Lk 20

E ngul nyi yasò Yesus ve?

Mt 21,23-27; Mk 11,27-33

1Ndò hm lazu bò na, amos ziṅ ha, ayëgëlë bod a tempel, ayedan bò mbëmbë foe, ndò bëfada bënen ai bësaṅa bëkalara ai benyia-bodo-mvia bëngasò, 2bò ai nyè na: Kada bia e kan ngul wabò e mam ma, ngë ki e mod avë wa ngul te. 3Ndò ayalan bò na: Ma mayi mina sili dzam ziṅ, mikad ma. 4Yë ṅduan Yohannes ongabë osòò a yob, yë a bod? 5Bëngakë batsog a bò a bò ha, bò na: ngë biadzo na: osòò a yob, ayi dzo na: Asu dze hm miandzëki nyè yëbë? 6Ngë bidzo hm ki na: Osòò a bod; bod bësë bayi bia lum ngòg, amu bayëbë ai ngul na Yohannes anë profèt. 7Ndò hm bayalan nyè na bayëm ki mfa ongasò. 8Yesus nyè ai bò na: Ma fë makad ki mina e ngul mabò e mam ma ete.

Nkana afub wayn ai bëbò bisye

Mt 21,33-46; Mk 12,1-12

9Ndò angakèè na aku bod nkana hi: Mod ziṅan gabè afub wayn, avëë dò bod bisye, akëlë a dulu ban mëlu. 10Eyòṅ abog angakui, ndò angalom olò woe abë bod bisye na bëvë nyè mëkoe ya afub wayn. Ndò e bod bisye ba bëngayid nyè, bësoe nyè mò mò. 11Ndò adugan lom olò mfë. E bod ba bëyidi fë tò e nyòlò, bëmgbali nyè, bësoe nyè mò mò. 12Ndò angadugan lom e nyò lala. E bod ba, bëbaa nyè mëvëṅ, bëtsidan nyè. 13Ndò esya-nti afub wayn azu dzo na: Mëbò ya? Mazu lom ndindiṅ mòn wama. Eyòṅ ziṅ na bayi nyè kam. 14Ayen bod bisye bëngayen nyè, bëngalaṅëdan bò a bò ha, bò na: E nyò ṅnyè anë ai elig. Ṅwoan nyè, asu yë na elig ewoge ai bia. 15Ndò bawoa nyè a afub wayn a nsëṅ, bëwoe nyè. Esya-nti afub wayn ayi bò ai bò ya? 16Ayi sò, amana e bod bisye ba ai si, avëë bod bëfë afub wayn. Mbol bëngawog nala, bò na: Tègè ai dzom! 17Ndò abëbë bò, nyè ai bò na: Ebug enë ntilan dzi yatyan ya na: Akòg ya bod mëloṅ bëngawoa a fyè, ndò avëṅan ya akòg ya abug nda#20,17 Bs 118,22? 18E mod osë aku akòg te a yob, ayi mana saṅëban. E nyò ki akòg te aku a yob, layi nyè mana bëgëlan. 19Bësaṅa bëkalara ai bëfada bënen bëngadzëṅ na bafudu nyè mò a nyòl abog te, dzam da bëngambara bod, amu bëngabë bëyëmë na angalèè nkana te otyan ai bò.

Ayaan Kaiser toya

Mt 22,15-22; Mk 12,13-17

20Bëmònò Yesus ha, ndò balom nyè bod a mëkëṅ, bëdzoo na bënë sosoo, asu yë na bënòṅ nyè ebug a anyu, bëzu hm kuan ai nyè a edzoe ai a ngul ngòmëna. 21Ndò basili nyè na: A ṅyëgëlë, biayëm na wakòbò, oyëgëlë fë tëtëlë, ndò fë wabò ki ebom kama, dzam da wayëgëlë zen Zamba a bëbëla. 22Yë biayean yaan ai Kaiser toya, yë biayean ki yaan? 23Mbol angayen mvol dzaban, nyè ai bò na: 24Vaan ma nsaṅ mòni. Obëlë evëgëlë ai nsanan za? Bò na: E bi bi Kaiser. 25Nyè ai bò na: Ndò hm, vaan Kaiser e dzi yawoge ai Kaiser, mivë Zamba e dzi yawoge ai Zamba. 26Ndò bëngabë ki nyè dzam nòṅ ebug a anyu a bod ete, bëngakam eyalan dzie, bëkuu bivol.

Adzo akui-lë sòṅ

Mt 22,23-33; Mk 12,18-27

27Ndò bod bëvòg ya bësadukea bëngasò, (mbò badzo na akui-lë sòṅ a sëki) ndò basili nyè na: 28A ṅyëgëlë, Moses angatil bia na: Ngë manyaṅ mod ziṅ awu, abëlë mininga atoa tègè ai mòn, manyaṅ anòṅò mininga te, na abye manyaṅ bòn ai nyè#20,28 Em 25,5; Ab 38,8. 29Ndò hm babënyaṅ bëngabë zamgbal; e nyò osu angalug mininga, awuu, të ai mòn. 30E nyò bèè fë, 31ai e nyò lala, bëlugu nyè, dzam dëda nala, bò bësë zamgbal, të lig bòn, ndò bëngawu. 32Ndò fë mininga nyè awu a mvus hala. 33Ndò hm, e mininga nyò ayi bò ngal za a akui-lë sòṅ? (Amu bò bësë zamgbal bëngalug nyè)! 34Yesus nyè ai bò na: Bòn ya enyiṅ dzi balug, bëkëlë a mëlug, 35e ba bakyëbë ai dzò bayi bi enyiṅ kòm ai akui-lë sòṅ bëwu, ndò fë bayi ki lug, tò akë a mëlug. 36Amu basëki fë dzam dugan wu, amu bënë anë benglès; mbol bënë bòn bë akui-lë sòṅ, bënë bòn bë Zamba. 37Mfa yë na bëwu bakui a sòṅ, Moses angayëm a nlaṅ ele eyoṅo ndoan, mbol adzo na: Zamba Abraham ai Zamba Isaak, ai Zamba Yakob#20,37 Mb.3,6.15.16. 38Zamba asëki Zamba bëwu, anë e nyò bënyiṅi, amu bësë banyiṅ asu die. 39Ndò bëvòg ya bësaṅa bëkalara bafèd na: a ṅyëgële, okòbò mbëṅ. 40Asu te, bò tègè fë nyè zombo sili nsili ziṅ.

Yë Kristus anë mòn David?

Mt 22,41-46; Mk 12,35-37

41Nyè ai bò na: Eyë bënë dzam dzo ya na Kristus anë mòn David? 42Amu David emen adzo a kalara bësalmen na: Nti angadzo ai Nti wama na: tòbògò ma a mbo-nnomo 43akëlë kui anë mayi dzòdi minziziṅ mie a mëkol moe a si#20,43 Bs 110,1. 44Ṅnyie anë David aloege nyè na Nti, eyë anë dzam bò mòn woe ya?

Yesus akòṅan ai bësaṅa bëkalara

Mt 23,1-36; Mk 12,38-40; Lk 11,37-54

45Bod bësë bëwogo, ndò adzo ai bëyègè boe na: 46Mikalëga bësaṅa bëkalara, bayi na bakë bawulu ai mintòṅ bidud, bëdiṅi na bësug bò a minsëṅ mi angara, bëdiṅi bitoa bi osu a mënda bikoan ai a bëdina, 47mbò bamana dian ai akuma minkus, bëlëdëgë na bakogëlan abui. Bayi bi mfaṅ nkat.

Currently Selected:

Lk 20: NTE12

Označeno

Deli

Kopiraj