Luka 20
20
Jodolo openjo Yesu teko ma en-go
(Mathayo 21.23-27; Mariko 11.27-33)
1Chieng’ moro kane Yesu puonjo ji e Hekalu, kendo lando Wach Maber, jodolo madongo gi jopuonj Chik, kaachiel gi jodong oganda, ne jobiro ire, 2mopenje niya, “Nyiswa ane! Ere teko ma in-go, momiyo itimo gik ma kamagi? Koso ng’ama omiyi teko mar timogi?” 3Yesu nodwokogi niya, “Weuru ane bende apenjue gimoro achiel. Nyisauru ane! 4Teko ma Johana batisogo ji noa kuom Nyasaye koso kuom dhano?” 5Eka jogo nochako wuoyo e kindgi giwegi, ka gipenjore ni, “Ere kaka dwadwoke? Ka wawacho ni teko Johana noa kuom Nyasaye, to obiro penjowa gima omiyo ne ok wayie wach Johana. 6To ka wawacho ni noa kuom dhano, to ji duto man kagi biro chieliwa gi kite, nikech giyie ni Johana ne janabi.” 7Kuom mano ne gidwoko ni ok ging’eyo kuma ne teko Johana oaye. 8Eka Yesu nowachonigi ni, “Ka kamano, to an bende ok anyal nyisou kuma ayudoe teko ma atimogo gigi.”
Ngech jopur maricho
(Mathayo 21.33-46; Mariko 12.1-12)
9 #
Isa 5.1. Bang’e Yesu nogoyo ni ji ngero niya, “Ng’at moro noloso puoth mzabibu. Eka ne oweye e lwet jopur, mi owuok odhi wuoth e piny moro mabor kuom ndalo mang’eny. 10To kane kinde ma olemo ochiekie ochopo, ne ooro jatichme ir jopurgo mondo oomne pokne kuom gik monyak e puodho. To jopurgo nogoyo ng’atno, moriembo gi lwete nono. 11Kuom mano wuon puodho nochako ooro jatich machielo, to en bende jogo ne ogoye, kendo otimone marach, mi oriembe nono. 12Eka nooro jatich mar adek, to mano bende ne gigoyo, mi giriembo. 13Bang’ mano, wuon puodho nopenjore kawacho ni, ‘Koro ere gima koro datim? Ee, ang’eyo gima abiro timo, abiro oro wuoda awuon, nimar kamoro dipo ka gimiye luor.’ 14To kane jopurgo oneno wuodeno, ne giwacho e kindgi giwegi niya, ‘Ma eri e wuod wuon lowo. Wanegeuru mondo lopeni odong’nwa!’ 15Omiyo ne gidhire oko e tok puodho mi ginege.”
Eka Yesu nopenjogi ni, “Koro uparo ni wuon puodho biro timo jopurgo nadi? 16Donge obiro biro, mi oneg jogo, kendo okaw puodho mi omi jopur moko nono?” To kane ji owinjo kamano, ne giwacho ni, “Ngang’! Mano ok nyalre!” 17#Zab 118.22.Yesu norangogi, mopenjogi niya, “To kara, ere tiend weche mondiki e Muma ma wacho ni,
Kidi mane jogedo odagi,
ema koro osedoko kidi motegno moriwo kor ot’?
18Ng’ato ang’ata mopodho kuom kidino notur matindotindo, to ka kidino ema opodho kuom ng’ato to norege ka buru!”
Jo-Farisai openjo Yesu wach golo osuru (Mathayo 22.15-22; Mariko 12.13-17)
19Jopuonj Chik kod jodolo madongo notemo mondo omak Yesu gikanyono, nikech ne ging’eyo ni osegoyo ngerono mana kuomgi, to kata kamano ne giluoro ji mane ni kanyo. 20Omiyo ne girito mondo giyud thuolo maber. Ne gioro jombetre mane owuondore ni joma kare, mondo omake kowinjo kowacho gimoro marach, kendo okete e lwet ruoth. 21Jombetrego nowacho ni Yesu niya, “Japuonj, wang’eyo ni gima iwacho kendo ipuonjo en adier. Bende wang’eyo ni ok iluoro wang’ ng’ato, kata dabed ni en ng’ama nadi, to ipuonjo yor Nyasaye gi adiera. 22To koro, nyiswa ane ka Chikwa oyie mondo wagol osuru ni Kaisar, kata kik wagol?” 23To Yesu noneno kaka gichikone obadho. Omiyo nowacho nigi ni, 24“Nyisauru ane siling’ mondo ane.” Kane gisekelone siling’, nopenjogi niya, “Kidoni gi nying’ man kuom siling’ni gin mag ng’a?” Ne gidwoke ni, “Gin mag Kaisar.” 25Eka Yesu nowachonigi niya, “Kara chiwuru ni Kaisar gi Kaisar to gi Nyasaye chiwuru ni Nyasaye!” 26Kamano ne ok ginyal make kata gi wach achiel e nyim ji kanyo, omiyo ne giling’ thi, ka giwuoro dwokone!
Jo-Sadukai openjo Yesu wach chier (Mathayo 22.23-33; Mariko 12.18-27)
27 #
Joote 23.8. Jo-Sadukai moko nobiro ir Yesu. (Gin e joma wacho ni chier ongee) Ne giwachone niya, 28#R.Chik 25.5.“Japuonj! Musa nondikonwa Chik ni ni ka ng’ato otho, mi oweyo chiege ka onge nyathi, to owadgi nyaka kaw chiegeno, mondo onywolnego nyithindo. 29To koro ne nitie owete abiriyo. Wuowi maduong’ nokendo dhako, to otho ka ok onywolo nyathi. 30Eka owadgi maluwe notero chiegeno, 31kendo mar adek bende. Mano e gima notimore ni owete abiriyogo duto, to giduto ne githo ka ok ginywolo nyithindo. 32Bang’e dhakono bende notho. 33To koro, chieng’ chier, to dhakono nobed chi ng’a kuomgi, ka ji abiriyogo duto nokende kamano?”
34Yesu nodwokogi niya, “Chwo gi mon mae pinyni kendore, 35to chwo gi mon moyier mondo ochopi e piny mabiro, kendo ochier kuom joma otho, ok kendre. 36Adier ok ginyal tho kendo, nikech gichal gi malaika, kendo gin nyithind Nyasaye, nimar gin joma osechier. 37#Wuok 3.6.To kata mana Musa bende onyiso maler ni joma otho chier, nikech kusomo wach bungu maliel, to ubiro neno ni oluongo Ruoth Nyasaye ni Nyasach Ibrahim, gi Nyasach Isaka, kod Nyasach Jakobo. 38To wang’eyo ni ok en Nyasach joma otho, to en Nyasach joma ngima, nikech e nyim Nyasaye, ji duto ngima.”
39Eka jopuonj Chik moko nowacho niya, “Idwoko maber, japuonj.” 40Ne giwacho kamano nikech ne ok ginyal hedhore penje weche moko kendo!
Yesu openjo ji wach kuom Mesia (Mathayo 22.41-46; Mariko 12.35-37)
41Yesu nopenjogi niya, “Ere kaka ji wacho ni Mesia nobed nyakwar Daudi, 42#Zab 110.1.ka Daudi owuon to owacho e kitap Zaburi niya,
‘Ruoth Nyasaye nowacho ni Ruodha ni,
“Bed e bada korachwich ka,
43nyaka chop aket wasiki obed raten tiendi.” ’
44Kamano waneno ni Daudi ema luongo Mesia ni Ruoth. Koro ere kaka Mesia dibed nyakwar Daudi?”
Yesu osiemo ji ni kik luw timbe jopuonj Chik (Mathayo 23.1-36; Mariko 12.38-40)
45Kane oyudo ji duto winjo weche Yesu, nowacho ni jopuonjrene niya, 46“Beduru motang’ ni jopuonj Chik, ma ohero wuotho gi lewni maboyo, kendo mohero mondo ji omosgi kamiyogi duong’ kuonde ma ji ochokoree, bende mohero kombe ma nyime e ut lemo, kendo mohero kuonde moyiedhi e sewni. 47Gin joma yako ut mond liete, ka giriasore gi lemo moyware. Gininwang’ kum marach moloyo!”
Currently Selected:
Luka 20: DHO15
Označeno
Share
Copy
Want to have your highlights saved across all your devices? Sign up or sign in
Dholuo DC Bible © Bible Society of Kenya and Bible Society of Tanzania, 1976.