Mateo 7
7
Sikumtaguse
1“Sikumtaguse, hebu motaguswa mwemwe! 2Kilumbo kitala hicho chumuwatagusila wanhu, kicho chondamtaguswe, na iningo ija yumuwalingila, iyo yondamulingilwe. 3Habali ukilola kibale kili mgati mdisiso ja ndugu yako, bali banhi dili mgati msiso jako mwenyego hudjona? 4Bule komulongelaze ndugu yako ‘Ndeka nikilave ikibale kili msiso jako,ʼ na gweye kumbe kuna banhi msiso jako mwenyecho? 5Kwa mzenzeleganye gweye! Dilave tanhu ajo dibanhi dili msiso jako mwenyecho, kileka ulole goya ulave acho ikibale kili himo msiso ja ndugu yako! 6Sikumuwagwelele umbwa kinhu kingʼalile, kabili sikumwase lulu zenu hawali nguluwe, sikuweze wakanyage hasi na migulu yawo, wagaluke na kumdegani!”
Lulu za nhambiko
7“Puleni, na mweye mogwelelwa; zahileni, na mweye movona; tendeni hodi, na mweye movugulilwa. 8Kilumbo munhu yopula kogwelelwa, na heyo yozahila kovona, na yuja yotenda hodi kovugulilwa. 9Kuna munhu gani kumwenu, kamba mwanage yahampula mgate, yamgwelele dibwe? 10Bule yahampula somba, yamwinghe zoka? 11Loleni amweye mna imizoyo ihile, mvitanga kuwengha wanenu vinogile, chei ahivo havibanza nghani Tata wenu yali kuulanga kuwagwelela ganogile awo wompula?
12Basi gogose gomulonda mtendelwe na wanhu, na mweye muwatendele kamba vivo; ayo iyo Inzuma na Walaguzi.”
Umulango, inzila, walaguzi wa uvwizi
13“Ingileni mbite umulango msisili, kilumbo dilango hijo gazi, na zila gazi digendile mkwaga, na hewo bwando wokwingila muna dilango hijo. 14Bali umulango msisili, na nzila yakibabani, igendile kuugima, na hewo woiyona wadodo.
15Wateganyeni walaguzi wa uvwizi, womwizilani wavalile mikwembe ya nghondolo, kumbe mgati mna mbwizi wa mmuhulo wagaga! 16Mowatangila kwa umujo wawo. Loleni avo wanhu wobawaga mitongoni mmizomola, bule nghuyu mmilengeja? 17Vivo avo biki dinogile dilelaga mujo unogile, na biki ja migiligiza dilelaga migiligiza. 18Biki dinogile hadidaha kulela migiligiza, na biki ja migiligiza kulela mujo unogile. 19Biki hadilela mujo unogile, dokanhigwa dokwaswa hamoto. 20Avo vivo vondamuwatange muna umujo wawo.
21Si kamba munhu yondayanonge, Mndewa, Mndewa, yondayengile muundewa wa kuulanga, bali ija yosanghana gamnogele Tata wangu yali kuulanga. 22Bwando wondawanongele siku ya ikitala, ‘Mndewa, Mndewa, hatulavile ndagu kwa twaga jako, kulava mizuka mtwaga jako, kutenda malolomboto bwando mtwaga jako?ʼ 23Baho hondaniwalongele kimeso kindola, Simtangileni mweye mbe; gobokeni hamwangu mweye msanghane gehile!”
Ngʼanda uchana mkisugulu
24“Avo kila munhu yondayagahulike malonga gangu gano na kugasanghana, nomgamba na munhu mwene zifiyuko, yazengile ngʼanda yake uchana mkisugulu. 25Mvula katowa, mazi gamema, beho dikunghusa, diitigisa ngʼanda ija, maza haigwile, kilumbo mizengo yake ihimbilwa hasi muna ikisugulu. 26Bali munhu yohulika ago malonga gangu, imala hagasanghana, nomgamba na munhu yali bule nzewele, yazengile ngʼanda mdisangasanga. 27Mvula katowa, mazi gamema, kukuzumbi diza, diitigisa ngʼanda ija, igwa; kigwilo hicho kikala kikulu!”
28Avija Yesu viyagamambukize malonga gaja, matinghanilo wakanganya nghani gaja malangulizo gake. 29Kilumbo kakala yowalanguliza kamba munhu mwene magweka, si kamba waja Wana-Nzuma wawo.”
Currently Selected:
Mateo 7: ZAM75
Označeno
Share
Copy
Want to have your highlights saved across all your devices? Sign up or sign in
New Testament in Zaramo © United Bible Societies, 1975.