Senesi 34
34
Too o Tina
1Ko Tina, le taine leia na fanaui e Lea kia Sakopo, na ano loa o fakatele ki ni taineliki o le fenua. 2Ti na tio loa kiate ia Siseme, vosa o Amole, ko le sau o le fenua. Ti na too loa e ia le taine, o momoe mo ia, ti na fakamatagafua loa e ia a ia. 3Ti na pipiki loa lona loto ki le taine o Sakopo ko Tina. Na mamana loa a ia ki le taine, ti na poto loa a ia i le masau ki lona loto. 4Ti na pati loa Siseme ki lona tamana ko Amole : Tuku mai le taine lena ke kau avaga mo ia. 5Na logo loa Sakopo kua fakamatagafua e ia lona taine ko Tina ; kae na leaise fai loa e ia se nea, talie na nofo ona vosa i faisaga mo le kau manu ; ti na talitali loa a ia ke lotou toe liliu ake.
6Na ano loa Amole, tamana o Siseme, kia Sakopo o masau kiate ia. 7Ti na toe liliu ake loa a vosa o Sakopo i faisaga, o logo ki le nea leia kua soko. Ti na mamae lasi ai a tagata ana, ti na lotou itaita veli ai, talie kua fai e Siseme se nea fakalumaluma i Iselaele, i lana momoe mo le taine o Sakopo. Talie na leaise tonu ke fai le nea lena i Iselaele. 8Kae na masau loa Amole kia latou, o pati : Kua pipiki le loto o loku vosa ko Siseme ki lokoutou taine ; koia e kau kole atu ai kia koutou ke kotou soli mai a ia ke avaga mo loku vosa. 9Ke kotou fakatasi loa mo matou : E kotou soli mai loa kia matou okoutou taineliki, ti e motou soli atu loa kia koutou omatou taineliki. 10E kotou nofo loa mo matou, ti e tuu loa le fenua o fakalogo atu kia koutou. Kotou nofo loa i le fenua, o ai mo totogi ai ni okoutou kele.
11Ti na pati loa Siseme ki le tamana mo tuagaane o Tina : Kotou fakamolemole mai kiate au, ti e kau soli atu loa kia koutou le nea leia e kotou pati mai loa ki ai. 12Kotou fakasa mai kiate au se totogi lasi, mo ni nea alofa lasi, ti e kau soli atu loa kia koutou le nea leia e kotou pati mai loa ki ai. Kae kese fua ke kotou soli mai le taine ke avaga mo au. 13Na tali loa a vosa o Sakopo, o masau fakakaka kia Siseme mo lona tamana ko Amole, o tupu kua fakamatagafua e Siseme lolatou tuagaane ko Tina. 14Na lotou tali loa kia laua : E leaise feala ke motou soli lomatou tuagaane ke avaga mo se tagata lee silikosisio ; talie e fakalumaluma loa le nea lena kia matou. 15Kae e feala loa ke motou tali le nea leia e kolua loto ki ai, mo kapau e kotou liliu loa o tatau mo matou, mo kapau e silikosisio loa a tagata fuli o koutou. 16E motou soli atu loa omatou taineliki ke avaga mo koutou, ti e motou too loa okoutou taineliki ke avaga mo matou. E motou nonofo loa mo koutou, ti e tou fakatasi loa ko se kakai e tasi. 17Kae kapau e leaise kotou tali ke kotou silikosisio, ti e motou too loa lomatou tuagaane, o motou ano loa.
18Na tali malie loa le masau lena e Amole mo lona vosa ko Siseme. 19Ti na leaise tuvai loa le fai e le tupulaga le nea lena, talie na mamana lasi a ia ki le taine o Sakopo. Ti na tuu mua loa a ia i le fale katoa o lona tamana.
20Na ano loa Amole mo lona vosa ko Siseme ki le matapa o le kolo, ti na la masau loa ki le kakai o le kolo, o pati : 21E agamalie a tagata anei kia tatou ; ke lotou nonofo i le fenua, ti ke lotou i ai ; ke fakamavaa lasi le fenua kia latou. E feala loa ke tou avaga mo olatou taineliki, ti e tou soli loa otatou taineliki ke avaga mo latou. 22Kae e loto loa a tagata anei ke nonofo mo tatou, ti ke tou fakatasi ko se kakai e tasi, mo kapau e silikosisio loa a tagata fuli o tatou, ke tou tatau mo latou. 23Kapau e tou tali loa le nea leia e lotou loto ki ai, ti e lotou au loa o nonofo mo tatou ; ti e liliu loa alatou kau manu, mo olatou koloa ko akoutou nea.
24Na io loa latou fuli ala na ano ki le matapa o le kolo kia Amole mo lona vosa ko Siseme : Ti na silikosisio loa a tagata fuli o le kolo. 25I le tolu o aso, koi lolotoga mamae a tagata o le kolo, ko vosa e lua o Sakopo, ko Simeone mo Levi, tuagaane o Tina, na too ia loa ala seleta ; ti na la ulu loa ki le kolo, leia na nofo i le tokamalie, ti na la tamate loa a tagata fuli. 26Na tamate foki e laua ki le seleta a Amole mo lona vosa ko Siseme ; ti na la too loa a Tina i le fale o Siseme, ti na lotou mavae loa mei ai. 27Na oso ake loa a vosa o Sakopo ki mate, o tatala olatou teu, ti na lotou too loa a koloa o le kolo, o tupu ko le pikoi leia na fai ki lolatou tuagaane. 28Na lotou too loa alatou kau manu : a kau ovi, mo kau koti, mo kau pipi, mo kau asino. Na lotou too loa a nea fuli ala na maua i le kolo mo faisaga. 29Na lotou ave loa a koloa fuli, mo toe fuli mo fafine, ti mo nea fuli ala na maua i loto o fale.
30Ti na pati loa Sakopo kia Simeone mo Levi : Kua kolua fai se nea fakamamae kiate au, talie kua kau fakalialia ki mata o le kakai o le fenua leinei, ki le kau Kanaane mo le kau Felesi. E kau fakatasi loa a kakai ana kiate au. E lotou au loa o tamate au mo loku famili, talie e toka teiki fua aku tagata. 31Na la tali loa kiate ia : Pe tonu ke fai lomatou tuagaane pe se fafine faiaga ?
Currently Selected:
Senesi 34: FB2000
Označeno
Deli
Kopiraj
Want to have your highlights saved across all your devices? Sign up or sign in
© Société Biblique de Genève, 2000-2020