Pewaliana 14
14
Hi Abara mamperorui hi Lot
1I tempona hi Abara meꞌohaꞌ dodungku Hebron, uwaꞌ iba duo datu to makuasaꞌ, iomo:
hi Amarapele datu i Sinereꞌ,
hi Ario datu i Elasaꞌ,
hi Kedorlaome datu i Elam,
hei hi Tidela datu i Gosi.
2Iba datu tiꞌo mohaꞌanu moꞌewa limo datu, iomo:
hi Bera datuna toSodomo,
hi Birisa datu i Gomora,
hi Sinab datu i Adma,
hi Simebeꞌ datu i Seboim,
hei haduo datu ka Bela, biasa woꞌo nitiꞌi Soar.
3-4Hampuluꞌ merontoꞌa komoruene, limo datu tiꞌo noparenta iomo datu Kedorlaome. Angkana i kohampuluꞌ tolu ntoꞌana, kalimo datu tiꞌo morampuhi i ngamba Sidim, to nitiꞌi woꞌo Tahiꞌ Mahi, alaꞌ iohi hingkiꞌ moꞌewa datu Kedorlaome. 5I toꞌa kohampuluꞌ iba, datu Kedorlaome hei datu ntaniꞌna morampuhi moꞌewa limo datu tiꞌo. Iohi moꞌewa roboꞌ-roboꞌ ngkodeꞌ ntaniꞌna. Kaꞌisaꞌ-isa iohi monani toRepai i Asitero-Karanai, toSusi i Ham, toEmim i Siawe-Kiritai. 6Uko tiꞌo iohi woꞌo modapaꞌ toaꞌ toHori to meꞌohaꞌ i biri Edom to nitiꞌi woꞌo Seir wute pe El-Paran, i popada woꞌoni. 7Uko tiꞌo datu Kedorlaome hante datu-datu to morampu hante io mahuliꞌ pe En-Mispat, to hinewowoꞌena nikokeneꞌi Kades. Iohi woꞌo penani hei morompoꞌi lekiꞌna woiꞌ Amale hei toAmori to meꞌohaꞌ i Haseso-Tamar. 8-9Ikopenanira i poponiꞌara tiꞌo, Kedorlaome hei datu to moꞌawa io nolouhi moponiꞌ moꞌewa limo datu iomo datu ka Sodomo, Gomora, Adma, Seboim hante Bela to morampu mampohaꞌanu i ngamba Sidim. Hatoꞌomola limo datu moꞌewa iba datu ntaniꞌna. 10I ngamba Sidimi tiꞌo i umbo-umbo uwaꞌ bubu taru. I tempona datu Sodomo hei datu Gomora mehilai iohi monawuꞌ pe lali bubu-bubu aspal tiꞌo, angkana tolu duo datu to salamaꞌ mehilaihi pe biri-birina. 11Hi Kedorlaome hei datu to moꞌawa io penani i poponiꞌara tiꞌo, honiꞌi iohi molai hei morompoꞌi lekiꞌna luma i Sodomo hei Gomora, noniuꞌ woꞌo kopongkona. 12Iohi motawaniꞌhi woꞌo hi Lot pinoꞌanaꞌna hi Abara, hei mamperompoꞌi lumana, alaꞌ io meꞌohaꞌ woꞌo i Sodomo, katoꞌo molaimohi. 13Katoꞌo mehupaꞌ haduo to mehilai hei mampololita hieꞌe pe hi Abara, toIbarani tiꞌo, to uwaꞌ meꞌohaꞌ dodungku nunuꞌ hanura toMamre, toaꞌ toAmori tiꞌo, halalina hi Eskol hante hi Anereꞌ, iomo bole-bolene hi Abara mohaꞌanu. 14Ikonohorinalu hi Abara, pinoꞌanaꞌne nihuku hei niwuni, katoꞌo norumbaꞌhi lekiꞌne toaꞌ-toaꞌna to hingkaꞌ pobahaꞌ hei maroho, iomo iohi to nipoꞌanaꞌki i tambina, 318 duo toaꞌ koworiꞌne, katoꞌo akohi modapaꞌ poniꞌra wute pe Daneꞌ. 15Hei i tempona wini nodolaꞌ-dolaꞌmohi hawiꞌne, hei akohi moꞌewa poniꞌra, penanihi hei rodapaꞌ poniꞌre wute pe Hobaꞌ i hambalina Damasi. 16Hi Burahima mangkomi mahuliꞌ hinangkana lumana to noperompoꞌi poniꞌra. Hi Lot pinoꞌanaꞌna nokomimo woꞌo mahuliꞌ moꞌawa-awa hante towoweꞌe-towoweꞌe hante toaꞌ ntaniꞌna to nitawani.
Pohidupaꞌna hi Abara hante hi Mekisedeꞌ
17Ikopahuliꞌnamo hi Abara ka poponiꞌa monani hi Kedolaomer hante datu to moꞌawa-awa hante io, katoꞌo noloumo datu toSodomo mampohidupaꞌkiꞌi i ngamba Siawe, iomo ngamba Datu. 18Hi Mekisedeꞌ, Datu i Salem, mangkomi depa hei anggoroꞌ, io haduo tadulako mpenomba pe Pueꞌ Ala to i womboꞌ kuasaꞌNa. 19Katoꞌo io mobarakati hi Abara notiꞌi, “Hinamo Pueꞌ Ala to i Tanti, to mowali laniꞌ hante woiꞌ mobarakati hi Abara, 20hei tepokodeꞌmo Pueꞌ Ala to i Tanti, to mampꞌaniko kopenani ka poniꞌmu.” Katoꞌo hi Abara mampepaꞌaniki pe io hadolaꞌa isaꞌ ka to hampuluꞌ. 21Mololitamo datu toSodomo tiꞌo pe hi Abara, “Luma iroamolu angkana toaꞌkuhi tiꞌo ipaꞌanikiꞌa mahuliꞌ.” 22Angkana notiꞌi hi Abara pe datu i woiꞌ peꞌohaꞌa Sodomo tiꞌo, “Aku mosumpaꞌa pe Pueꞌ, Pueꞌ Ala to i Tanti, to mowali laniꞌ hante woiꞌ, 23aku hawaꞌa hingkiꞌ moroa hapo-hapo ka lumamu tiꞌo, hamokuꞌ lori ba pohiluꞌ sapatuꞌ hawaꞌi, hingkeꞌna ingko hawaꞌko mololita, ‘Akumo to mampopewali hi Abara mewali sugiꞌ.’ 24Ane aku, hawaꞌa mpuꞌu moroa hapo-hapo! Sangadina to roꞌokamo toaꞌ-toaꞌkuhi hieꞌe hante toaꞌ to nolou moꞌawa-awa hante aku, iomo hi Anereꞌ, hi Eskol hei hi Mamre, hinamo iohi tiꞌo moroahi dolaꞌra hori-hori.”
Currently Selected:
Pewaliana 14: LAILJE
Označeno
Share
Copy
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)