wie a kpekpeya bi gama. 2Kiahuna naa mu ndewei Boasi gbe, na wua ngi voninge nyahangeisia wu yɛ a yenge. Kpe lɛ, i baali bei yafɛma a kpindii ji mbayangamɛi. 3Fale naa mua tawao bi ngulɔ gunɛnɛ jia, tawao bi bi lima guleisia yili, tawao bi yei bayangamɛi; kɛɛ baa pie ye kenɛi na i bi ngɔ haaŋ i kpɔyɔ a mɛhɛɛ mɛ la kɛ kpole wie la. 4Ji a la, ye hindei na jɔɔgbɛ mia i lani na; na wooma, li bi kulei gbua ngi gɔweisia ma, kɛ bi laa; kɛ a ndeilɔ bi ma na ba pie.” 5I ndeilɔ ngi ma yɛ, “Nga na gbi wielɔ bi ndenga nya ma pie va.”
6Fale i yeilɔ bayangamɛi kɛ i pienga kia ngi yemɔi i ndeni la ngi ma. 7Ji Boasi mɛhɛɛ mɛni kɛ i kpɔle wienga, tawao i yɛ kohunɛɛ waa hu, i lilɔ laa va mba yandɔngɔi gɛlɛmei. Na wooma Luuti wailɔ yɛlɛŋ, kɛ i kulei gbua Boasi gɔweisia ma kɛ i langa. 8A kpindii liei, Boasi gbɛlilɔ jii hu kɛ i wotenga, kɛ nyaha yɛ laani ngi gɔwɔ bu. 9Boasi ndeilɔ yɛ, “Ye lɔ a bie?” I kpɛmboilɔ, yɛ, “Luuti mia a nge, bi bɔilopoi. Bi wɛlɛgulɛi wɛlɛ bi bɔilopoi mahu, gbamaile bi yɛni a ndehumɔ lɔ.” 10Boasi ndeilɔ, yɛ, “Ndemɔi i bi Luba nya nyahaloi; kɛlɛma goloyɛi ji bi pienga i leweni yee halayɛi ma; bi toni foningeisia wooma, ti nyanii ɔɔ ti gbatɛi. 11Kɛ kiahuna, nya nyahaloi, baa luwa; nga na gbi wie lɔ bi gama ba mɔɔli, gbamaile nya nungeisia ti gomɛi gbi ti kɔɔ lɔ kɛ baagɔma nyaha lɔ a bie. 12Kɛɛ kiahuna naa, kia bɛ tɔnyangɔ kɛ ndehumɔ lɔ a nge, gumawomɔ yeka lɔ na, ngi ma gutungɔ waa i lewe nya ma. 13Yili a kpindii ji, kɛ a ngendɛi, ina i gumawo hinda wielɔ bi gama, i pie hi. Ina ii lumani a gumawo hinda wie bi gama, na wooma kialekee Ndemɔi vulungɔ la, nga bi wumawo lɔ. Laa haaŋ ngele i wo.”
14Fale i laailɔ ngi gɔwɔ bu haaŋ ngele i wo, kɛɛ Luuti i hiyeilɔ pɛiŋ numu i ya lihei ngi baa ma; gbamaile i ndeilɔ yɛ, “Numu gbi aa kɔɔ kɛ nyahei na i wailɔ mbayangamɛi.” 15Na wooma Boasi ndeilɔ yɛ, “Wa pɛlɛgulei na i bi ma bi hou mba.” Fale i houilɔ, kɛ i baali ba kasiipani yila humanga kɛ i ndanga ngi wumba; na wooma i liilɔ ta wai hu. 16I wailɔ ngi yemɔi gama, na i ndeni yɛ, “I ye yɛ na bi gama nya nyahaloi?” Na wooma, i na gbi hugɛlɔ a ngie kenɛi i yɛ pieni ngi va, 17yɛ, “Ta mia baali ba kasiipani yilɛi ji venga nya wɛ, gbamaile i ndeilɔ yɛ, ‘Baa yama bi yemɔi gama bi yeya wopongɔ.’ ” 18Naomi ndeilɔ yɛ, “Mawulo nya nyahaloi, haaŋ bi kɔɔ kia hindei ji ye gɛlɛma, ajifa kenɛi na ɛɛ lɛvu, kɛɛ a ye hindei ji laa lokoma a foloi ji.”
Currently Selected:
LUUTI 3: RMB
Označeno
Share
Copy
Want to have your highlights saved across all your devices? Sign up or sign in
Mende Bible Portions © Bible Society in Sierra Leone and Lutheran Bible Translators, 2020.