मत्ती 3
3
बपतिस्मा देणे औल़े यूहन्ने रा काम्म
(मरकुस 1:1-8; लूका 3:18; यूहन्ना 1:6-8,15-34)
1तिन्हें दिनें यूहन्ना बपतिस्मा देणे औल़ा आईने यहूदिया रे सुनसान जगह च ये प्रचार करने लगया : 2“अपणे पापां ते मन फिरावा, काँह्भई परमेशरा रा राज नेड़े आईगरा।” 3ये यूहन्ना सैई हाया तिसरे बारे च जे यशायाह भविष्यवक्ते चर्चा करदे हुये गलाया था :
“सुनसान जगह च इक हाक पाणे औल़े री अवाज़ हुई कराँ इ,
भई परमेशरा रे औणे खातर
अपणे आप जो त्यार करा।”
4यूहन्ना ऊँटा रे बाल़ां रे कपड़े पैहनां था, कने अपणे लक्का पर चमड़े री पेट्टी बन्ही रखां था। टिट्टे कने जंगली शैहत तिसरा खाणा था। 5तिस बगत यरूशलेम नगरा रे कने सारे यहूदिया प्रदेशा रे, कने यरदन रे आसे-पासे रे सारे इलाके रे लोक तिसले आईने कट्ठे हुईगे। 6कने अपणे-अपणे पापां जो मन्नी लेणे ते बाद यूहन्ने तिन्हांजो यरदन नदिया च बपतिस्मा दित्या।
7ताहली जे तिने बौहत सारे फरीसियां कने सदूकियां जो बपतिस्मा लेणे खातर अप्पूँ ले औंदे देख्या, तां यूहन्ने तिन्हाजो गलाया, “जहरीले सर्पा साई बुरे लोको, हऊँ तुहांजो खबरदार कराँ भई हरेक सै जे पाप कराँ तिसजो परमेशरा इक दिन सजा देणी, कने ये नीं सोच्चा भई तुहां इसा सजा ते बची जाणा। 8जे तू सही माईने च अपणे पापां ते मन फिराया राँ, तां अपणे भल़यां कम्मां ते तिसजो दस्स; 9इसा गल़तफैहमिया च मत रौआ भई अब्राहम तुहांरा पिता; काँह्भई हऊँ तुहांजो बोलां भई इन्हां पत्थराँ ते परमेशर अब्राहमा रे खातर बच्चा पैदा करी सक्कां। 10कने तियां जे इक माहणु अपणिया कुहाड़िया ने सै डाल़ जे बुरा फल़ ल्यावां तिसजो बड्डी टुक्की ने अग्गी च जल़ाणे जो त्यार आ, ठीक तियां इ परमेशर बी तुहौं तुहांरे पापां खातर सजा देणे जो त्यार आ।
11“हऊँ त तुहांजो तुहांरे मन बदलने खातर पाणिये ते बपतिस्मा देआं, पर तिस जे मेरते बाद प्रचार करने औणा, सै माहते जादा सामर्थी आ; कने हऊँ तिसरे मुकावले किछ बी नींआ, हऊँ इक्की सेवका रा सब्बीं ते छोट्टा काम्म तिस खातर करना चाऊँ, तां तिस बी लायक नींआ। तिस तुहांजो पवित्र आत्मा कने अग्गी ते बपतिस्मा देणा। 12यीशु तिस माहणुये साई आ तिसरे हत्था च जे छज आ, तिसने सै दाणयां जो भूआ ते लग करीने, अपणे ख्वाड़े ते साफ कित्तिरे सारे नाजा जो कट्ठा करीने पेड़ुये च भरी देआं, कने भूआ जो अग्गी च फुकी देआं, तियां इ परमेशरा धर्मी लोकां जो अधर्मियां ते लग करीने स्वर्गा जो लैई जाणा कने सै आग्ग जे कदीं नीं बुझदी अधर्मियां जो भूआ साई तिसा अग्गी च पाई देणा।”
यीशुये रा यूहन्ने ते बपतिस्मा लेणा
(मरकुस 1:9-11; लूका 3:21-22; यूहन्ना 1:31-34)
13तिस बगत यीशु गलील प्रदेशा ते यरदन नदिया रे कण्डे यूहन्ने ले तिसते बपतिस्मा लेणे आया। 14पर यूहन्ने प्रभु यीशुये जो मना करदे हुये बोल्या, “मिन्जो अप्पूँ तेरे हत्थों बपतिस्मा लेणे री लोड़ इ, कने तुहें बपतिस्मा लेणे जो मेरले आये?” 15यीशुये तिस्सो ये जबाब दित्या, “हुण तू येढ़ा इ हुणे दे, काँह्भई सै जे परमेशर चाँह तिस्सो पूरा करने खातर अहांजो येई करना ठीक आ।” फेरी यूहन्ने तिसरी गल्ल मन्नी ली। 16कने यीशु बपतिस्मा लेईने तियां जे पाणिये चते बाहर निकल़या, तिसरे खातर स्वर्ग खुलीग्या, कने तिने परमेशरा रे आत्मे जो इक कबूतरा साई उतरदे कने अपणे ऊपर औन्दे देख्या। 17कने स्वर्गा ते इक अवाज़ आई: “ये मेरा प्यारा पुत्र आ, तिसते जे हऊँ बौहत खुश आ।”
Currently Selected:
मत्ती 3: KFSNT
Označeno
Share
Copy
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.