John 8
8
Basia no a Wɔkyeer no Awarto mu no
1Na Jesus kɔr Ngo Bepɔw no do. 2Na ahanamakye no ɔbaa asɔrfi no mu bio, na ɔman no nyina baa ne nkyɛn, na ɔtsenaa ase kyerɛkyerɛɛ hɔn. 3Na kyerɛwfo no nye Farisiifo no dze basia bi a wɔakyer no awarto mu bae, na wɔdze no sii finimfin no, wɔsee no dɛ, 4Kyerɛkyerɛfo, wɔakyer ɔbaa yi wɔ awarto mu, dɛ ogu do reyɛ. 5#Lev 20.10; Deut 22.22-24 Eso Moses wɔ mbra no mu hyɛɛ hɛn dɛ wonsiw dɛm nkorɔfo no abo: na ɔwo ese dɛn? 6Na iyi dze, wɔkae dze sɔɔ no hwɛe, ama woeenya biribi dze akɔtoa no. Na Jesus brɛɛ no mu adze dze ne nsatseaba kyerɛkyerɛɛw daadze. 7Na wɔda ho ara ribisa no no, ɔtseen no mu kaa kyerɛɛ hɔn dɛ, Hom mu nyia bɔn nnyi no ho no, wɔmma ɔntow no bo kan. 8Na ɔbrɛɛ no mu adze bio, na ɔdze ne nsatseaba kyerɛkyerɛɛw daadze. 9Na hɔn dze, wɔtsee na hɔn tsibowa yii hɔn atsɛn no, wofii hɔ nkorkor fitsi mpanyimfo do besi hɔn a wodzi ekyir do, na ɔkaa Jesus nko nye ɔbaa no a ogyina finimfin no. 10Na Jesus tseen no mu na oennhu obiara dɛ ɔbaa no nko no, obisaa no dɛ, Ɔbaa, w’atoafo no wɔ hen? Ana obi emmbu wo fɔ? 11Ɔsee no dɛ, Mo wura, obi emmbu me fɔ. Jesus see no dɛ, Mo so mummbu wo fɔ: kɔ na mma nnkɛyɛ bɔn bio.]
Jesus Wiadze Kan no
12 #
Mat 5.14; Joh 9.5 Na Jesus kasaa kyerɛɛ hɔn bio dɛ, Emi nye wiadze kan no: nyia odzi m’ekyir no rennantsew sum mu da, na obenya nkwa kan no. 13#Joh 5.31 Farisiifo no see no dɛ, Ɔwo dze, idzi wankasa woho dase: wo dasee nnyɛ nokwar. 14Jesus buae see hɔn dɛ, Sɛ midzi mankasa moho dase mpo a, me dasee yɛ nokwar, osiandɛ minyim mbrɛ mifi bae na mbrɛ morokɔ; naaso hom dze, hom nnyim mbrɛ mifi bae anaa mbrɛ morokɔ. 15Hom dze, hom bu honam enyi atsɛn, na emi dze, mummbu obi atsɛn. 16Na sɛ mubu atsɛn mpo a, nkyɛ m’atsɛmbu yɛ nokwar, osiandɛ nnyɛ mo nko na mowɔ hɔ, na emi nye Egya no a ɔsomaa me no. 17#Deut 19.15 Na wɔakyerɛw wɔ hom mbra no mu so dɛ nyimpa beenu hɔn dasee yɛ nokwar. 18Midzi mankasa moho dase, na Egya no a ɔsomaa me no so dzi me dase. 19Na wobisaa no dɛ, Hen na w’Egya wɔ? Jesus buaa dɛ, Hom nnyim me, eso hom nnyim m’Egya; sɛ hom nyim me a, nkyɛ hom nyim m’Egya so dɛmara. 20Ɔrekyerɛkyerɛ wɔ asɔrfi no mu sikakorabea hɔ no nna ɔkaa nsɛm yi; naaso obi ammfa ne nsa ennsuo no mu, osiandɛ nna ne mber nnyae nndurii.
Hom Nnkotum Aba Mbrɛ Morokɔ
21Jesus see hɔn bio dɛ, Morokɔ, na hom bɔhwehwɛ me, na hom bowu wɔ hom bɔn mu: mbrɛ morokɔ no, hom nnkotum aba hɔ. 22Na Jewfo no see no dɛ, Oribedzi noho ewu anaa, na ɔse, Mbrɛ morokɔ no, hom runntum mmba hɔ yi? 23Na ɔsee hɔn dɛ, Hom dze, hom fi famu dze mu; na emi dze, mifi ɔsor dze mu; hom dze, hom fi wiadze yi mu; emi dze, mimmfi wiadze yi mu. 24Dɛm ntsi mese hom dɛ hom bowu wɔ hom bɔn mu: sɛ hom nngye nndzi dɛ emi nye ɔno a, hom bowu wɔ hom bɔn mu. 25Nna wobisaa no dɛ, Woana nye wo? Jesus see hɔn dɛ, Dza mifi ahyɛse maka akyerɛ hom no ara a. 26Na mowɔ hom ho nsɛm pii a meka na mubu hom atsɛn; na nyia ɔsomaa me no yɛ nokwafo, na dza matse wɔ no hɔ na meka kyerɛ wiadze. 27Wɔanntse ase dɛ Egya no ho asɛm na ɔreka kyerɛ hɔn no. 28Na Jesus see hɔn dɛ, Sɛ hom nya ma nyimpa Ba no do a, nna hom bohu dɛ emi nye no, na dɛ mennhyɛ mankasa moho nnyɛ biribi, na dɛ mbrɛ Egya no kyerɛkyerɛ me no, dɛmara na meka yi. 29Na nyia ɔsomaa me no nye me tse: onngyaa mo nko, osiandɛ meyɛ dza ɔsɔ n’enyi daa. 30Na ɔreka dɛm nsɛm no, dodowara gyee no dzii.
Nokwar no Bɛyɛ Hom Adehye
31Na Jesus kaa kyerɛɛ Jewfo a wɔgyee no dzii no dɛ, Sɛ hom tsena m’asɛm mu a, nna hom yɛ m’esuafo ampa; 32na hom bohu nokwar no, na nokwar no bɛyɛ hom adehye. 33Wobuaa no dɛ, Yɛyɛ Abraham asefo, yɛnnyɛɛ obi nkowaa da: ɔyɛ dɛn na ese dɛ, Hom bɛyɛ adehye yi? 34Jesus buaa hɔn dɛ, Meka kyerɛ hom wɔ nokwar mu dɛ, obiara a ɔyɛ bɔn no, ɔyɛ bɔn n’akowaa; 35na akowaa nnka fie daa, na ɔba dze, ɔtsena hɔ daa. 36Dɛm ntsi sɛ Ɔba no yɛ hom adehye a, hom bɛyɛ adehye ampa. 37Minyim dɛ hom yɛ Abraham n’asefo, naaso hom rohwehwɛ me eku me, osiandɛ m’asɛm wura hom mu a ɔnnyɛ yie. 38Dza mehu wɔ m’Egya nkyɛn na meka na hom so hom yɛ dza hom atse wɔ hom egya nkyɛn. 39Wobuaa no dɛ, Hɛn egya nye Abraham. Jesus see hɔn dɛ, Sɛ hom yɛ Abraham mba a, nkyɛ hom bɛyɛ Abraham ndwuma; 40na afei dze, hom rohwehwɛ me eku me, nyimpa a maka nokwar a metsee no Nyankopɔn nkyɛn akyerɛ hom: iyi dze, Abraham annyɛ bi. 41Hom yɛ hom egya ndwuma. Wɔsee no dɛ, Nnyɛ ndwamanyɛ mu na wɔwoo hɛn: egya kor na yɛwɔ, ɔno nye Nyankopɔn. 42Jesus see hɔn dɛ, Sɛ hom egya nye Nyankopɔn a, nkyɛ hom bɔdɔ me, osiandɛ mifi Nyankopɔn mu na maba; eso mannhyɛ moho na mebae, na ɔno na ɔsomaa me. 43Ebɛnadze ntsi na hom nntse me kasaa ase? Osiandɛ hom nntum nntsie m’asɛm. 44Hom fi hom egya abɔnsam no mu, na hom egya n’akɔndɔdze na hom pɛ dɛ hom yɛ. Ɔno na ɔyɛ owudzifo fitsi ahyɛse no, na ɔnntsena nokwar mu, osiandɛ nokwar no nnyi no mu. Sɛ ɔka atorsɛm a, ofi nankasa n’adze mu na ɔka, osiandɛ ɔyɛ ɔtorfo nye atorsɛm n’egya. 45Na emi dze, meka nokwar no ntsi, hom nngye me nndzi. 46Hom mu woana na obu me bɔn ho fɔ? Sɛ meka nokwar a, ɔyɛ dɛn na hom nngye me nndzi? 47Nyia ofi Nyankopɔn mu no, otsie Nyankopɔn nsɛm: iyi ntsi na hom nntsie, osiandɛ hom mmfi Nyankopɔn mu. 48Na Jewfo no buaa no dɛ, Ɛhɛɛ, nnyɛ nokwar no ara na yɛkae dɛ eyɛ Samarianyi na ewɔ abɔnsam no? 49Jesus buaa dɛ, Minnyi abɔnsam, na midzi m’Egya nyi, na hom dze, hom nndzi me nyi. 50Na emi dze monnhwehwɛ mankasa m’enyimnyam, na obi wɔ hɔ a ɔhwehwɛ na obu atsɛn. 51Mereka akyerɛ hom wɔ nokwar mu dɛ, sɛ obi dzi m’asɛm do a, orunnhu wu ara da. 52Na Jewfo no see no dɛ, Afei na yeenya ehu dɛ ewɔ abɔnsam. Abraham nye nkɔnhyɛfo no wui, na ɔwo dze ese dɛ, Sɛ obi dzi m’asɛm do a, ɔronnsɔ owu nnhwɛ da. 53Ana ɔwo eso kyɛn hɛn egya Abraham a owui no? Na sɛ nkɔnhyɛfo no so wui a, na ɔwo ihu woho dɛn nye yi? 54Jesus buaa dɛ, Sɛ mehyɛ moho enyimnyam a, m’enyimnyam nnyɛ hwee: m’Egya na ɔhyɛ me enyimnyam, ɔno a hom ka dɛ ɔyɛ hom Nyankopɔn no a; 55naaso hom nnyim no; na emi dze, minyim no; na sɛ meka dɛ minnyim no mpo a, mebɛyɛ ɔtorfo dɛ hom ara; na minyim no na midzi n’asɛm do. 56Hom egya Abraham dzii dɛw dɛ obohu me da; na ohunii, na n’enyi gyee. 57Na Jewfo no see no dɛ, Innyae nndzii mfe eduonum mpo, na isii dɛn hun Abraham? 58Jesus see hɔn dɛ, Meka no nokwar mu kyerɛ hom dɛ, ansaana Abraham rebɛba no, nna mowɔ hɔ. 59Nna wɔtasee abo dɛ nkyɛ wɔrobɔtow abɔ no; na Jesus huntsaa noho na ofiir edzi fii asɔrfi no mu.
Currently Selected:
John 8: MFANBRP
Označeno
Share
Copy
Want to have your highlights saved across all your devices? Sign up or sign in
Mfantse Bible © Bible Society of Ghana, 2011.