Senesi 20
20
Nofo o Apalaamo i Kela
1Na mavae loa Apalaamo i le ganea lena, o ano ki le potu saute ; ti na fakatuu loa e ia lona nofoaga i Katesi mo Suli, ti na ano loa a ia ki Kela o nofo fakatemi i ai. 2Na pati loa Apalaamo ki lana avaga ko Sala : Ko loku tuagaane. Ko Apimeleke, sau o Kela, na fakatotonu ia loa ke too ake a Sala kiate ia. 3Kae na sa loa le Atua i se moe miti kia Apimeleke i le pouli, o pati kiate ia : Ko leinei, e ke mate loa o tupu ko le fafine leia kua ke aga o too, talie e i ai lona avaga. 4Ko Apimeleke, leia na leikiaise fakafeofi kia Sala, na tali loa : Aliki, pe ke tamate loa se puleaga agatonu ? 5Na pati mai le tagata kiate au : Ko loku tuagaane ! Ti na pati totonu le fafine : Ko loku tuagaane. Na kau fai le nea leinei i se loto sako mo ni lima mea. 6Na pati loa le Atua kiate ia i le moe miti : E kau iloa na ke fai le nea lena i se loto mea ; koia na kau taofi ai a koe ke aua na ke agasala kiate au. Koia foki leia na leaise kau fakataga ai ke ke fafa ki le fafine. 7I le aso nei, ke ke toe fakaliliu le fafine ki lona avaga ; talie ko se polofeta a ia, ti e faikole loa a ia kiate koe, ti e ke mauli loa. Kae kapau e leaise ke toe fakaliliu a ia, ke ke iloa e ke mate loa, a koe mo latou fuli ala e kau ki lou fale.
8Na tuu ake loa Apimeleke i le pogipogi usu o kalagai ana tagata fakasausau fuli, ti na fakamatala loa e ia kia latou a nea fuli ana ; ti na lotou i lasi ai. 9Ti na toe kalagai foki e Apimeleke a Apalaamo, o pati kiate ia : Kolea le nea leia kua ke fai kia matou ? Kolea laku sala kua fai kiate koe ke ke tuku ai kiate au mo loku puleaga se agasala lasi fenaaki ? Kua ke fai kiate au se nea leia e leaise tonu ke fai. 10Ti na vesili loa Apimeleke kia Apalaamo : Kolea le nea leia na ke manatu ki ai, o tupu ai lau fai felaaki ? 11Na tali loa Apalaamo : Na kau pati i loku loto, e lagi leaise maua se i maoki ki le Atua i le fenua leinei, ti e tamate loa au o tupu ko laku avaga. 12Ti tasi foki, e maoki ko loku tuagaane a ia, talie ko le taine a ia o loku tamana ; kae e leaise ma tinana tasi ; ti kua liliu a ia ko laku avaga. 13I le aso leia na fakamavae ai au e le Atua mei le fale o loku tamana, na kau pati kia Sala : Ko leinei le kalasia leia e ke fai loa kiate au : I fenua fuli ala e ta ano loa ki ai, ke ke pati kiate au : ko loku tuagaane.
14Na too loa e Apimeleke ni ovi, mo ni pipi, mo ni tagata fakasausau, mo ni fafine fakasausau, ti na soli loa e ia latou kia Apalaamo ; ti na toe liufaki loa e ia kiate ia lana avaga ko Sala. 15Na pati loa Apimeleke : Ko leinei, e tuu loku fenua i ou mua ; nofo i le ganea leia e ke loto ki ai. 16Ti na pati loa a ia kia Sala : Ko leinei, e kau soli ki lou tuagaane ni fa piesi siliva e afe ; ko le fakamailoga a ia e fakamaoki ai loa ki lou fale katoa e ke mea i le nea leinei.
17Na faikole loa Apalaamo ki le Atua, ti na fakamauli loa e le Atua a Apimeleke, mo lana avaga ti mo ana fafine fakasausau ; ti na mafai loa ke lotou toe fanaunau. 18Talie na fakapaa e le Eteleno a fafine fuli o le fale o Apimeleke, o tupu ko Sala, avaga o Apalaamo.
Currently Selected:
Senesi 20: FB2000
Označeno
Share
Copy
Want to have your highlights saved across all your devices? Sign up or sign in
© Société Biblique de Genève, 2000-2020