Chukusakị 6
6
Tomoniḅọ Ḅe Nyana Sitịḅị
1Tomonima tomonikiri mị ḅie ḅaka so ọkụma, ini pịkị eremeni awọ yimẹ, 2Tamụnọ awọ#6.2 Tamụnọ awọ, anịkanịka “Tamụnọ enjẹlapụ” ma ọrịmẹ na mịna iremeni ma ini iḅi, pịkị ḍikitọrụgbẹịnmẹ, anịḅụ inia ḅụḅẹlẹ apụ ini nwọ ọkị simemẹ. 3Anịẹrẹchị Nyanaḅọ Ḅe nwọḅẹmẹ, “À ḅereni ẹkẹ à se tomoniḅọ ḅe pịrị ḍumo pịrị tẹmẹ mị simegbaso. Mịọkụ sakị tọrọkọ mun ini ḅarị ḍumo kụra sonioasi nẹngị ẹkẹ.” 4Àrị enema ḅie, pịkị àrị enema ḅọrọ seso sọnị, opuma godoro pịkị kpokoro-kpokoro-a tomoni sẹkiri mị ḅie omi-ẹ, inia apụma anị sẹkiri ḅie eremenima na, Tamụnọ owuapụ awọma na furo ḅie pakaḅo apụ-ẹ. Ini anị olomusịkị ḅie ngịsị opu kuḅie kụrọ nyana pịkị ẹrẹso apụma-ẹ.
5Nyanaḅọ Ḅe sẹkiri mị ḅie tomoniḅọ goyegoye sitịḅịnyana laḅara na pịkị ini sikoroma nyana ọkụ ọrịsịkị, 6anị ori ngịrịmamẹ, ori ini tẹmẹ sẹkiri ḅie koroma yemị. Se ò ḅie opuma manamatọnmẹ 7se ọ̀ nwọḅẹmẹ, “À tẹmẹsa apụ mamgba àrị ini ọfịnsinḅịa, namama na, fenima na sọnị, anịatịḅị àrị ngịrịmẹ na ị̀rị̀ àrị tẹmẹmẹ.” 8Ọkụma Nyanaḅọ Ḅe ò Noa ḅe ḍikiḅieḅẹlẹmẹ.
Noa Ḅe Ḅẹrẹ
9-10Ini Noa se chịn gbọrịḅọ omi-ẹ. Tẹrẹ-a owuapụ awọ ọ̀ nwọ yimẹ, Shẹm ḅe na, Ham ḅe na, pịkị Jafẹtị ḅe na. Noa ḅe ò mịẹirima nyanakẹ pịkị ori ngẹrị ngẹrị anị oria sịkị mị ḅụ iḅiḅọ-ẹ. Ọ̀ Tamụnọ Ḅe na nwẹngịgbolomamẹ oria ḍumo ene mamgba, 11ọkụma jịn tomoniḅọ goyegoye Tamụnọ Ḅe tọrụkuḅu siḅọ-ẹ, kụrọkụrọ simịẹmịẹaye nyọ mamgba kelemamẹ. 12Tamụnọ Ḅe sẹkiri mị ḍiki seni ọrịmẹ na simịẹmịẹaye anịa ḅie ḅeinmẹ, anịatịḅị tomoni mamgba siḍumo kọn aḅẹ.
13Tamụnọ Ḅe nwọ seni Noa ḅe ḅẹmẹ, “À tọnpẹlẹsam na à tomoni goyegoye famaḅịa. À gbọtụma ini famasinḅịa, anịatịḅị tomonikiri mị ḅie inia siamịẹmịẹaye ḅeinmẹ. 14Iḅi chịn ḍọkị seni arụ mịẹ ị́ ḅụ pịrị; anịa ḅie jukuru jukuru chụa, agba seni ḅie ma na ọḅụ na ọmbị. 15Anịa ịsụn mị ḅụọ ẹndẹ na mesi oyi fịnjị nwọ laḅịa, finji mị ḅụọ-a tesi oyi fịnjị na sọnọ-a ḅụọ laḅịa, anịsịkị anịa gele mị ḅụọ-a mesi na sọnọ-a ḅụọ laḅịa. 16Arụ mị ochu mịẹ anị pịrị, ochu mị na anga ma na ḅụ gbọrị ḅụọ na pẹkẹrẹ laḅịa ẹmbẹ pịrị. Anịse tẹrẹ-a dẹkị ọgọnọwarị nama, pịkịna anga mị ḅụ gbọrị ḅọkọ chụa. 17Àrị opumengi seni sẹkiri sẹịnḅịa, se anị ḍumo nyanaye goyegoye ḅaafamaḅịa. Sẹkiri ḅie simeye goyegoye fịḅịa, 18ọkụma àrị ị́rị́ na ọḅọkụ fịḅịa. Arụ mị ḅie sọmun, ị́ tama na, ị́ya owuapụ awọma na, pịkị inia erema na. 19-20Arụ mị ḅie nama kịrịkịrị na pịkị feni kịrịkịrị na; owoi na ịrọrọ na nwọse ị́rị́ na arụ mị ḅie sọmun, mịẹsosịkị àrị ḍumoḅịa ḅara. 21Ómine na àrị na fịḅịa kịrịkịrị fịaye nwọse arụ mị ḅie chụa.” 22Noa ḅe Tamụnọ Ḅe tọn ọ̀ pịrịye goyegoye ọ̀ mịẹmẹ.
Currently Selected:
Chukusakị 6: OBTP
Označeno
Share
Copy
Want to have your highlights saved across all your devices? Sign up or sign in
The Bible Society of Nigeria