John 10
10
Nguambuw ho Bɛ
1 Mereka akyerɛ hom wɔ nokwar mu dɛ, Nyia onndua abowano nnkɔ nguambuw no mu, na ɔfow fa beebi no, ɔyɛ owifo nye odwotwafo; 2na nyia odua abowano kɔ mu no nye nguan no hwɛfo. 3Ɔno na abowanohwɛfo no bue ma no, na nguan no tse ne ndze, na ɔbɔ nankasa no nguan dzin frɛ hɔn, na ɔdze hɔn pue. 4Na sɛ ɔdze nankasa no nguan nyina pue a, odzi hɔn enyim, na nguan no dzi n’ekyir, osiandɛ wonyim ne ndze. 5Na ɔnana dze, worinndzi n’ekyir, na woboguan efi ne nkyɛn, osiandɛ wonnyim anana ndze. 6Abɛbusɛm yi na Jesus kaa kyerɛɛ hɔn, na hɔn dze, woennhu asɛm kor a Jesus reka kyerɛ hɔn no.
Jesus, Oguanhwɛfo Pa no
7Dɛm ntsi Jesus see hɔn bio dɛ, Mereka no nokwar mu akyerɛ hom dɛ, emi nye nguan no abow no. 8Hɔn a wodzii me kan bae no nyina yɛ ewifo nye edwotwafo; naaso nguan no enntsie hɔn. 9Emi nye abow no; emi na sɛ obiara nam mo do kɔ mu a, wɔbɛgye no nkwa, na ɔbɔkɔ mu bopue, na obenya edzidzibea. 10Owifo no mmba gyedɛ orubowia, na oeku, na ɔasɛɛ; emi dze, mebae ma woeenya nkwa, na woeenya no mbordo. 11Emi nye oguanhwɛfo pa no: oguanhwɛfo pa no dze no nkwa to hɔ ma nguan no. 12Naaso ɔpaanyi no a ɔnnyɛ oguanhwɛfo a nguan no yɛ nankasa nedze no, ohu dɛ pataku reba a, ogya nguan no hɔ na oguan; na pataku no ba bɔtotɔr hɔn na ɔbɔ hɔn petse. 13Ɔpaanyi guan, osiandɛ ɔyɛ ɔpaanyi na ɔnndwen nguan no ho. 14Emi nye oguanhwɛfo pa no: minyim medze, na medze nyim me, 15dɛ mbrɛ Egya no nyim me na emi so minyim Egya no. Na medze mo nkwa to hɔ ma nguan no. 16Na mowɔ nguan bi so a wommfi ban yi mu; hɔn so otwar dɛ medze hɔn meba, na wobetsie me ndze, na wɔaayɛ kuw kor nye oguanhwɛfo kor. 17Dɛm ntsi na Egya no dɔ me, osiandɛ medze mo nkwa to hɔ na maafa no bio. 18Obi nngye no me nsamu; na mbom mankasa na medze to hɔ: mowɔ tum dɛ medze to hɔ, na mowɔ tum dɛ mefa no bio. Ahyɛdze yi na minyaa no m’Egya hɔ.
19Na mpaapaamu bi baa Jewfo no mu bio wɔ asɛm yi ntsi. 20Na hɔn mu pii see dɛ, Ɔwɔ abɔnsam, na ɔabɔ dam: ɔyɛ dɛn na hom ritsie no? 21Binom see dɛ, Iyi nnyɛ nyia ɔwɔ abɔnsam ne nsɛm a. Aso abɔnsam botum ebue onyifuranyi enyiwa anaa?
Jewfo Poow Jesus
22Nna asɔrfi ne ntsewho afahyɛ no edu wɔ Jerusalɛm: na awɔwber so aba. 23Nna Jesus nenam asɔrfi no mu wɔ Solomon abrandaa no mu. 24Na Jewfo no botwae hyiaa no, na wɔsee no dɛ, Ebɛma hɛn enyi ada kwan ekesi dabɛn bio? Sɛ ɔwo nye Kraest no a, ka kyerɛ hɛn pefee. 25Jesus buaa hɔn dɛ, Maka akyerɛ hom, na hom nngye nndzi; ndwuma a menam m’Egya ne dzin do meyɛ no, ɔnoara na odzi me dase. 26Na hom dze, hom nngye me nndzi, osiandɛ hom mmfi mo nguan mu. 27Mo nguan tsie me ndze, na minyim hɔn, na wodzi m’ekyir: 28na mema hɔn onnyiewiei nkwa, na wɔrennhera da, eso obi runnhwim hɔn wɔ me nsamu. 29M’Egya a ɔdze hɔn ama me no, ɔyɛ kɛse kyɛn adze nyina na obi nnkotum ehwim hɔn m’Egya ne nsamu. 30Emi nye Egya no yɛ kor. 31Jewfo no faa abo bio dɛ wɔdze besiw no. 32Jesus buaa hɔn dɛ, Ndwuma pa pii na mifi m’Egya nkyɛn dze akyerɛ hom: ndwuma yi mu dza ɔwɔ hen ntsi na hom ribesiw me abo yi? 33Jewfo no buaa dɛ, Nnyɛ edwuma pa bi ntsi na yeribesiw wo abo, na ebususɛm ntsi a; osiandɛ ɔwo a eyɛ nyimpa yi, eyɛ woho Nyankopɔn ntsi a. 34Jesus buaa hɔn dɛ, Ana wɔnnkyerɛwee wɔ hom mbra mu dɛ, Mekaa dɛ hom yɛ enyame? 35Sɛ ɔfrɛɛ hɔn a Nyankopɔn asɛm baa hɔn hɔ no enyame a, na kyerɛwsɛm no so wonntum nnsan no, 36ana hom tum ka wɔ nyia Egya no etu no esi hɔ na ɔasoma no wiadze no ho dɛ, Eka ebususɛm; osiandɛ mekaa dɛ, Emi nye Nyankopɔn Ba ntsi? 37Sɛ mennyɛ m’Egya ndwuma a, mma hom nngye me nndzi; 38na sɛ meyɛ a, kaansa hom nngye emi ara nndzi mpo a, hom ngye ndwuma no ndzi, ama hom aatse ase na hom eehu dɛ Egya no wɔ mo mu na mo so mowɔ no mu. 39Na wɔhwehwɛɛ bio dɛ wɔkyer no, na ofii hɔn nsamu kɔree.
40Na osii mu kɔr Jordan egya noho bio, mbrɛ nkan no nna John runuma no; na ɔkɛtsenaa hɔ. 41Na dodowara baa ne nkyɛn, na wɔsee dɛ, John dze, ɔannyɛ asɛnkyerɛdze biara: na dza John kae wɔ oyi ho nyina yɛ nokwar. 42Na dodowara gyee no dzii wɔ hɔ.
Currently Selected:
John 10: MFANBRP
Označeno
Share
Copy
Want to have your highlights saved across all your devices? Sign up or sign in
Mfantse Bible © Bible Society of Ghana, 2011.