Yoane 4
4
Yesu la bomoto owa Samalia
1Aki Nkolo eaka wae Bafalusi baoloka wete bakimi baata Yesu ko bandinʼende baolekola ba Yoane lʼauke, 2– lolo Yesu mongo ntinaki, lolo bakimiʼakande – 3ende aolimana Yudea ko aoluta nda Ngalilaya. 4Ko mboka elekʼende wae eko ecuwana Samalia. 5Aokita ndʼonanga wa Samalia botangema Sukala, ntutama lʼitenela yʼokili iki Yakoba okaaka bonʼokae Yosefa; 6ko etoko ea Yakoba eki eko. Eki Yesu owe lʼompele wa lokendo aokitase ngoko ndʼompempe wʼetoko. Jefa liki midi.
7Ko bomoto owa Samalia aoyʼotokolʼasi. Yesu aolokela, Onkaya basi, mmele. 8Eki bakimiʼakae ocwaka osomba toma ndʼonanga. 9Bomoto owa Samalia akela, La we bosi Yuda ondombʼemi bosi Samalia basi ba mmamela ngamo? (ele Ba-Yuda la Ba-Samalia ntabakendakʼoseka). 10Yesu aolamba, aolokela, Nga weaki nganji ea Nzakomba, ko lʼende okokela, Onkayʼasi, mmele, siki olombakʼende ko akokaya basi ba loiko. 11Bomoto aolokela, Nkolo, ofa lʼetokwelo, ko etoko eleki nji-ndo, oatʼasi bako ba loiko lima nko? 12Kamba wʼolekola nde Yakoba nkokoolo ekiso, otokaaki etoko ko amelaki limʼeko, ende lʼana bakande, la bibwa bikande? 13Yesu aolamba, aolokela, Wengiʼonto omela basi bane ifoka lenkina mposa; 14lolo osʼomela basi ba emʼokayʼende, afaoka lenkina mposa nye; lolo bako ba emʼokayʼende bifoyalema ndʼotemʼokande etoko eʼasi bandola wowo elaka nko loiko ja seko. 15Bomoto aolokela, Nkolo, onkaya basi bako, nyango mpoka mposa, ko mpoyʼendo esi otokolʼasi.
16Yesu aolokela, Neo, yete bome okawe, mpanga loyʼendo. 17Bomoto aolamba, akela, Mpa lʼome. Yesu aolokela, Otefela o ci, Mpa lʼome, 18eki wʼoataka baome batano, ko oko ole la we aeyoko, afa bome okawe: otefelaki nsosolo. 19Bomoto aolokela, Nkolo, njena wae ole boteli. 20Baiseʼakiso bamemya-ki Nzakomba imemya nda ngongʼene, lolondʼinyo lokela, Yelusalema elʼitenela indeji la mmamemya ea Nzakomba. 21Yesu aolokela, Bomoto, onjimezʼemi ekeke eoya e inyʼomemya Ise, afa nda ngongʼene ko afa nda Yelusalema. 22Inyo lomemya ofʼinyʼea; iso tea oko omemyʼiso: ele loiko loya limʼele Ba-Yuda. 23Lolonde ekeke eoya, ko eokitʼaeyoko ee bamemyi ba nsosolo bamemyʼise la ndʼolimo ko la nsosolo; ele Ise ayase bandomemyʼende lʼelengʼeko. 24Nzakomba ale bolimo, siki iyʼandomemya, bomemyʼende ndʼolimo ko la nsosolo. 25Bomoto aolokela, Ndea wae Masiya otangema Kilisto aoya, ko a endʼoya ifotosangela baoyiʼauma. 26Yesu aolokela, Emʼonʼokotefeela nde nkʼende.
27Nkako bakimiʼakae baoya; kobaokamwa etefelʼende lʼomoto; lolo nkʼontʼokiyo ondouolaki, Ondasa we na? nkina, Otefela lʼende lae? 28Nkako bomoto aocika ekucu ekae, ko aocwa ndʼonanga, ko aokela banto, 29Loyaka, lene bonto onsangelaki baoyi bakiʼmʼokelaka bauma; Tone afa Masiya nde? 30Iyo baolola limʼonanga, ko baoyʼele Yesu.
31Ndʼekekʼeko bakimi bayokamʼende, bakela, Labi leka toma. 32Lolo aolakela, Njoata toma ta ndala tofʼinyʼea. 33Bakimi baoluwana, bakela, La bontʼomo aoloyela yomba ya ndala? 34Yesu aolakela, Toma tokami wete nkele wango bokande ontomaki, ko nsiza bolemo bokae. 35Inyo lofokele, Nsanza iciki inei, ko emukelo eoliela? Loala, nsangelʼinyo losangyʼaisoʼakinyo ko lene basala, wete baolela, baolelama lʼemukelo. 36Nkʼaeyoko bomuki ayambe bofuto ko ayotakanya bamuka ba loiko ja seko; wae endʼondonaka ko lʼendʼomukaka basalangane bolongo. 37Etefeelo ea nsosolo wae ene, Omo ayone ko omo ayomuke. 38Ntomakʼinyo wae lomuke emukelo eko ekiʼnyo ntalokambaki bolemo, bantʼamo bakambaki ko inyo lokitana ndʼelemoʼekiyo.
39Koko bauke wa Ba-Samalia ba bonangʼoko baoloimeza ndʼewela ea joi liki bomoto otefelaka, Ansangelaki baoyiʼauma bakiʼmʼokelaka. 40Koko aki Ba-Samalia oyaka elʼende baoloonda wae ateme lʼiyo; ko aokitase lʼiyo nkʼeko bembilʼefe. 41Ko bantʼamo bauke baoloimeza o la joi likande mongo. 42Koko baokela bomoto, Aeyoko timeza, afa ndʼewela ea nsango ekawe: elʼiso mongo toloka, ko tea wae one ale Boikyi owʼenanga beuma o nsosolo mongo.
43Aki bembile bekʼefe oleke, aolimanʼeko ko aocwa Ngalilaya. 44Eki Yesu mongo osangaka wae boteli ntaataka lokumo ndʼese ekae mongo. 45Akiʼndʼokite Ngalilaya, Ba-Ngalilaya baolosambela lʼosalangano ekiʼyʼenaka belemo beuma bekiʼndʼokambaka ndʼelambo nda Yelusalema, ekiʼyʼocwaka ndʼelambo o ngoko.
Yesu aikya bona owa capitaine nda Ngalilaya
46Ko aoya lenkina nda Kana ea Ngalilaya wiji bokiʼndʼofaningolaka basi vina. 47Koko capitaine ea Roi aki eko, ko bona okae owa jende aki la nkangi nda Kapalanauma. Aki bontʼone okaka wae Yesu aoya nda Ngalilaya lima Yudea aocwʼelʼende, ko aoloonda wae akitele elʼiyo ko aikya bona okande otutsi lʼiwa. 48Yesu aolokela, Ayakʼinyo lofene ntaza lʼelemo bia nkakamwa lofaimeza nye. 49Capitaine ea Roi aolokela, Nkolo, yaka, yokitʼekaʼmi, atafa bona okami owa. 50Yesu aolokela, Wambokende; bonʼoke aosilʼoika. Bontʼoko aolimeza joi liki Yesu osangelaka, ko aokenda. 51Nkʼakitelʼende, bakwala bakae baoyʼokumana lʼende, baosanga wae bona okande aika. 52Ko aolauola jefa loswele likiʼndʼoangaka loika, ko baolokela, Mbilʼeki lobi nga midi, nkangi ea angala eolocika. 53La ngoko, ise aolea jefa liko nko liki Yesu okelaka, Bona oke aosilʼoika. Koko aolimeza o njimeza, ende mongo ko lʼiyʼauma baki ndʼilombe ikae. 54Lone wae lotaza jʼife loki Yesu okelaka limʼekiʼndʼoyaka lima Yudea nda Ngalilaya.
Currently Selected:
Yoane 4: LOL87
Označeno
Share
Copy
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987