Senesi 26
26
Isaake i le fenua o le kau Filisitini
1Na to loa se oge i le fenua, na kese a ia mo le uluaki oge leia na to i le temi o Apalaamo. Ti na ano loa Isaake kia Apimeleke, ko le sau o le kau Filisitini, i Kela. 2Na sa loa le Eteleno kiate ia, o pati : Aua na ke ifo ki Esipito, nofo i le fenua leia e kau fakasa atu loa kiate koe. 3Nofo mau i le fenua leinei : E kau nofo loa mo koe, ti e kau tapuaki loa kiate koe, talie e kau soli loa a fenua fuli anei kiate koe mo lou sakoga, ti e kau fakasoko loa le fakapapau leia na kau fai kia Apalaamo, lou tamana. 4E kau liuliuga loa lou sakoga ofaipe fetuu o le lagi ; ti e kau soli loa ki lou sakoga a fenua fuli anei ; ti e tapuakina loa a puleaga fuli o le malama nei i lou sakoga ; 5talie na fakalogo Apalaamo ki loku leo, ti na tausi e ia aku fakatotonu, mo aku fakatuutuu, mo aku lagiaki, mo aku lao. 6Ti na nofo loa Isaake i Kela.
7Na vesili loa le kakai o le fenua lena kiate ia ki lana avaga, ti na tali loa a ia kia latou : Ko loku tuagaane. Na i a ia i le pati ko lana avaga, talie na tamate a ia e le kakai o le ganea lena, o tupu ko le fulumalie o Lepeka. 8Na nofo loa a ia i le fenua lena o fualoa. I se aso leia na tio ai loa Apimeleke, sau o le kau Filisitini, mei lona katupa, e manogi Isaake mo Lepeka ofaipe se tagata leia e manogi mo lana avaga. 9Na tuku logo loa Apimeleke kia Isaake ke nake, ti na pati loa a ia kiate ia : E maoki ko lou avaga a Lepeka : ti kolea na ke pati ai : ko loku tuagaane ? Na tali loa Isaake kiate ia : Na kau masau fenaaki talie na kau i na tamate au o tupu ko laku avaga. 10Ti na pati loa Apimeleke : Kolea le nea na ke fai kia matou ? Ko le ganea ikiiki fua ti momoe se tasi o le kakai mo lou avaga, ti ke fakalakasala loa matou i ai. 11Ti na fai loa e Apimeleke le fakatotonu leinei ki lona kakai katoa : Ko leia e fafa loa ki le tagata leinei pe ki lana avaga, e tamate loa a ia.
12Na to loa e Isaake ni fakaili i le fenua lena, ti na utu loa e ia i le fetuu lena o liuga kau lelau ; talie na tapuaki loa le Eteleno kiate ia. 13Na liliu loa le tagata lena o mou koloa, ti na toe asilisili mou koloa loa a ia, o kaku loa a ia ko se tagata mauiga o tupu ko ona koloa. 14Na maua e ia ni kau manu liliki mo ni kau manu lalasi, ti mo ni tagata fakasausau toka api ai : Koia na finenonofo ai loa le kau Filisitini kiate ia. 15Ko sosoni fuli ala na kenu e tagata fakasausau o lona tamana, i le temi o Apalaamo, lona tamana, na tapono loa e le kau Filisitini, o lotou fakaapele latou ki le kele. 16Ti na pati loa Apimeleke kia Isaake : Ano kese a koe ia matou, talie kua ke makeke ake ia matou. 17Ti na ano loa Isaake mei lena, ti na fakatuu loa e ia lona falela i le vaivailiua o Kela, ti na nofo loa a ia i ai.
Kenu e Isaake o ni sosoni
18Na toe kenu loa e Isaake a sosoni ala na kenu i le temi o lona tamana ko Apalaamo, ti na tapono loa e le kau Filisitini i le oki o le mate o Apalaamo ; ti na toe soli loa e ia ki sosoni a igoa ala na soli e lona tamana. 19Na toe kenu loa e tagata fakasausau a Isaake i le vaivailiua se tasi ake sosoni, ti na lotou maua loa i ai se matapuna vai mauli. 20Ti na fakavisi loa a tagata tausi manu o Kela ki tagata tausi manu a Isaake, o pati : A matou le vai. Ti na soli loa e Isaake ki le sosoni lena le igoa ko Eseki, talie na lotou fakafefele kiate ia. 21Ti na toe kenu loa e tagata fakasausau a Isaake se tasi ake sosoni, ti na lotou toe fakavisi foki ki ai ; ti na soli loa e Isaake le igoa ko Sitina ki le sosoni lena. 22Na siki loa a ia i le ganea lena o kenu se tasi ake sosoni ; ti na leaise lotou toe fakavisi loa kiate ia : Ti na soli loa e ia le igoa ko Leopoti ki le sosoni lena, talie na pati a ia : Kua tuku matou e le Eteleno i le aso nei ki le lau lasi, ke motou mou koloa i le fenua nei.
23Na toe pale loa a ia i ai ki Pele-Sepa. 24Ti na sa loa le Eteleno kiate ia i le pouli, o pati : Ko au ko le Atua o Apalaamo, lou tamana ; aua na ke i, talie e kau nofo mo koe ; e kau tapuaki loa kiate koe, ti e kau liuliuga loa lou sakoga, o tupu ko laku tagata fakasausau ko Apalaamo. 25Na fakatuu loa e ia i le ganea lena se aletale, ti na faikole loa a ia i le suafa o le Eteleno, ti na fakatuu loa e ia i le ganea lena lona falela. Na kenu loa e tagata fakasausau a Isaake i ai se sosoni.
26Na nake loa Apimeleke i Kela kiate ia, mo lona kaiga ko Ausati, ti mo le pule o lana solia ko Pikoli. 27Na pati loa Isaake kia latou : Kolea kua kotou au ai kiate au, kae e kotou vesia kiate au, ti na kotou kapu au mei lokoutou fenua ? 28Ti na lotou tali loa kiate ia : E motou tio e nofo le Eteleno mo koe. Koia e motou pati ai : Ke tou fai se fakapapau i lou vasaa mo matou, ti ke tou fakamaoki fuli ki ai. 29Fakapapau mai kia matou e leaise ke fai ia loa kia matou se nea veli, ofaipe matou, na leaise motou agaveli kiate koe, kae na motou agamalie kiate koe, ti na motou tuku a koe ke ke ano i le tokamalie. I le aso nei kua tapuaki le Eteleno kiate koe. 30Na fai loa e Isaake kia latou se kai lasi, ti na lotou kai loa mo inu. 31Ti na lotou tutuu ake loa i le usu, o fai se sai ia latou. Ti na tuku ake loa latou e Isaake ke ano, o lotou mavae loa i le tokamalie.
32I le aso totonu lena, na kaku ake loa ni tagata fakasausau a Isaake, o masau kiate ia ki le sosoni leia na lotou kenu, ti na lotou pati loa : Kua motou maua se vai.
33Ti na fakaigoa loa e ia le sosoni lena ko Sipa. Koia leia na soli ai loa le igoa ko Pele-Sepa ki le kolo lena, o kaku mai ki le aso nei.
34Ko Esau, i lona fetuu kau fa, na avaga loa mo Sutita, ko le taine o le tagata Eti ko Peeli, ti mo Pasamati ko le taine o le tasi tagata Eti ko Eloni. 35Na fakatupu mamae ai a fafine ana ki loto o Isaake mo Lepeka.
Currently Selected:
Senesi 26: FB2000
Označeno
Share
Copy
Want to have your highlights saved across all your devices? Sign up or sign in
© Société Biblique de Genève, 2000-2020