Matthew 18

Tumo alientak

(Mk 9:33-37; Luk 9:46-48)

1Ma zora han ruoisingei Jisua kôm an honga, “Invân Rêngrama tumo alientak?”#Luk 22:24 tiin an rekela.

2Masikin Jisua'n nâipangte a koia, an makunga a minding pe ngeia, an kôm, 3“Adiktakin nangni ki ti, nin hong inthûla, nâipangte ngei angin nin om nônchu invân Rêngrama lût thei tet no tunui.#Mk 10:15; Luk 18:17 4Invân Rêngrama alientak chu amananâkin nuninêma hi nâipangte anga hong om hih ani. 5Male tukhom ki riming sika hi nâipangte anga lei modôm chu keima mi modôm an ni.”

Sietna ranga methêmna

(Mk 9:42-48; Luk 17:1-2)

6“Tukhomin ka chunga taksônna dônngei lâia nâipangte inkhat khom hih a minpalin chu a ringa bu nôina lung lienpa minlîn tuikhanglien inthûk taka inchôm senla ata rangin sa uol atih. 7Mingei an taksônna minmang pe ngâi neinunngei sikin rammuol rangin ichi aom bâk na! Inpalna ngei chu om bang a ta, aniatachu, inpalna ngei min ompu chungroi chu ichi aombâk na! 8Nu kutin mo, ne ke'n mo, nang aminpalin chu tan pai inla, pai kelen roh! Kut inik mo, ke inik mo dôna kumtuong meidîla nang pai nêkin chu kut boi mo, ke boia mo ringna han lût chu na ta rangin asa uol.#Mat 5:30 9Ni mit khomin nang aminpalin chu kêlpai inla, pai kelen roh! Mit inik dôna meidîla nang pai nêkin chu inkhat vai dôna ringna taka lût chu na ta rangin asa uol ani.”

Belri inmang chongmintêk

(Luk 15:3-7)

10“En roi, hi mi chînte ngei lâia inkhat luo hih mumâkloi rangin indîn roi. Invâna an vântîrtonngei hih invâna#18:10 Miziek senkhatngei chu archang 11 na hi an bôksa: Miriem Nâipasal hi ânmangngei sanminringa juong ani Luk 19:10 ka Pa makunga an om tit ngâi ti nangni ki ril. 11Miriem Nâipasal hi ânmang ngei roka, sanminring rang piela juong ani.

12“Mi inkhatin belri razakhat dôn senla, an lâia inkhat inmang rese, kho angin mo a tho rangin nin mindôn? Sômkuoleikuo ngei hah muol panga bu min sâk a ta, male sêng a ta, ânmangpu hah va rok a tih. 13Nangni ki ril, ava manin chu sômkuoleikuo ânmangloi ngei nêkin inkhatpu chunga han a râisân uol ok a tih. 14Ma angdênin, hi mi chînte ngei lâia inkhat inmang khom hih nin#18:14: nin; Miziek senkhatngei an dôn ka. Pa invâna omin nuom mak.

Lâibung aninônchu sarnu sietna sin

15“Na lâibungpa nang doiin#18:15 Miziek senkhatngei chu dôn mak ngei nang doiin. sietna a sinin chu, senla a minchâina min mûn la, dâirekin nin ruona riet rang vaiin ril roh. No chong a rangâiin chu na lâibungpa hah ne mene nôk nîng a tih.#Luk 17:3 16Aniatachu no chong a rangâi nôn chu midang inkhat mini, inik mini tuong sân la, masikin Pathien lekhabu'n a ti anghan, saloinônna chong nâm hah rietpuipungei mi inik mo, inthum mo bâia mindet ani theina rangin.#Bal 19:15 17Hanchu an chong khom arngâi non chu, neinun murdi koiindang kôm min tung roh. Azoinataka chu koiindang chong khom a rangâi nuom nôn chu ha mi hah chu sonong anghan mini, sum rusuongpu angin mini be roh.

Khap le phal

18“Masikin nin rêngin nangni ki ril: pilchunga nin khap kai invâna khap nîng a ta, pilchunga nin phal kai invâna phal nîng atih.

19“Nangni ki ril uol sa: pilchunga hin mi inikin nin ngênna han nin inruolin chu, invâna ka Pa'n nangni tho pe a tih. 20Mi inik mo, inthum mo ki riminga an hong intûpna muna han anni leh ko om ngâi sikin,” a tia.

Tîrlâm ngâidamloi chongmintêk

21Male Peter hah Jisua kôm a honga, “Pumapa ka lâibungpa'n ku chunga sietna sin bang senla, voizet mo ka ngâidam rang? Voi sari mo?”#Luk 17:3-4 tiin a rekela.

22Jisua'n a kôm, “Nimak, voi sari ni loiin, voi sômsari mun sari tena,”#18:22 Voi sômsari mun sari; aninônchu voi sômsari lei sari.#Aph 4:24 tiin a thuona, 23“Invân Rêngram chu, voikhat chu rêngpa inkhatin a tîrlâmngei kôm an sum thurchi enmindik ranga masatpu angin ani sikin. 24A hong enmindik phutin chu mi inkhat talent isângsôm intâng a kôm an hong tuonga. 25Ma tîrlâm han a lakâi pêk rang ahundôr a dônloi sikin rêngpa han ama, a lômnu, a nâingei leh a dôn murdi juorin, a lakâi thuon rangin chong a pêka. 26Tîrlâm han rêngpa makunga khûkinbilin ânboka. ‘Ka chunga nu phûkminsei viet inla, anrêngin nang thuon let ki tih!’ tiin ânvûia. 27Rêngpa han inrieng a mua, hanchu a lakâi hah a ngâidam phara, a min se zoi.

28“Hanchu ha mi hah a jôkpaia, a tîrlâm champui ngei lâia inkhat duli razakhat intâng ava mua. Ava sûrrapa, a ringôn a sôm pea, Na lakâi hah ni thuon ta roh!” a tia. 29A tîrlâm champui hah ânbôka, “Ku chunga nu phûkminsei viet inla, nang thuon ki tih!” tiin ânvuia. 30Hannirese nuom maka; manêkin a lakâi a thuon mâka chu intâng ina a khum zoi. 31Tîrlâm dang ngeiin a sintho lam hah an mûn chu an mulunghoi maka, rêngpa kôm an sea, neinun nâm an va misîr pea. 32Masikin rêngpa han tîrlâm hah a koia, a kôm, Nangma tîrlâm kâmnângloi! nên vûi sikin na lakâi murdi nang ka ngâidam ani. 33Keiman nu chunga moroina ko dôn anghan, nang khomin ni tîrlâm champui chunga moroina no dôn rang kêng ani, a tipea. 34Rêngpa hah atakasi sabaka, male ha tîrlâm hah a lakâi a thuon suo mâka rangin intâng ina a khum zoi.

35Jisua'n, “Ma angdênin mitinin nin lâibungngei nin mulungrîl tatak renga nin ngâidam nônchu invâna ka Pa khomin nin chunga ma angdênin thông a tih,” tiin chongkhârnân a ti ani.

Currently Selected:

Matthew 18: SAKNT

Označeno

Copy

Want to have your highlights saved across all your devices? Sign up or sign in

Več o prevodu Pathien Lekhabu Inthieng Chongtung Thar

Matthew 18

Popular Bible Verses from
Matthew 18

Listen to Matthew 18

Bible:

Sakachep

Version: Pathien Lekhabu Inthieng Chongtung Thar - SAKNT

Matthew 18

Matthew 18

Popular Bible Verses from Matthew 18

Listen to Matthew 18

Bible:

Sakachep

Version: Pathien Lekhabu Inthieng Chongtung Thar - SAKNT

Matthew 18

Popular Bible Verses from
Matthew 18