Mbete Matiye 2
2
1-2Mbuŋna Zezu laɓ ké Beɗlehem ké tusiɓa Zude sew ké Eroɗ lak mbay ké tusiɓa-aw. Í ko. Nzuk fe konari ur ke tusiɓa a fál tí̧h seh gi ka̧h Zurusalem bale, ku vbi nzukri ɓay ɓahri : « Mbay ziɓri kú-u mbuŋ ni ké Zurusalemay wa, ke na fál suŋ le ? Nah ko gunwu̧y nunmbam ti̧h ké fál tí̧h seh sɔk na ɓay ye, mí nah gi ko ni ɓay dim ni. »
3Mbay Eroɗ ɓá lah ɓayaw bale, law ye ke law ŋgernzuk ziɓri gbam ké Zurusalem lu ɗuŋ ɗuŋ. 4Ke el mbu̧h ŋgernzuk fe puhna Ŋgerzahri ke nzuk-sɔk mbete bolkusol Ŋgerzah hi̧ gun Izarayelri, mí ke fakla sa̧wɓayu. Ke vbi niri ɓay gel mbuŋna Ŋgermbay ké mbete sɔk ra. 5-6Ku ɓahri, gel mbuŋna ye ɓay laɓ ké Beɗlehem ké tusiɓa Zude ɓayu ké gun nzak pihna Ŋgerzah vbeh lewsa̧ ɓahri : A wo Beɗlehem puh ké sakra puhri ké tusiɓa Zude, mbay tusiɓari-aw ta ɗi mu ɓa gun puh ya ɓayu ké nzuk-hɔl sami ɓay ti̧h ke ɓil wo. A ye mí ke hɔ́l sa̧w bi gun Izarayelri#2.5-6 Ɓayay na ɓil Mbete Michée 5.2..
7-8Wara mí Eroɗ ɗi nzuk fe konari si duh gel. Ke goso niri ɓay lah sa̧wseh ké gunwu̧y nunmbam ti̧h ra bale, ke poŋ niri tɔr si Beɗlehem. Ke ɓahri : « Í si wuri Beɗlehem. Í fakla ɓay gun ra, í tu te-teh. I ziŋ ni dale, í pih nzak pihna gi sɔk mi. Kaŋ le a bi kara mi si dím ni pi. »
9Ku lah bolnzak mbay ra ba, mí ku ur tɔr. Í ko. Gunwu̧y nunmbam ra el ti̧h maŋ niri mí si ta̧h ƴo síɓa ké gel nam gun ra. 10Ku ko gunwu̧y nunmbam ké ƴo ra bale, ku zo zakra zakra ke mun rihna. 11Ku rih si ɓil vulu, ku ko gun ke mah ye Mari. Ku huk siɓa pol gunu, mí ku dim ni ke lari lɔr ke rekna kpuh ké ba̧ri-u fu̧ buy buy ke sa̧wkpuh mir#2.11 Nzuk goso fe tuna a haniri ɓahri, lari lɔr sɔk ɓay riŋ ɗina mbay. Rekna kpuh ba, sɔk ɓay fe puhna nzuk fe puhna. Sa̧wkpuh mir ba, sɔk ɓay hul. Í mgba ɓay sa̧wkpuh mir tuh ke Mbete Matiye 27.34. Í mgba Mbete Siŋ (Psaumes) 72.10-11 tuh ke gel ki̧na-ay pi. . 12Ku tɔr si na nam bale, Ŋgerzah bak niri ɓil lɔlɔ ɓahri, ko-ko kú el ke ful a ta̧w Eroɗ. Mí ku mbi mahful a ɓoru ka̧h tusiɓa woyri keni.
13Ku tɔr dale, í ko, tem nzak pihna Gaŋ tul feri riw ti̧h nun Zezeɓ ɓil lɔlɔ ɓahri : « Ur síɓa. Mú fa̧h gun ra ke mah ye. Mú ɗuk ziŋ niri si tusiɓa Eziɓte. Mú kaɓ ri geŋ nam ké mi ɗí mu ɓay mú el gi, ɓayu ké Eroɗ ƴah ful ɓay i gun ra. »
14Mí Zezeɓ ur síɓa bale, ke fa̧h gun ra ke mah ye ke suŋu-aw, mí ke ɗuk ziŋ niri si tusiɓa Eziɓte#2.14 Ur ke Beɗlehem si ma Eziɓte ɗi-ɗih. Ko ya mí ku ƴo tul ful sina nam toŋndɔk seɗe ya le, nam boh.. 15Ku kaɓ ri ka̧h nam hul Mbay Eroɗ. Fe laɓna-u kal hi̧ ɓay ké gun nzak pihna Ŋgerzah vbeh lewsa̧ ra laɓ ƴo gelu. Ɓayu ɓah kandɔkay : Mi ɗi gun bi ti̧h ke Eziɓte.
16Eroɗ tu ɓahri se, nzuk fe konari mba ni ke law wara mí law ye si̧h kpereŋ. Ke el pih soze yeri si Beɗlehem ke puh a ɓoruri ké ɗoŋ ri, kú i gun wo̧rori gbam ur ke tul gunri ké mbihmbam woyri laɓ seɗe el ka̧h gun a peŋuri. Mbihmbam gunri-aw si ke sa̧wseh ti̧hna gunwu̧y nunmbam ké Eroɗ goso ɓayu ké nzak nzuk fe konari. 17Kaŋ mí sozeri laɓ fe-u. Wara mí ɓay ké Zeremi gun nzak pihna Ŋgerzah a lewsa̧ vbeh laɓ ƴo gelu. Fe vbehna-u na kandɔkay : 18kusol nzukri mgbe goɗi goɗi ké Rama ɓa rew hul gololo. Záh Rasel ƴo vuh ɓay gun yeri. Ke sa gɔlna ya ɓay fe le, gun yeri ta mba#2.18 Ɓayay na ɓil Mbete Jérémie 31.15. Í ki̧ Mbete Jérémie 40.1 pi ɓay í tu ɓay Rasel ké ɓa wu̧y Zakoɓ Izarayel a fal. Ku gɔr ni ké Beɗlehem. Ke ɓa zah kahdɔk gun Izarayelri. Rama ɓa puh kú-u mbu̧h gun Izarayelri dara nzuk Babiloŋri fa̧h niri si puh mgbal ké tusiɓa woyri..
19Eroɗ hu bale, í ko, tem nzak pihna Gaŋ tul feri riw ti̧h nun Zezeɓ ɓil lɔlɔ ké Eziɓte ɓahri : 20« Ur síɓa, mú fa̧h gun ra ke mah ye. Mú el ziŋ niri si tusiɓa gun Izarayelri. Nzukri ké ƴah ful ɓay i gun ra hu da. »
21Mí Zezeɓ ur síɓa ba, ke el fa̧h gun ra ke mah ye el ziŋ niri si tusiɓa gun Izarayelri. 22Ke gi lah ɓahri, Arselo soh bol bah ye, mí lak mbay ké tusiɓa Zude bale, hȩkme káɓ tusiɓa Zude laɓ ni. Ŋgerzah bak ni ɓil lɔlɔ, mí ke kal si tusiɓa Galile. 23Ke ka̧h puh a hani ké riŋu ɓa Nasareɗ ké tusiɓa-aw, mí ke laɓ puh ye ké ri. Kaŋ mí ɓay ké gun nzak pihna Ŋgerzahri ɓah lewsa̧ laɓ ƴo gelu. Ɓayu ɓahri, ku tú ni ɓa gun Nasareɗ.
Currently Selected:
Mbete Matiye 2: SIAFNK
Označeno
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.