Luk̆a 6
6
Sap̆at̆onişi Ambai
1Ar Sap̆at̆oni Ndğas, Yeso nodik̆enepes goşulut̆u. Mamguralepe muşik mdik̆as dudepe mouʒ̆ilamt̆es, xeguris gikurçolumt̆es do ipxort̆es. 2Bazi Farisurepek, “Muşeni Sap̆at̆oni Ndğas na var xvadun dulya ikomt?”-ya uʒ̆ves.
3Yesokti hentepes haşo uʒ̆u: “Davidi do hemu k̆ala na rt̆espe amşkorinesşk̆ule mu vesdort̆un, var ik̆itxiti? 4Ğormotişi oxorişa kamaxtu do xvala p̆ap̆apeşeni gamak̆ateri, majuranepeşeni genç̆k̆eri, nokade kovalepe ezdu do oç̆k̆omu, muşk̆ala na rt̆espesti komeçu.” 5Uk̆ule Yesok hentepes, “Ma K̆oçişskiri, Sap̆at̆oni Ndğaşiti Mance bore”-ya uʒ̆u.
6Majura ar Sap̆at̆oni Ndğasti, Yesok sinagogişa kamaxtu do doguramt̆u. Hek marz̆gvani xe elağurineri ar k̆oçi kort̆u. 7Yesos suçi eonduşeni maana na gorumt̆es Maç̆aralepe do Farisurepek, ‘Yat̆i, Sap̆at̆oni Ndğas zabunepe ok̆aaseni?’-ya do hea uxosart̆es. 8Yesos, hentepek mu na izmonan, hea kuçkit̆u. Marz̆gvani xe elağurineri k̆oçis, “Keiseli, komoşaxti!”-ya uʒ̆u. K̆oçiti eiselu do kogoşadgitu. 9Yesok hentepes, “Tkva k̆k̆itxat”-ya, “Ʒ̆k̆onda K̆anonis, Sap̆at̆oni Ndğas k̆aoba oxenu xvaduni, varna p̆at̆oba oxenu? Ar mitxani moşletinui varna oğurinui?” 10Do mtelis toli koguonuşk̆ule k̆oçis “Xe mominç̆i!”-ya uʒ̆u. K̆oçik Yesos xe konunç̆u, k̆oçis xe dak̆au. 11Hentepek haya z̆iresşi guri na maleste t̆ora ilaxes do ‘Yesos mu boğoditk̆o?’-ya do artikartis mek̆itxus kogyoç̆k̆es.
Yesok Vit̆ojur Elçi Goşionams
12Hem ndğalepes Yeso, oxvamuşeni germaşa keşaxtu do mteli seris Ğormotis axvamu. 13Dotanuşi mamguralepe muşis ducoxu do hentepeşen coxo elçi na gyodu vit̆ojur şuri kogoşionu.
14P̆et̆re na gyodu Simoni, hemuş cuma Andrea, Yak̆ovi, Yani, Filip̆e do Vartolome, 15Mate, Toma, Alfaiş skiri Yak̆ovi, dobadonaşmaorope na uʒ̆umenan Simoni, 16Yak̆oviş skiri Yuda do Yesos xainoba na oğodasen Yuda İsk̆ariot̆i.
17Yeso hantepe k̆ala gextu do ar zenis kododgitu. Mamguralepe muşişi dido mitxanepe, mteli Yudeaşen, Yeruşalimişen, T̆iro do Sidonişi zuğa k̆eleni svalepeşen monoxtime xalk̆iti hek ok̆obğut̆es. 18Yesos meucinu do zabunepe mutepeşi ok̆auşeni moxtesdort̆un. Pinti şurepeşi gurine sixinti na uğunanpeti ik̆ainet̆u. 19Hemuşen iris na aşvelen ar menceli na gamulut̆uşeni, dido mitxanepek “Yesos xe mebonʒ̆a”-ya do inç̆işet̆es.
Xelerepe do Uxelupe
20Yesok, tolepe muşi mamguralepe muşişi k̆ele goloktu do hentepes haşo uʒ̆u:
“Şana bedi tkvanis, e fuk̆arape!
Hemuşeni ki, Ğormotişi Mapoba tkvani ren.
21Şana bedi tkvanis, e haʒ̆ineri mşkorinerepe!
Hemuşeni ki, tkvati iz̆ğaten.
Şana bedi tkvanis, e haʒ̆i na ibgarnanpe!
Hemuşeni ki, tkvati iz̆iʒaten.
22K̆oçişskirişa oropa na giğunanşeni, k̆oçepek tkva yegodgitanşi, tkva var megik̆ardan do gegoç̆onanşi, coxo tkvani gamionanşi, e şana bedi tkvanis! 23Hem ndğas ixelit. Xelebate eʒ̆uk̆ap̆it. Hemuşeni ki ʒas tkva dido baxşişepe mekçanoren. Asti, hentepeşi didilepekti ambayocepes haşope oğodesdort̆un.
24Mara e çxome, ç̆e zenginepe,
Hemuşeni ki tkva guri dip̆lanit.
25E çxome, ç̆e korba z̆ğerepe
Hemuşeni ki mşkorineri doskidaten!
E çxome, haʒ̆i na ixelenanpe
Hemuşeni ki tkvati bgara z̆iraten.
26E çxome, irik tkvanişeni k̆aoboni nenape zop̆onanna! Hemuşeni ki, hentepeşi didilepekti mʒudi ambayocepes haşope oğodamt̆es.”
Duşmanepe Tkvanis Gioroput̆an
27“Mara, ma uci momçit, tkva giʒ̆umert: Duşmanepe tkvanis gioroput̆an, tkva na egidginanpes k̆aoba oğodit. 28Tkva na genk̆ç̆k̆espeşi k̆aobaşeni ixvamit do na gegok̆itxespes uxvamit. 29Ark̆eleni ğva na gamogot̆k̆vaʒus majurak̆eleni ğvati gukti. Libade na egiç̆opus porça mot uşlem. 30Ar mitxanik mutxa dogak̆vanduna meçi do ar mutxa kegiç̆opuna hea çkva mot ak̆van. 31K̆oçepek tkva muç̆o goğodesk̆o k̆ai giʒ̆onunan tkvati hentepes heşo oğodit.
32Tkva na k̆oromanpe gioropunt̆anşi mu mogagenan? K̆rimonepekti mutepes na oromanpes oroman. 33Tkva k̆aoba na goğodespe k̆aoba doğoditşi mu mogagenan? P̆a k̆rimonepekti haşo ikoman. 34E do, eç̆opinuşi medite mitxanis konoʒxatna mu mogagenan? K̆rimonepekti k̆rimonepes na meçes k̆onari eç̆opinuşeni artikartis noʒxaman. 35Mara tkva duşmanepe tkvanis gioroput̆an, hentepes k̆aoba oğodit, noʒxit do nut̆k̆oçit; haşote dido mogaganen; do tkva İri-xoloşen Didişi skirepe ivaten; hemus movaracepe do p̆at̆epeşeniti k̆ai guri uğun. 36Muç̆oti Baba tkvanis guriş meç̆vala uğun, tkvati giğurt̆an.”
Mitis Mot Eondumt
37“Mitis mutu mot eondumt, tkvati mot egondumt̆an. Masuçani mot gamionamt, tkvati masuçani var gamogionanoren. Çkvapes uxat̆irit, tkvati gixat̆iranoren. 38Meçit, tkvati mekçanoren. K̆aixeşa mk̆aseri, meşatxeri do mooxveri, opşa ozumaşete p̆orgyas gegibğanoren. Nam ozumaşete meçatna, hem ozumaşete eç̆opaten.”
39Yesok hentepes haşo ar memgapurati up̆aramitu: “Utolek utoles gza aʒ̆irineni? Juriti ğormas var dololamani? 40Mamgurale mamgurapaleşen jin va ren, mara oguru na oçodinu k̆at̆a mamgurale mamgurapale muşisteri iven.
41Si muşeni cuma skanişi tolis na ren pirçi z̆irom do skani tolis na ren mzgici var z̆irom? 42Toli skanişi mzgici var z̆irom do cuma skanis ‘E cuma, moxti do tolis na giğun pirçi keşegiğa’ muç̆o gatkven? Ç̆e jurp̆iconi! Si ipti tolis na giğun mzgici keşiği do cuma skanişi tolişi pirçi eşağuşeni toli çkva k̆ai gaz̆iren.”
Nca do Xila Muşi
43“K̆ai nca p̆at̆i xila, p̆at̆i ncati k̆ai xila var meçams. 44K̆at̆a nca xila muşik oçinapams. Daz̆işe luği var iʒ̆ilinen, tamlişenti urz̆eni var iʒ̆ilinen. 45K̆ai k̆oçik, guri muşişi k̆ai xazinaşen k̆aoba, p̆at̆i k̆oçik guri muşişi p̆at̆i xazinaşen p̆at̆oba eşimers. K̆oçişi p̆icik gurişen na epumspe zop̆ons.
46Ma muşeni ‘E Mance, e Mance’-ya do micoxamt, mara na giʒ̆umertpe var ikomt? 47Çkimda moxtas do nenape çkimi ognas do na ikoms k̆oçi mis nugams goʒ̆irat. 48He k̆oçis, oxori ik̆odamt̆asşk̆ule let̆a derini ntxorams do mesoni kvas na yodgams k̆oçis nugams. Ğvarite na irdu ğalik hem oxori noçxuk̆oti, varti oxank̆anen. Hemuşeni ki oxori k̆ap̆et̆işa k̆oderi ren. 49Mara nenape çkimi ognas do na var domicers mitxanis, oxori muşi, mesoni var dolodgaşa, let̆aş jin na gedgu k̆oçis nugams. Ğali irdaşk̆ule oxori ordoşa kok̆ipatxen. Oxoriti p̆at̆işa ok̆ixven.”
Currently Selected:
Luk̆a 6: LZZ
Označeno
Share
Copy
Want to have your highlights saved across all your devices? Sign up or sign in
Laz Luke © Bible Society in Turkey (Kitabı Mukaddes Şirketi) 2020