GENESIS 20
20
Abraham tuntang Abimelekh
1Abraham bindah bara Mamre akan hila salatan tanah Kanaan. Ie manetep helat Kades dengan Sur. Dia tahi limbah te, metoh ie melai hong Gerar, 2#Gen. 12:13, 26:7 ie mansanan je Sarah, sawae te, jete andie. Tagal te raja Abimelekh bara Gerar manyoho oloh mimbit Sarah akae. 3Balalu hamalem Hatalla mamparahan arepe akan raja te hong nupi, tuntang hamauh, “Ikau akan matei, tagal jari manduan oloh bawi te; awi ie sawan oloh.”
4Tapi Abimelekh hindai aton manigong Sarah. Palus koan raja te, “Tuhan aku dia mawi kasalan! En Tuhan handak mambinasa aku tuntang bangsa ayungku?” 5Abraham kabuat mansanan je oloh bawi te andie, tuntang oloh bawi te hamauh kalote kea. Aku jari malalus hal te hapan atei je barasih. Jadi aku dia mawi taloh sala.
6Hatalla tombah hong nupi te, “Toto, aku katawan je ikau malaluse hapan atei je barasih. Tagal te aku jari mangahana ikau mawi dosa intu taharep-Ku. Aku dia kea malalua ikau mimbing oloh bawi te. 7Tapi toh lian ie akan banae. Banae te ije biti nabi, tuntang ie handak balaku doa akam mangat ikau dia matei. Tapi amon ikau dia maliae, ingat, ikau tuntang salepah rayatm akan matei!”
8Andau jewue, hanjewu, Abimelekh mantehau kakare oloh ayue tuntang mansanan akan ewen samandiai hal te. Ewen paham mikeh. 9Limbah te Abimelekh mantehau Abraham tuntang misek Abraham, “Narai je jari awim dengan ikei? Narai kasalangku dengam, sampai ikau mampalembut calaka toh mawi aku tuntang karajaangku? Toto dia patut ikau mawi taloh je kilau te dengangku, 10mbuhen ikau kalote?”
11Tombah Abraham, “Inyangkaku intu hetoh jaton oloh je mikeh dengan Hatalla, sampai aku kareh impatei awi oloh je nahuang dengan sawangku.
12Tinai je ie te puna betauku. Ikei ije bapa, tapi hakabeken indu, tuntang kajariae ikei kawin. 13Maka metoh Hatalla manyoho aku malihi human bapaku tuntang manamuei akan kare lewu beken, aku hamauh dengan sawangku, ‘Parahan kaketepm dengangku awim mansanan akan genep oloh je hasupa dengam je aku toh kakam.’ ”
14Limbah te Abimelekh malian Sarah akan Abraham. Hayak te ie manenga akae kare jipen, kare tabiri tuntang sapi. 15Koan raja te dengan Abraham, “Toh ie ampin kare petak danumku; keleh melai hetoh hong kueh ikau rajin.” 16Palus koae dengan Sarah, “Kakam jari inengaku sakoyan duit perak kilau tanda akan oloh handiai je ikau toto dia mawi taloh sala.”
17-18 Tuhan jari mawi kakare oloh bawi hong istana Abimelekh te tamanang, tagal gawie dengan Sarah, sawan Abraham te, palus Abraham balakudoa intu Hatalla, tuntang Hatalla mampakeleh Abimelekh, sawae tuntang kare jipee je bawi. Kakare oloh bawi te tau manak tinai.
Currently Selected:
GENESIS 20: NIJ
Označeno
Share
Copy
Want to have your highlights saved across all your devices? Sign up or sign in