Yohane 1
1
Ishiwi lyaaluka muntu
1Pakutatika, uyo uwitwa Ishiwi eko ali kale. Ali pamo na Lesa nakambi ni Lesa. 2Ukufuma bwaka pakutatika, Ishiwi ali pamo na Lesa. 3Ukupitila muli Ye Lesa atalile ifintu fyonse. Takupo nangu chimo ichatalilwe ukwambula Ye. 4Muli Ye mwali ubumi. Elo mbu bumi bwaletele kusanika kubantu. 5Nku Kusanika kusanikila mumfinshi, epo nemfinshi tekuti ikushimyepo.
6Lesa atumine umuntu umo, ishina lyakwe ni Yohane. 7Ye ayishile ukupela bukamboni bwanku Kusanika, ukuti abantu bonse bomfwe mbu ubutumi nokuchetekela. 8Yohane umwine talipo kusanika, ayishile bwaka mukupela bukamboni bwanku Kusanika. 9Nku kwali ekusanika ukwinenene, ukwayisa muchalo nokusanikila abantu bonse.
10Ishiwi ndilya lyali muchalo, nangu Lesa atalile ichalo ukupitila muli Ye, kuntu abantu tabamwishibilepo. 11Ayishile kuchalo chakumwabo, kuntu abantu tabamupokelelepo. 12Nomba abo abamupokelele nokumuchetekela, alibapele ifiso ifyakuba abana baku Lesa. 13Ukuba abana baku Lesa takwafuminepo kubafyashi babo, nangula mukufwaya kwamuntu iyowo, kuntu bafyelwe mufiso fyaku Lesa.
14Elo Ishiwi lyaalukile umuntu, ayishile kwikala mukati kesu uwayiwulamo ubwanshi nokwebesha. Nafwebo twabwene umuchinshi wakwe, umuchinshi wachana chimo chaku Wishi.
15Elo Yohane amuchitile bukamboni. Alibilikishe ati, “Ngu eye nalikumweba ati, ‘Ukoyisa panuma yanji alinchilile ifiso pakuti Ye eko ali ulo ntalafyalwa.’”
16Mubwanshi bwakwe ubukulu fwebo tulapokelela ishuko mufinji. 17Lesa apele Amafunde ukupitila muli Mosesi, kuntu ubwanshi nokwebesha fyayishile muli Yesu Klistu. 18Takupo umuntu nangu umo uwabona Lesa, kuntu Umwana uwafyalwa enka uwatemwekwa, uuli ni Lesa, ewatwishibishe ifyaku Lesa.
Ukubilisha kwakwa Yohane Mubatishi
(Mat. 3.1-12; Mk. 1.1-8; Luk. 3.1-18)
19Elo bachilolo ba Bayuda abamu Yelusalemu batumine bachipupila naba Lefi mukumufumba Yohane ati, “Kanshi webo niwe nani?”
20Yohane takenepo ukubasuka, kuntu abebele apabuta ati, “Nebo tanshilipo Uwasubwa waku Lesa.”
21Bamufumbile ati. “Mba niwe nani? Napo niwe Eliya?”
Yohane ayasukile ati, “Iyowo, tenepo.”
Bamufumbile ati, “Napo niwe umusoseshi#1.21 umusoseshi: Lesa alayile ukutuma umusoseshi umbi kubati ni Mosesi (Deut.18.15). Elo Abayuda balikulindila ukwisa kwakwe (Yoh. 6.14; 7.40). Umusoseshi ngu ni Yesu Klistu umwine (Mil.3.22-24).?”
Ayasukile ati, “Iyowo.”
22Bamufumbile ati, “Tubusheko, mba niwe nani? Twebeko ukwebati tutwale ukwasuka kuli bo abatutumine. Mba we wemwine ukoti niwe nani?”
23Elo Yohane abasukile ati,
“Nine uwo Esaya musoseshi alembele ati,
‘Umuntu akobilikisha muchiswebebe:
Wamyeni musebo waku Bashikulu,
Lungamikeni inshila yabo bwino,
ukuti bese bendemo Bashikulu!’”#Esa. 40.3
24Abo bantu balikumufumba batuminwe na Bafalisi. 25Elo bafumbile Yohane Mubatishi ati, “Kati tewepo Uwasubwa uwaku Lesa nangula Eliya nangula umusoseshi, mba nindo ubatishisha?”#Yoh. 1.21
26Yohane alyasukile ati, “Nebo nkobatisha namenshi bwaka, kuntu mukati kenu emo ali umo uwimakene uwo muteshibilepo. 27Uyo uwakwisa panuma yanji, nebo tanshilingilepo nokukakula ulushinga lwankwabilo shakwe.”
28Mfi fyonse fyachitikile mumushi wa Betaniya kwitala lyamulonga wa Yodani, uko Yohane alikubatishisha.
Umwana Wambelele waku Lesa
29Pakasuba kakonkelepo, Yohane Mubatishi abwene Yesu akoyisa kuli Ye. Elo asosele ati, “Boneni, ngulya e Mwana Wambelele waku Lesa uupinta amabifyo abantu bonse! 30Ngu eye nalikumweba ati, ‘Ukoyisa panuma yanji, alinchilile ifiso pakuti Ye eko ali ulo ntalafyalwa!’#Yoh. 1.15 31Nebo tanshamwishibilepo, kuntu nayisa mukubatisha namenshi ukuti eshibikwe kubena Isilaeli.”
32Yohane apele bumwanamboni ati, “Nabwene Mupashi Wabuta ukoyisa ukufuma kumulu, uwapalile inkunda nokwikala pali Ye. 33Nangu chali mfi, nebo nshamwishibilepo ati eye. Nomba Lesa, uwantumine ukubatisha namenshi, ewasosele kuli nebo ati, ‘Ulo wakwisa kubona Mupashi Wabuta ukufuma kumulu nokwikala pamuntu, ngu eye uwakwisa mukubatisha no Mupashi Wabuta.’ 34Lelo nayibwena nemwine, nakambi nkomweba ati, ngu e Mwana waku Lesa.”
Abakusambila baku Yesu abakubalilapo
35Pakasuba kakonkelepo, Yohane Mubatishi ayimakene penka pali nchilya chifulo nabakusambila bakwe babili. 36Ulo abwene Yesu akoenda, asosele ati, “Boneni Umwana wa Mbelele waku Lesa!”
37Ulo abakusambila babili baumfwile mfilya, bakonkele Yesu. 38Yesu alyalukile nokubona bakomukonka, alibafumbile ati, “Mba findo mukofwaya?”
Balimwasukile ati, “Rabbi, nikwisa mwikala?” “Rabbi” (ekweba ati, “Musambishi.”)
39Yesu asosele ati, “Iseni mubone.” Nabo balile nokubona uko alikwikala. (Bayikele nakwe nkalya kasuba pakuti chali ichungulo.)
40Umo uwaku bo babili ni Andileya, wabo wakwa Simoni Petulo. 41Bwangu-bwangu asangile wabo Simoni, nokumweba ati, “Twamusanga Uwasubwa waku Lesa.” (Ndi shina lyaalula ati Klistu.) 42Elo bayile pamo kuli Yesu.
Yesu alimuloleshe nokuti, “Ishina lyobe niwe Simoni mwana Yohane, kuntu nomba wakwitwa Kefasi.” (Ndi shina elimo na Petulo lyaalula ukuti, “Ibwe.”)
Yesu ayita Filipo na Natanayeli
43Akasuba kakonkelepo Yesu alangulukile ukuya kuchalo cha Galili. Elo asangile umwalalume uwitwa Filipo nokuti kuli Ye, “Nkonka!” ( 44Filipo afumine ku Betesaida, mumushi mwalikwikala Andileya na Petulo.) 45Filipo naye asangile Natanayeli nokumweba ati, “Twamusanga uwo Mosesi alembele mwibuku lya Mafunde, nabasoseshi nabo balimulembele. Ni Yesu waku Nasaleti, mwana Yosefe.”
46Natanayeli alimufumbile ati, “Napo ku Nasaleti nkulya kuti kwafumapo ichintu ichiweme?”
Filipo alimwasukile ati, “Isa uyibwene wemwine.”
47Ulo Yesu abwene Natanayeli akoyisa kuli Ye, asosele nefya kungulya ati, “Ngu mwina Isilaeli mwinenene, muli ye tamupo ubuchenjeshi!”
48Natanayeli alimufumbile ati, “Mba mwanjishiba shani?”
Yesu amwasukile ati, “Nebo nakubwene kale ulo wayikele munshi yamukunyu ulo Filipo atalakwita.”
49Natanayeli alimwasukile ati, “We musambishi, niwe Mwana waku Lesa! Niwe Mfumu yaba Isilaeli!”
50Yesu asosele ati, “Kanshi wachetekela pakuti nakweba ati, ‘Nakubwene kale ulo wayikele munshi yamukunyu?’ Wakwisa kubona ifintu ifikulu ukuchila pali nchi!” 51Epo asosele nakambi kuli bo ati, “Nachine, mwakwisa kubona umulu wayisuka nabangelo baku Lesa bakonina nokwikila pa Mwana wa Muntu.”
Currently Selected:
Yohane 1: LalaNT
Označeno
Share
Copy
Want to have your highlights saved across all your devices? Sign up or sign in
Chilala New Testament © Bible Society of Zambia, 1998.