Chakruok 4
4
Kain kod Habil
1Adam noriwore gi Hawa chiege, mi Hawa nomako ich, monywolo Kain. Eka nowacho niya, “Aseyudo wuowi kuom ng’wono mar Ruoth Nyasaye.” 2Bang’e nonywolo Habil omin Kain. Habil nodoko jakwath, to Kain nodoko japur.
3Chieng’ moro Kain nokelo cham moko ma nosekayo e puothe, mochiwo ni Ruoth Nyasaye. 4#Hib 11.4.Habil bende nokelo jambe ma nokwong nywol. Noyang’o mochiwo bochegi ni Ruoth Nyasaye. Ruoth Nyasaye nobedo mamor gi Habil kod chiwone, 5to nodagi Kain kod chiwone. Omiyo mirima nomako Kain, mokecho ahinya. 6Ruoth Nyasaye nopenje niya, “Ang’o momiyo ikecho, kendo wang’i ojuol? 7Kitimo maber, donge diyieni? To kitimo marach, to richo okichore e dhoodi, mondo oloyi. To in nyaka item matek mondo iloye.”
8 #
Math 23.35; Luka 11.51; 1 Joh 3.12. Kain nowacho ni Habil omin mare ni mondo gidhi giba, to ka ne gisedhi e thim kuma bor gi dala, nogoyo Habil monego. 9Bang’e Ruoth Nyasaye nopenje niya, “Ere Habil owadu?” Kain nodwoke niya, “Ok ang’eyo. An jakwadhe ma dang’e kuma entie?” 10#Hib 12.24.Ruoth Nyasaye nopenje kendo niya, “Ang’o misetimoni? Winji! Remb owadu misechuero ywakna e lowo. 11Omiyo koro in ng’ama okuong’, kendo oriemb e lowo ma nong’amo dhoge, momadho remb owadu misechwerono. 12Chakre tinende, kipuro lowo, to ok nonyagni cham, kendo inibed jabayo ma onge gi kar dakne e piny ka.” 13Kain nodwoko Ruoth Nyasaye niya, “Isemiya kum mohinga. 14Iseriemba e nyimi, kendo e lowoni. Anabed jabayo ma onge kama odakie e pinyni, kendo ng’ato ang’ata moyuda nyalo nega.” 15To Ruoth Nysaye nodwoke niya, “Ooyo, ng’at monego Kain nochulne kuor nyadibiriyo.” Omiyo Ruoth Nyasaye noketo kido moro kuom Kain ni mondo ng’at ang’ata moromo kode kik nege. 16Eka Kain noa e nyim Ruoth Nyasaye, modhi odak e piny miluongo ni Nod, yo wuokchieng’ mar Eden.
Nyikwa Kain
17Kain noriwore gi chiege, mi chiege nomako ich, monywolo Enoka. Eka Kain nogero dala maduong’ mochako Enoka wuode. 18Enoka nonywolo Irad, to Irad nonywolo Mehujael. Mehujael nonywolo Methushael, to Methushael nonywolo Lamek.
19Lamek nokendo mon ariyo, ma nyinggi Ada gi Zila. 20Ada nonywolo Jabal mane kwar jokwath modak e hema. 21Ne en gi owadgi ma nyinge Jubal, mane kwar joma goyo thum gi asili. 22To Zila chi Lameck machielo nonywolo Tubal-Kain, mane kwar jotheth mula gi nyinyo. Ne en gi nyamin mare ma nyinge Naama.
23Lameck nowacho ni monde niya,
“Ada gi Zila, winjuru dwonda.
Monda, winjuru gima adwaro wacho.
Asenego ng’ato nikech nohinya.
Asenego wuowi nikech nogoya.
24Ng’at ma nohiny Kain,
nochulne kuor nyadibiriyo,
to ng’at ma chieng’ nohinya,
nochulne kuor nyadi piero abiriyo gabiriyo!”
Nyikwa Seth
25Adam nochako oriwore gi chiege, mi chiege nonywolo wuowi moro, mochako ni Seth, (tiende ni, mich,) nikech Nyasaye nosemiye wuowino kar Habil mane Kain onego. 26Seth bende nonywolo wuowi mochako ni Enos. E kindeno ema ne ji ochako luongoe Nyasaye ni Jehova ka gilame.
Currently Selected:
Chakruok 4: DHO15
Označeno
Share
Copy
Want to have your highlights saved across all your devices? Sign up or sign in
Dholuo DC Bible © Bible Society of Kenya and Bible Society of Tanzania, 1976.