Jɔ̀ɔŋ 2
2
Wɔŋ ɗàà gè ke yɛɛ̀ gbìaàŋ ko Kenàŋ
1Eɓìèmàŋjɛ̀wɛ̀ e teengaà wo Jisɛ̀ naŋ wa nyààŋ wo Felè yèè wo Nàntanyàŋ lɛ, ke ɗɔ̀ɔ̀ taaà diɛŋ àŋ yaà wa gbììnyɛ̀ŋ ke yɛ̀ɛ̀ ko Kenàŋ wɔŋ fùɔ̀ŋ Galaliìɔ sùà. Wo nààŋ Jisɛ̀ɔ wo Mèèle wɔŋ pɛɛ yaào wa wɔŋ ɗaa bi diɛŋ. 2Anyùùŋ nyaŋ naŋ wa nyààŋ wo Jisɛ̀ yaà anyùùŋ màŋjɛ̀wɛ̀uŋ nyàŋ nyiŋ pɛɛ ko gbììnyɛ̀ŋ ke yɛ̀ɛ̀ɛ. 3Nààŋ maŋ tala muaŋ màŋ wɔŋ ɗaa gèeɔ̀ sùà naŋ wa jùò, wo nààŋ Jisɛ̀ɔ Mèèle naŋ wòò wo Jisɛ̀ wààŋ, “Maŋ tala muaŋ nyiŋ màŋ jùà.”
4Wo Jisɛ̀ naŋ fàsàì wo nààŋ wààŋ, “Yèye, kiìŋ tɛɛ̀ kuwa e wi nyiniàŋ! E teenga mɛ̀ kòò è hàì wèè ka nyɛ̀nɛ̀ŋ è keì.”
5Yèè wo nààŋ Jisɛ̀ɔ Mèèle naŋ wòò nyùùŋ nyaŋ yaà wa gòònò maŋ tala muaŋ màŋ nyaŋ wààŋ, “Nyɛ̀nɛìŋ e yèɛ gbiŋ wo jɔ̀àfelaa miɔ̀ŋ doiŋ nàŋ woò wèè naŋ nyɛ̀nɛ̀ŋ lɛ.”
6Maŋ dìsàìŋ gbèègbèè nɔɔnɔŋ dièguùŋ, maŋ yè maŋ àŋ naŋ wa bàànè le dùò lɛ, maŋ yaào wa e kèè wɔŋ ɗaa gèeɔ̀ sùà wèè e wuiyè sìa. E sàìŋ guùŋ gbiŋ hewa ɓèmè e fèèmàŋ e wuiyè tiìŋ kpɛ̀ɛ̀ùŋ yaà tiìŋ kpɛ̀ɛ̀ùŋ jɛ̀wɛ̀ zììyà. Aŋ Juùù nyaŋ kuwa maŋ langi wèè aŋ gùà nyiŋ bi wèè aŋ nɔ̀ŋ zɛ̀nɛŋ nyiŋ paŋgàà aŋ zòòlò Dayà, esaɓùɛ lii àŋ naŋ wa sìè e wùìyèɛ maŋ dìsàiŋ miiŋ sùà. 7Yèè wo Jisɛ̀ naŋ nyiŋ woò wààŋ, “Hìaìŋ e wùìyè niŋ diiyà maŋ dìsàiŋ màŋ vàùŋ.” Yèè aŋ naŋ miŋ diiyè vàuŋ. 8Kpeiŋ wo Jisɛ̀ naŋ nyiŋ woò wààŋ, “Sìaìŋ naàŋ e wùìyèɛ bà e yìwìà ko sàniìŋ niŋ koà niŋ koɓɛ̀ wo sìèfèìŋ ɗaaà.” Anyuùŋ gòònò maŋ tala muaŋ màŋ naŋ nyɛ̀nɛ̀ŋ e yèɛ wo Jisɛ̀ naŋ nyiŋ wa woò wèè aŋ nyɛ̀nɛ̀ŋ lɛ. 9Wo sìèfèìŋ ɗaaà naŋ tìè e wùìyèɛ bà e yèɛ wo Jisɛ̀ naŋ wa kìlè maŋ tala muaŋ lɛ̀. Wo nyimààŋ wa kɛ̀ kòò àŋ ɓɔìjɔ̀à nyaŋ naŋ miŋ wa gè, kɛɛ anyuùŋ gòònò maŋ tala muaŋ nyàŋ àŋ wa nyìmàŋ kɛ̀ kòò àŋ naŋ miŋ wa gè. Wèè esaɓù lɛɛ̀, wò naŋ wa nyààŋ wo kɛ̀ɛ̀nɛ̀ŋ jɔunɔ̀ɔŋ, 10yèè wò nauŋ woò wààŋ, “Wo nyùùŋ gbiŋ wɔŋ ɗaa gèeo sùà wò kiɛ̀ŋ wa maŋ tala muaŋ kɛnɛ màŋ jiɛ̀ koɓɛ̀ anyùùŋ nyaŋ. Yèè sèè àŋ tie naàŋ zimgbe maŋ jii fà nyìŋ, kɛ̀ wò ngàà hìàŋ maŋ zɔwùù maŋ. Kɛɛ mùŋ naŋ miŋ jèè kɛɛnɛŋ e hàì ko dìà wɔŋ ɗaaà!”
11E kèè mèè jiɛ̀jiɛ̀ɛ lɛɛ̀ wo Jisɛ̀ naŋ wa nyɛ̀nɛ̀ŋ wɔŋ nyiiŋ gèeuŋ nɔɔ̀ŋ sùà. Kɛɛ tɛɛ̀ naŋ wa kààìŋ ko Kenàŋ, wɔŋ fùɔ̀ŋ Galaliìɔ sùà. Kuii wo Jisɛ̀ naŋ wa tɔ̀ɔ̀ e gààŋ jòòwòuŋ nɛ̀, yèè anyùùŋ màŋjɛ̀wɛ̀uŋ nyàŋ nauŋ wa kɛ̀ɛ̀nɛ̀ŋ hààwe sùà.
12Eɓìèmàŋjɛ̀wɛ̀ maŋ keì mɛɛ̀ŋ, wo Jisɛ̀ e hààwè wo nààŋ, aŋ wùìyauŋ nyàŋ, yaà anyùùŋ màŋjɛ̀wɛ̀uŋ nyàŋ naŋ kɔ̀ ko jawa gbeeì àŋ nyaaŋ Kepanàùm. Àŋ nao wa nɔ̀ŋ wèè maŋ ɗɔɔ kpàa bà.
Wo Jisɛ̀ naŋ kɔ̀ ko Sààŋ Zòòloì
(Maafiù 21.12, 13; Mài 11.15-17; Luù 19.45, 46)
13È naŋ wa naàŋ jòò e teenga kpuu wèè wɔŋ Ɗaa Gèe Hɔ̀ɛ̀ɛ̀ŋ Diɛɔ̀ŋ wèè aŋ Juùù nyaŋ wɔŋ haì, kpeiŋ wo Jisɛ̀ yaà anyùùŋ màŋjɛ̀wɛ̀uŋ nyàŋ naŋ kɔ̀ ko Jùlusɛ̀làm. 14Wò naŋ kɔ̀ ko Saaŋ Zòòlò Dayài yèè wò nao mɛ̀ɛ̀ŋ anyuùŋ mààŋ bòli àŋ yaà mììnyɛ̀ŋ maŋ ɗolònɛ̀ŋ mààŋ aŋ dìi, aŋ ɓaawaa, aŋ poopoò, yèè anyuùŋ vɔ̀ɔ̀nɔ̀ŋ nɛɛnɛŋ nyàŋ àŋ jaa maŋ gbɛ̀gbɛ̀ nyiŋ màŋ kɔɔ ko vɔ̀ɔ̀nɔ̀ŋ nɛɛnɛŋ ko jɔ̀ɔ̀lègbèè ko Saaŋ Zòòlò Dayài. 15Kpeiŋ wò naŋ kàmè e jèì wo niŋ bàànè ke sele, yèè wò naŋ nyìmè anyùùŋ nyaŋ gbiŋ e kpùlìà maŋ ɗolònɛ̀ŋ nyiŋ màŋ tèènè mààŋ aŋ dìii yaà aŋ ɓaawaa ko jɔ̀ɔ̀lègbèè ko Saaŋ Zòòlò Dayài. Wò naŋ gɔ̀àì maŋ gbɛ̀gbɛ̀ anyuùŋ vɔ̀ɔ̀nɔ̀ŋ nɛɛnɛŋ nyàŋ yèè e nɛɛnɛŋ nyiŋ nɛ̀ gbiŋ naŋ ɓaayè. 16Wo Jisɛ̀ naŋ wòò anyuùŋ mààŋ aŋ poopoò nyaŋ wààŋ, “Geìŋ kià aŋ poòpoò nyiiŋ! Ɓɔ̀ niŋ miinè kè Saaŋ Zòòlò Dèda miɛ̀ŋ kè sààŋ bòli.” 17Anyùùŋ màŋjɛ̀wɛ̀uŋ nyàŋ naŋ kɛ̀ɛ̀nɛ̀ŋ ke jii jàa kɛ̀ è yaà sìnga niŋ wɔŋ fɛ̀ì Dayàa sùà e kìlà è naŋ woò wààŋ, “Oo Dayà, e mànaŋ mɛ̀ wèè ke Saaŋ Zòòlo mɔɛ̀ŋ sùɔ̀ìm ke jiio sùà zimgbe mààŋ e hmɔɔ̀ŋ kùwa.”
18Kpeiŋ wèè esàɓù e nɛ̀ɛŋ wo Jisɛ̀ naŋ nyɛ̀nɛ̀ŋ lɛ, aŋ ɓɛ̀màŋɗì aŋ Juùù nyaŋ naŋ kɛɛ̀ yèè àŋ nauŋ gbìɛ̀ŋ wɔŋ mààŋdàwè nyààŋ, “Kiìŋ è tɔ̀ɔ̀màŋsèì keì mùŋ naŋ wi ɓɛ̀nɛ̀ŋ tɔ̀ɔ wèè tɛɛ̀ mùŋ naŋ yaà nyɛ̀nɛ̀ŋ lɛ?”
19Wo Jisɛ̀ naŋ fasàì wààŋ, “Sèè nìŋ gɔɛɛ ke Saaŋ Zòòlò Dayà yɛɛ̀, mìŋ do nàŋ ɓèmè maŋ ɗɔ̀ɔ̀ taai wèè ka nyiŋ ɓɛìŋ nyɛ̀lɛ̀.”
20Aŋ Juùù nyaŋ naŋ fasàì nyààŋ, “Mùŋ naŋ gongò kɛ̀ màŋ ɓɛìŋ ɓɛ̀nɛ̀ŋ nyɛ̀lɛ̀ ke Saaŋ Zòòlò Dayà yɛɛ̀ maŋ ɗɔ̀ɔ̀ taai sùà? Anyuùŋ wi nyàŋ naŋ ɓèmè maŋ doa kpɛ̀ɛ̀ùŋ tìyèe jɛ̀wɛ̀ nɔɔnɔŋ dièguùŋ wèè aŋ nyɛ̀lɛ̀ ke Sààŋ Zòòlo Dayà yɛɛ̀.”
21Kɛɛ e kèè ke saaŋ zòòlò Dayàa wo Jisɛ̀ yaà wa wòò e kii nyiŋ nɛ̀ nàŋ yaà ke kpùnàŋ wuŋ biɛ̀. 22Kpeiŋ nààŋ wo Dayà nauŋ wa gè e fàaà dìì wɔŋ gèeo sùà, anyùùŋ màŋjɛ̀wɛ̀uŋ nyàŋ naŋ ngàà kɛ̀ɛ̀nɛ̀ŋ jii jàa wèè e yèɛ wò naŋ nyiŋ wa woò lɛ. Àŋ naŋ hààwè e yèɛ wɔŋ fɛ̀ì Dayàa naŋ woò lɛ yaà e yèɛ wo Jisɛ̀ naŋ nyiŋ wa woò lɛ.
Wo Jisɛ̀ nyìmàŋ ke jìì kòmàŋ nyuùŋkpùuŋ gbiŋ sùà
23Esàɓù maŋ kèè mèè maŋ anyùùŋ nyaŋ naŋ wa yɛ̀mɛ̀ wo Jisɛ̀ naŋ nyɛ̀nɛ̀ŋ maŋ, anyuùŋ zimgbe nauŋ wa haawè ko Jùlusɛ̀làm e tèèngà wɔŋ Ɗaa Gèe Hɔ̀ɛ̀ɛ̀ŋ Diɛɔ̀ŋ. 24Kɛɛ sèè è nɔ̀ŋ wèè wo Jisɛ̀ wuŋ bi, wo gò nyiŋ wa haawè, esaɓù wò wa nyìmàŋ maŋ jii nyiŋ màŋ gbiŋ sùà. 25Esaɓù bà gbiŋ fè wa wèè wò nyùùŋ gbiŋ wò douŋ kìɛ̀ŋ kè mìè seì aŋ woò kɛ̀ ɓòò nàŋ yaà anyùùŋ nyɛɛ̀ŋ. Wò wa nyìmàŋ aŋ gbiŋ tɛ̀ɛ̀.
Currently Selected:
Jɔ̀ɔŋ 2: WFESD
Označeno
Share
Copy
Want to have your highlights saved across all your devices? Sign up or sign in
Gola New Testament Translation and Literacy Project © Bible Society in Liberia, 2019.