Yohane 7
7
Yesu nabawakwe
1Panuma yaku mfi, Yesu apitene muchalo cha Galili. Tafwayilepo ukwenda muchalo cha Yudeya, pakuti abakulu ba Bayuda balikufwaya ukumwipaya. 2Elo ukulya kwa Bayuda kwa Misasa#7.2,10 Ukulya kwa Bayuda kwa Misasa: Boneni ubulondoloshi bwamashiwi ambi. Boneni nakambi muli Ab. Lef. 23.33-43. kwalipalamine. 3Epo bawabo baku Yesu bamwebele ati, “Ulingile ukuya ku Yudeya ukuti abakusambila bobe bakabone imilimo iyo ukochita. 4Takwabapo umuntu ufisa imilimo iyo akobomba kati akofwaya ukwishibikwa ukwinekantu. Apo wachita mfi fintu, leka ichalo chonse chikwishibe!” ( 5Nangu nibawakwe tabamuchetekelepo.)
6Elo Yesu ayasukile ati, “Inshita yanji tayilafika. Nomba kuli mwebo yonse inshita iilingile. 7Elo abantu bapano chalo tekuti bamupatepo. Nomba nebo balinsulile pantu ndabeba ati imilimo yabo iibi. 8Mwebo kamuyeni kuli nku kulya. Nomba nebo tanshikoyisako pakuti inshita yanji tayingafika.” 9Ulo ashilile ukusosa mfi, ayile kwikala mu Galili.
Yesu pakulya ukwa Misasa
10Panuma, ulo bawakwe bayile mukulya kwa Misasa, Yesu naye alile. Nangu chali mfilya, tayilepo apatubile, kuntu mubumfinshi. 11Munshita yanku kulya, abakulu ba Bayuda balikumufwayilisha. Balikufumbashanya ati, “Nikwisa ali?”
12Mwali ukutepelekeshanya ukukulu mukati kebumba lyabantu. Bambi balikusosa ati, “Ngu muntu muweme.” Nomba bambi basosele ati, “Iyowo, akopumfyanya abantu.” 13Nomba takwalipo nangu umo uwasosele apabuta pakuti bonse balikutina abakulu ba Bayuda.
14Ulo ukulya nku kwali pakati, Yesu ayile kunanda yaku Lesa nokutatika ukusambisha abantu. 15Elo abakulu ba Bayuda balishimbilwe ukwinekantu. Basosele ati, “Ngoyu muntu uutasambililapo ayishiba shani mfi fyonse?”
16Yesu alibasukile ati, “Ifyo nsambisha tefyanjipo kuntu fyafuma kuli Lesa uwantumine. 17Umuntu onse uukofwayisha ukuchita ifyo Lesa afwaya, ewakwisa kwishiba ifyo nkosambisha nga fyafuma kuli Lesa nangula nkoyisosela nemwine. 18Umuntu uyisoselela bwaka ifyakwe, ekwebati ayifwayila bwaka umuchinshi umwine. Nomba uufwaya umuchinshi wawamutuma, ena ewachishinka, nakambi taba nobufipo mumutima wakwe. 19Mosesi alimupele Amafunde, kuntu tapapo nangu umo uwakumwebo uualama. Mba mulandu ndo mukofwayila ukunjipaya?”
20Elo ibumba lyabantu lyamwasukile ati, “Muli umupashi uubi muli we! Mba nibani bakofwaya ukukwipaya?”
21Elo Yesu alibasukile ati, “Nachine nachitile umulimo umo uwafiso ifikulu, elo mwebo bonse mwalishimbilwe. 22Mosesi amwebele ati mulokushilimuna abana benu, (te Mosesi iyowo, kuntu ifikolwe fyenu fyatatikile mfi). Epo mulashilimuna umwana umwalalume pakasuba ke Sabata.#Ab.Lef. 12.3; Ukut. 17.10 23Mulashilimuna pakasuba ke Sabata ukuti Amafunde akwa Mosesi etobekwapo, mba mulandu ndo mwankalipile ulo naposeshe umuntu pakasuba ke Sabata? 24Lekeni ukupingula abantu mumibwenekele yabo, kuntu mulokupingula mumibelo iyakwebesha.”
Yesu e Wasubwa na Lesa
25Abantu bamo abamu Yelusalemu batatikile ukusosa ati, “Napo ngu tewo bakofwaya ukwipaya? 26Boneni! Teye akososela apatubile, nakambi takupo nangu umo uukomusosela ububi! Napo kuti kwaba ukwebesha ukuti abakulu balishibile ukuti ena e Wasubwa waku Lesa? 27Nomba fwebo tulishi uko ngu muntu afuma. Nomba ulo Uwasubwa waku Lesa akwisa, takupo umuntu uwakwishiba uko akufuma.”
28Ulo Yesu alikusambisha munanda yaku Lesa mu Yelusalemu, alibilikishe ati, “Nachine mwalinjishiba nokwishiba uko nafuma? Nomba tanshayisa mukufwayapo kwanji. Nomba uyo uwantumine wakwebesha. Mwebo tamwamwishibapo iyowo. 29Nebo nalimwishiba pakuti nafumine kuli Ye nakambi ewantuma.”
30Elo abantu bafwayile ukumwikata, kuntu tapalipo nangu umo uwamwikete pakuti inshita yakwe yali tayilafika. 31Nangu chali mfi, abantu abenji balichetekele. Elo basosele ati, “Kati Uwasubwa ayisa, napo akwisa kuchita imilimo iyafiso ifikulu ukuchila ngu muntu?”
Bamalonda batumwa mukwikata Yesu
32Ulo Abafalisi baumfwile ifyo abantu balikutepeleshanya namfi ifyaku Yesu, intungulushi shabachipupila na Bafalisi batumine bamalonda ukuti baye bamwikate Yesu. 33Nomba Yesu asosele ati, “Nakuba nenu pakanshita kanini bwaka, elo nakubwelela kuli Ye uwantumine. 34Kunshita iyo mwakwisa kumfwayilisha, kuntu tamwakambonepo, noko nkaya tamwakafikeko.”
35Epo abakulu ba Bayuda batatikile ukufumbashanya ati, “Nikwisa uko engaya uko fwebo tatungamusanga? Napo kuti aya kumushi waba Giliki ukwikala abantu besu nokuya kubasambisha? 36Ali kusosa ati tukamufwaya, kuntu tatwakamusangepo. Nakambi akoti uko akoya tekuti tufikeko. Chindo icho akososa?”
Imilonga yamenshi aapa ubumi
37Pakasuba kakupelako, akasuba kakulu ukuchila shonse, Yesu alimakene nokubilikisha ati, “Muntu onse uuli nechilaka, ese kuli nebo nokunwa. 38Kubati nimulya Amalembo Apatulika asosele ati, ‘Uyo onse uwakuchetekela muli nebo, inika yamenshi aabumi yakukunka ukufuma muli ye.’” 39Yesu pakusosa mfi, alikulanguluka ifya Mupashi Wabuta uyo abo abachetekela muli Ye bakwisa kupokelela. Pali njilya nshita Umupashi Wabuta wali taulepelwapo, pakuti Yesu ali talayingila mubuleme bwakwe.
Ukulekana mukati kabantu
40Bambi abantu ulo baumfwile amashiwi nga, basosele ati, “Ngu muntu chine-chine musoseshi#7.40 Musoseshi: Boneni ubulondoloshi pali Yoh. 1.21..”
41Bambi basosele ati, “Ngu muntu eye Uwasubwa waku Lesa.”
Nomba bambi nabo balikusosa ati, “Napo Uwasubwa ngu kuti afuma ku Galili? 42Amalembo Apatulika asosa ati, ‘Uwasubwa akuba uwakulupwa lwakwa mfumu Davide,’ nakambi, ‘Akufyalilwa ku Betelehemu, mumushi umo imfumu Davide alikwikala.’”#Yel. 23.5; Mik. 5.2 43Pamulandu ngu balilekene pamashiwi akwe ngalya. 44Bambi bafwayile ukuti bamwikate, kuntu takwalipo nangu umo uwamwikete.
Ukutachetekela kwabakulu ba Bayuda
45Bamalonda babwelelemo kuntungulushi shabachipupila na Bafalisi. Ulo bafikile nkulya, balibafumbile ati, “Mba nindo mutamuletele?”#Yoh. 7.32
46Bamalonda bayasukile ati, “Takupo muntu nangu umo uusosa kubati ningu muntu!”
47Elo Bafalisi basosele ati, “Kanshi namwe alimupunamikile? 48Napo kulipo bamo bantungulushi nangu Abafalisi abachetekele kale ngulya muntu? 49Bantu abo tabeshibilepo Amafunde akwa Mosesi, Lesa abalapisha!”
50Umo uwamu Bafalisi uwitwa Nikodemasi, ulya uwayile mukubona Yesu ubushiku, ali wamwibumba lya Bafalisi mba, aebele abanakwe ati,#Yoh. 3.1-2 51“Napo ifunde lyesu lilatusuminisha ukupela umuntu umulandu ukwambula ukumulubulwisha?”
52Nabo balimwasukile ati, “Kanshi nawebo uli mwina Galili? Upende bwino Malembo Apatulika. Wakusanga ukwebati takupo umusoseshi nangu umo uwafuma ku Galili.”
[ 53Epo balipalangene, bonse bayile kumishi yabo.
Currently Selected:
Yohane 7: LalaNT
Označeno
Share
Copy
Want to have your highlights saved across all your devices? Sign up or sign in
Chilala New Testament © Bible Society of Zambia, 1998.