Tekang Kbuten 21
21
Ksut Isak
1Ne deng nmò Dwata yóm deng fasaden ke Sara 2ne mlutut ne mngà logi bè yóm tey deng ktuha Abraham. Sut yóm ngaen logi yó bè yóm deng tehe buteng Dwata du. 3Yó boluy Abraham du yóm ngaen, Isak. 4Tikóng deng wolu buteng Isak sut, omin Abraham tmulì du, hol lómón yóm deng hlolò Dwata du. 5Deng lematu ne halay Abraham bè yóm ksut Isak.
6Yó mon Sara, “Deng hefligal Dwata ou ne deng hkulihen ou. Yóm kdê tau mungol du nim ni angat le mung hligal kmuli béléu.” 7Ne yó bud monen, “Bè yóm gnan kdaw, laen kô dù tau tô mon du mò ke Abraham angat htutù ngà yóm tuha libunem. Okóm ni deng wen ngau béléen balù yóm tey deng ktuhahen.”
8Ngangen ne lemnok yóm ngà yó. Tikóng skó tmutù botong mò ken bong Abraham.
Kehdó le kul le Hagar ne Ismaél
9Okóm bè yóm sotu kdaw, lemwót Ismaél yóm ngà Abraham bè Hagar, yóm libun Idyip heseken, nodoyen Isak yóm kun ngà Sara. 10Ton Sara yóm nmò Ismaél yó, yó gónón mon du mò ke Abraham, “Hdóhem bè ni yóm libun hesek ni lewu le ngaen. Là kóen hyu bè yóm ngà hesek ke angat gbót gemfun bè yóm kun nfun Isak yóm dou ngà.”
11Bè yóm kungol Abraham du yóm mon Sara yó, tey sbeweg kehedemen du, abay se hol kun ngà snéen yóm Ismaél. 12Okóm yó mon Dwata mò ke Abraham, “Béem hesbeweg kehedemem du yóm ngaem logi yó ne yóm hesekem Hagar. Tódô loloem yóm mon Sara mò kóm abay se angat mlan bè Isak yó kem ból deng fasadu kóm. 13Senged snéen yóm kun ngà yóm libun hesek, angat tey kehbólu du ne yó kem bólen yó angat le baling sotu but tau se kul. Yakà ngaem du se kun.”
14Hlafus hayahen bè yó, hewót Abraham Hagar lewu le yóm ngaen. Wen ken hebnotuhen du ne hesléhen du yóm sning kulit ógóf hnok él. Ngang le mógów efet le tódô tabag tmimbul lem yóm benwu là hyu menwu du boluyen Birsiba. 15Timbow deng gotu yóm él nwit Hagar, tódô tebelen yóm ngaen laan yóm ngà koyu lefungu 16ne myón hlayuk wen dô lematu mitru klayuken. Yó hendemen, “Là kô gbeku du ke tonu katay yóm ngau.” Tey sidek kkiken bè yóm igoen myón bè yó.
17Ne bud mkik se kun yóm ngaen ne gungol Dwata. Ne wen hógów Dwata mudél ebè Hagar gu bè longit, monen, “Ó Hagar, moen de ke sbeweg kehedemem? Béi hlikò. Deng gungol Dwata yóm kkik ngaem. 18Mdai dé, nam e bentik yóm ngà, henyuhem stulón du. Angat tey kehbólu kul yó kem semfu gu béléen, ne baling le sotu but tau alì mbegel se kul.”
19Ominen wen kokol hton Dwata ke Hagar ne tódô mógów edu nan e sulu yóm sning kulit ógóf nwiten. Ominen yó hinum yóm ngaen. 20Bè yóm deng kenok Ismaél, eles tendo nô béléen Dwata. Tódô nô bè yóm benwu laen hol wen tauhen boluyen Paran. Hlós baling tau alì hulung mogot boho ne gemtì. 21Ngangen ne efet hyehen yéen bè yóm sotu ngà libun Idyip.
Yóm kesfasad le Abraham Abimélék
22Bè yóm kdaw yó, lemwót Abimélék yóm tau mogot bè Girar, mógów ebè Abraham, mung du yóm kmandér bè yó kem sendaluen boluyen Fikol. Yó mon Abimélék mò ke Abraham, “Ó Abraham, tódô dilô me yóm tendo knóen béléem Dwata bè ket yó kem gel nmoem. 23Yó nógów me ebéléem ni, hyu ke smafai bélê me bè ni bè solu Dwata. Hol safaem dou yóm là ksukatem dou dalang se yó kem ngau ne yó kem angat bólu. Duhen ni, bè yóm knóem lem blóng me, tey gel kfihu kóm. Dalang se kóm, smafai béléu bè yóm kfihem dou dalang se nim benwuhu gónóm nô ni.”
24Mon Abraham se, “El. Smafae béléem.” 25Omin Abraham kmamo du bè Abimélék yóm deng kled kem tau semgyok ógóf Abimélék du yóm sotu kokol deng hokolen yó kem tau tóbóng lówóhen.
26Yó balà Abimélék du, monen, “Là tngónu du ke tau du mò du yóm yó. Moem là géhél tmulón du dou du? Ni he ketngónu du.” 27Ominen yó, wen kem ubiha ne kem safì blay Abraham ke Abimélék, mò hemblat du yóm deng kesfasad le. 28Ne bud wen hitu kem ngà ubiha htólóng Abraham bè yó kem ubihahen 29ne snólók Abimélék, monen, “Tedu muhem du yóm yó?”
30Bnalà Abraham se, monen, “Yó se mò blayu kóm ne hol henmóyóem mò gónóm temngón du ou deng hokol du nim kokol monu mò kóm ni.” 31Tahu se, henmóyô Abimélék. Ne yó boluy le du yóm benwu yó, Birsiba,#21:31 Yó lanen bè udél Hibru yóm boluy Birsiba, “kokol safà.” abay se bè yó gónó le ssafà yóm lewu le. 32Timbow deng yóm kesfasad le bè yó bè Birsiba, omin le Abimélék ne Fikol mulék ebè yóm sana kul benwu bè Flistin. 33Ominen wen sotu koyu boluyen tamaris hulu Abraham bè yó bè Birsiba ne tmaba ebè Dwata bè yó, yóm Dwata laen dù tul sónen. 34Ne tey kegen Abraham menwu bè yóm benwu kem Flistin.
Currently Selected:
Tekang Kbuten 21: tbl
Označeno
Share
Copy
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.