GENESIS 11
11
Candi Babel
1Solake, kare bangsa hong hapus kalunen mahapan basa ije bewei. Ewen mahapan bawak kotak je sama. 2Metoh ewen manamuei akan hila timor, ewen sampai hong ije janah intu Babilonia. Ewen palus melai hete. 3Ewen hamauh sama arepe, “Keleh itah manampa batu bata tuntang mamapuie sampai batekang.” Kalote ewen mawi batu bata akan batun huma tuntang tér akan dampul hapa mampalekete. 4Koan ewen, “Keleh itah mampendeng lewu dengan ije candi je tahunyoke sampai langit, te itah kareh basewut tuntang dia kasaburan akan hapus kalunen.”
5Maka Tuhan mohon handak manampayah lewu tuntang candi je impendeng olon. 6Balalu ie hamauh, “Ewen toh ije bangsa tuntang mahapan ije basa. Jetoh harue tamparan kare gawin ewen. Dia tahi tinai ewen olih malalus en bewei je ingahandak ewen. 7Keleh itah mohon tuntang mampakahut basan ewen mangat ewen dia tau sama sinde harati auh kolae.” 8Kalote Tuhan manaburan ewen akan hapus kalunen. Palus ewen terai mampendeng lewu te. 9Awi te lewu te inggare Babel (kakahut), #11:9: Babel: huang basa Ibrani kotak toh sama auhe kilau kotak je rimae “hewoi-habureh.” awi intu hete Tuhan mampakahut basan kare bangsa. Bara hete ewen inaburan awi Tuhan akan hapus kalunen.
Turonan Sem
(1 Kro. 1:24-27)
10Jetoh turonan Sem, due nyelo limbah danum soho, metoh Sem 100 nyelo umure, ie mandino anak hatue, arae Arpaksad. 11Limbah te ie magon belom 500 nyelo tinai. Ie mandino kare anak je beken.
12Metoh Arpaksad 35 nyelo umure, ie mandino anak hatue, arae Selah. 13Limbah te Arpaksad magon belom 403 nyelo tinai. Ie mandino kare anak je beken.
14Metoh Selah 30 nyelo umure, ie mandino anak hatue, arae Eber. 15Limbah te Selah magon belom 403 tinai. Ie mandino kare anak je beken.
16Metoh Eber 34 nyelo umure, ie mandino anak hatue arae Peleg. 17Limbah te Eber magon belom 430 nyelo tinai. Ie mandino kare anak je beken.
18Metoh Peleg 30 nyelo umure, ie mandino anak hatue, arae Rehu. 19Limbah te Peleg magon belom 209 nyelo tinai. Ie mandino kare anak je beken.
20Metoh Rehu 32 nyelo umure, ie mandino anak hatue, arae Serug. 21Limbah te Rehu magon belom 207 nyelo tinai. Ie mandino kare anak je beken.
22Metoh Serug 30 nyelo umure, ie mandino anak hatue, arae Nahor. 23Limbah te ie magon belom 200 nyelo tinai. Ie mandino kare anak je beken.
24Metoh Nahor 29 nyelo umure, ie mandino anak hatue, arae Terah. 25Limbah te Nahor magon belom 119 nyelo tinai. Ie mandino kare anak je beken tinai
26Limbah umur Terah 70 nyelo, ie mandino telo anak hatue, iete Abram, Nahor tuntang Haran.
Turonan Terah
27Jetoh turonan Terah: Terah bapa Abram, Nahor tuntang Haran. Haran mandino anak hatue, arae Lot. 28Haran matei hong kampung ekae inakan, iete Ur hong Babilonia. Metoh te bapae magon belom. 29Abram kawin dengan Sarai, tuntang Nahor kawin dengan Milka je anak Haran. Haran aton tinai anake hatue je beken arae Yiska. 30Sarai te tamanang.
31Terah malihi lewu Ur hong Babilonia haya-hayak dengan Abram anake, esoe Lot, tuntang manantue Sarai, iete sawan Abram. Ie handak haguet akan lewu Kanaan. Tapi sana sampai hong Haran, ewen melai hete. 32Tuntang hong hete kea Terah matei hong umur 205 nyelo.
Currently Selected:
GENESIS 11: NIJ
Označeno
Share
Copy
Want to have your highlights saved across all your devices? Sign up or sign in