Yohane 8
8
Umwanakashi uwayiketwe mubuchende
1Nomba Yesu ayile ku Lupili lwa Maolife. 2Muluchelo-chelo, alibwelelemo kunanda yaku Lesa nokwinjilamo. Elo ayikele nokusambisha abantu pantu abenji bayishile kuli Ye. 3Elo abasambishi ba Mafunde na Bafalisi baletele umwanakashi umo uwayiketwe mubuchende. Bamwimanikile kuntanshi yabantu bonse. 4Elo basosele kuli Yesu ati, “We musambishi, ngu mwanakashi bamusangile akochita ubuchende. 5Mu Mafunde akwa Mosesi, umwanakashi wamusango ngu alingile ukulaswa amabwe nokufwa. Nomba ukotipo shani?”#Ab.Lev. 20.10 6Basosele mfi ukuti basange apakumupelelapo umulandu. Nomba Yesu alinamine nokutatika ukulemba panshi nomunwe.
7Ulo bachili mpalya nokumufumba amafumbo, alinukile nokuti kuli bo, “Mba ninani uwakumwebo uutabifyapo, abalilepo ukumulasa ibwe umwanakashi ngu.” 8Elo nakambi ayineme nokulemba panshi nomunwe! 9Ulo baumfwile mfi, batatikile ukuyifuminapo umo-umo nokuya, ukubalila kubakulu. Elo pashele umwanakashi enka ekele na Yesu. 10Elo Yesu alinukile nokusosa kumwanakashi ati, “We mwanakashi, kanshi balikwisa abena-milandu bobe? Kanshi tapapo uwakukupela umulandu?”
11Naye aasukile ati, “Tapapo nangu umo mwe Bashikulu.”
Naye Yesu asosele ati, “Chiweme, nandibo nshakupelepo umulandu. Koya, kuntu wibifyapo nakambi.”]
Yesu ekusanika kwachalo
12Panuma Yesu asosele ku Bafalisi ati, “Nine kusanika ukusanikila bantu bamuchalo. Onse uwakunkonka akwisa kuba nokusanika ukwabumi, nakambi tayise kwendapo mumfinshi iyowo.”
13Pamulandu ngu, Abafalisi basosele ati, “Nomba ukoyiwamisha wemwine, bukamboni bwako tabukoalulapo nangu chimo”
14Yesu alibasukile ati, “Nangu kati nkoyisosela ifyanji nemwine, bukamboni bwanji bwakwebesha pantu nalishiba uko nafuma nakambi noko nkoya. Nomba mwebo tamwishibilepo uko nafuma noko nkoya. 15Mwebo mupingula ukulingana nobuntunse bwenu, kuntu nshikopingulapo umuntu nangu umo. 16Nangu kati nebo ndapingula, ukupingula kwanji kwakwebesha pantu nshilipo nenka iyowo, kuntu Bata abantumine bali pamo nandibo. 17Kambi chalilembwa mumafunde enu ukuti bukamboni bwabantu babili bwachine.#Deut. 17.6; 19.15 18Nebo nsosa ifyaku nebo, kuntu Bata abantumine ebashininkisha ifyanji.”
19Elo bo balimufumbile ati, “Kanshi Bawiso balikwisa?”
Yesu alibasukile ati, “Nebo tamwanjishibapo nangula Bata. Nga mwalinjishibile nebo, na Bata nga mwalibeshiba.”
20Yesu asosele nga mashiwi ulo alikusambisha munanda yaku Lesa, muchipinda umwali amabokoshi ayakusungilamo indalama ishabupe. Elo takwalipo nangu umo uwafwayile ukumwikata pantu inshita yakwe yali tayilafika.
Mwebo tekuti muyepo uko nebo nkoya
21Panuma Yesu asosele ku Bafalisi ati, “Nebo nkoya. Nangu kati mwakwisa kumfwaya-mfwaya, tamwakansangepo. Mwakwisa kufwila mumabifyo enu bwaka. Mwebo tekuti muyepo uko nebo nkoya.”
22Elo Abafalisi batatikile ukusoshanya ati, “Napo akofwaya ukuyipaya echo akososela ati, ‘Uko nkoya tekuti mufikeko iyowo.’”
23Nomba Yesu alibasukile ati, “Mwebo muli bapanonshi, kuntu nebo ndiwakumulu. Mwebo muli bamuchalo nchino, kuntu nebo nshili wamuno chalo iyowo. 24Efyo nebo namwebele ukuti mwebo mwakwisa kufwila mumabifyo enu. Kati tamukonchetekelapo nga umo nabela, mwakufwa. Elo amabifyo enu takanakililwepo.”
25Bo balimufumbile ati, “Mba niwe nani?”
Yesu alibasukile ati, “Nine uwo mwebele kale. 26Ndikwete ifyakusosa ifinji, nefyakumupingula. Uyo uwantuma wakwebesha. Elo amashiwi onse awo naumfwile kuli Ye ewo nkososa kuchalo.”
27Bena tabayishibilepo ukuti Yesu alikusosa kuli bo ifyaku Bawishi. 28Pamulandu ngu, echo asosele kuli bo ati, “Ulo mwakwimya Umwana wa Muntu pamutashi mwakwishiba ati nine. Mwakwisa kwishiba ati nebo tanshichitapo akantu nangu kamo munsambu shanji, kuntu nchita bwaka ifyo Bata banjebele. 29Uyo uwantuma aba pamo nanebo, tanshabapo nenka iyowo pantu lonse nchita ifimusekesha.”
30Ulo abantu abenji baumfwile Yesu akososa mfi, balimuchetekele.
Abantu ababwanalale nabasha
31Elo Yesu asosele ku Bayuda abamuchetekele ati, “Kati mwakusunga ukusambisha kwanji, nachine mwakuba abakusambila banji. 32Elo mwakwishiba ukwebesha, nanku kwebesha kwakwisa kumulubula.”
33Bambi balimwasukile ati, “Fwebo tuli bana bamulupwa lwakwa Abulahamu, nakambi tatwatala atutekwapo ubusha kuli bambi. Mba nimwisa uloseshe pakusosa ati, ‘Mwakwisa kulubulwa?’”
34Yesu asosele ati, “Nachine umuntu onse uuchita amabifyo, epela musha wamabifyo. 35Umusha tekalililapo mulupwa iyowo, kuntu umwana-nanda. 36Kati umwana wamulubula, mwalubulwa nachine. 37Nalishiba ukuti muli bana bamulupwa lwakwa Abulahamu. Nomba mwebo mukofwaya ukunjipaya pakuti tamukosuminapo ukusambisha kwanji. 38Nebo nsosa ifintu ifyo nabona kuli Bata, namwebo muchita ifintu ifyo mwaumfwa kuli bawishinwe.”
39Nabo balimwasukile ati, “Fwebo nshifwe ni Abulahamu.”
Elo Yesu asosele ati, “Kati mwebo muli bana bakwa Abulahamu abakwebesha, nga muchita imilimo iyo achitile. 40Fyonse ifyo nchita fyakwebesha pantu efyo naumfwile kuli Lesa, sembi mwebo mukofwaya ukunjipaya. Abulahamu tachitilepo mfi! 41Mwebo mukochita ukubati milimo banshinwe bachitile.”
Bamwasukile ati, “Tatuli bana bamubuchende iyowo. Lesa enka enshifwe twakwata, nakambi tuli bana bakwe abakwebesha.”
42Yesu abasukile ati, “Nachine nga Lesa aaba ni Nshinwe, nga mwalintemwa pakuti nafuma kuli Lesa. Tanshayishilepo munsambu shanji iyowo, kuntu Lesa ewantumine. 43Mba nindo mutomfwilapo ifyo nsosa? Mulandu wakuti tamukwetepo ifiso ifyakumfwa amashiwi anji. 44Mwebo muli bana bakunshinwe Satana, elo mufwaya ukuchita ukufwaya kwakwe. Ukufumina bwaka napakutatika ena nichipaya bantu. Elo tabapo kulubali ulwakwebesha, pantu muli ye tamupo ukwebesha. Ulo asosa ubufi, achita ichaba mukabelo kakwe pakuti ye aba uwabufi na wishi wababufi bonse.#Ukut. 3 45Pantu nebo nkososa ukwebesha, emulandu wine mutakonchetekelapo. 46Nga ninani uwaku mwebo uwingashininkisha ati nebo ndimbifi? Kati nebo ndamweba ukwebesha, mba mulandu ndo mutakonchetekelapo? 47Umuntu onse uwaku Lesa omfwa amashiwi aku Lesa. Nomba mwebo icho mutomfwila, tamuli bantu baku Lesa iyowo.”
Yesu alabila ifyakwa Abulahamu
48Abayuda bafumbile Yesu ati, “Napo tatulungikilepo ulo tweba ati, ‘Uli mwina Samaliya nakambi mwaliba umupashi uubi muli we?’”
49Yesu alibasukile ati, “Nebo tanshakwatapo umupashi uubi. Nchinshika Bata. Nomba mwebo tamunchinshikapo. 50Nebo nshifwaya ukuyichinshika. Ekwali umo uufwaya ukunchinshika, nakambi eukamupingula. 51Nachine nkokweba ati, umuntu onse uwakumfwa ukusambisha kwanji takafwepo.”
52Abantu bamusoseshe ati, “Nomba twayishiba nachine ukuti alikwete umupashi uubi. Pantu Abulahamu alifwa, nabasoseshi balifwa, kuntu webo ukoeba ati uyo muntu uwakumfwa ukusambisha kobe takafwepo. 53Banshifwe Abulahamu balifwa, napo webo uli mukulu ukuchila Abulahamu? Nabasoseshi balifwa, mba webo ukolanguluka ati niwe nani?”
54Yesu alibasukile ati, “Nga nebo nkoyichinshika nemwine, umuchinshi wanji wabwaka. Bata ebanchinshika nebo, abo mwebo mukoti e Lesa wenu. 55Mwebo tamwamwishibapo, kuntu nebo nalimwishiba. Nga nebo nasosa ati nshamwishibapo, kuti naba uwabufi kubati nimwe. Nomba nebo nalimwishiba nakambi ndomfwila amashiwi akwe. 56Nshinwe Abulahamu aali uwakusekelela pakuti afwayishe ukubona akasuba kakwisa kwanji. Nachine alikabwene, elo alisekelela ukwinekantu.”
57Nabo basosele kuli Ye ati, “Webo taulafika nakumyaka amakumi asano, kuti wamubona shani Abulahamu?”
58Elo Yesu abasukile ati, “Nachine nkomweba ati, ulo Abulahamu atalafyalwa, eko nali kale!”#Yoh. 1.1
59Elo Abayuda batolele amabwe ukuti bamulase, kuntu Yesu alyongolokelepo nokufumamo munanda yaku Lesa.
Currently Selected:
Yohane 8: LalaNT
Označeno
Share
Copy
Want to have your highlights saved across all your devices? Sign up or sign in
Chilala New Testament © Bible Society of Zambia, 1998.