Genesis 1
1
Godalu Uwankara Palyantja
1Kuwaripatjara mulapa Godalu ilkaṟi munu manta palyaṉu uwankara wiyangka. 2Palu manta uwankara uḻṯu ngaṟangi, ka uṟu kutju tjiwariwari ngaringi puḻka mulapa, ka mungawaḻuṟungku tjutuningi. Ka Godaku kurunpa para-ngaṟangi uṟungka katuwanu. 3Palulanguṟu Godalu wangkangu, “Kaḻaḻari!” Ka kaḻaḻaringu. 4Ka kaḻaḻarinyangka nyakula Godanya pukuḻaringu wiṟu mulapa ngaṟanyangka. Munu paluṟu mungawaḻuṟu munu kaḻaḻa tiṯutiṯuṉu, 5munu ininu “Munga”, munu “Kaḻaḻa”. Ka kaḻaḻa ngaṟala mungartjirira mungaringkula piṟuku ngalya-tjiṉṯuringu.
6-7Ka Godalu piṟuku wangkangu, “Uṟu pala tjarariwa munu katu tjaṟu ngarima ka nguṟurpa aḻa puḻka ngaṟama.” Ka paluṟu wangkanyangka mulapaṯu tjararingu, panya Godalu wangkangku uṟu tjaraṉu munu katu tjaṟu ngarinytjaku wangkangu munu nguṟurpa aḻa puḻka ngaṟanytjaku. 8Munu tjaraṟa wiyaringkula paluṟu aḻa panya nguṟurpa ngaṟanytja ininu “Ilkaṟi.” Ka tjiṉṯu nyanga kutjaritja mungartjirira mungaringkula ngalya-tjiṉṯuringu.
9Ka Godalu wangkangu, “Uṟu pala puḻka tjaṟu ngarinytja ma-kitikitiriwa ka manta utiriwa.” Ka mulapaṯu alatjiringu Godalu wangkanyangka. 10Ka manta utiringkunyangka Godalu ininu “Manta”, munu paluṟu uṟu kitikitiringkula ngarinyangka ininu “Uṟu Puḻkanya”. Munu paluṟu pukuḻaringu wiṟu mulapa ngaṟanyangka. 11-12Munu palulanguṟu wangkangu, “Mantangka ukiṟi tjuṯariwa munu puṉu kutjupa kutjupa tjuṯa kuḻu pakala, puṉu uṉinypatjara munu puṉu maitjara tjuṯa kuḻu uṉinypa walytjatjara walytjatjara.” Ka mulapaṯu pakaṉu ukiṟi puṉu kutjupa kutjupa tjuṯa mulapa uṉinypa walytjatjara uwankara. Ka Godanya nyakula pukuḻaringu wiṟu mulapa ngaṟanyangka. 13Ka tjiṉṯu nyanga maṉkuritja mungartjirira mungaringkula ngalya-tjiṉṯuringu.
14-16Ka Godalu wangkangu, “Ilkaṟingka pala tili tjuṯa utiriwa nyinara manta irnyantjikitja kutju kaḻaḻaku, kutjupa tjuṯa mungaku.” Munu Godalu tili puḻka kutjara tjunu, kutju puḻka mulapa ini tjiṉṯu kaḻaḻa irnyantjaku, munu kutjupa tjuku nguwanpa ini piṟa mungangka irnyantjaku. Munu paluṟu kililpi tjuṯa mulapa ilkaṟingka tjunu mungangka irnyantjaku. Munu Godalu wangkangu, “Tili nyanga palula tjanalanguṟuya aṉangu tjuṯangku nyakula kulilku tjiṉṯuringkunyangka munu mungaringkunyangka munuya piṟa ma-ngarinyangka nyakula kulilku piṟa kutju ngaṟala wiyaringkunytja, munuya palulanguṟu kuḻi, nyiṉnga, piriyakutu kuḻu ngurkantankuku.” Ka mulapaṯu uwankara alatjiringu Godalu wangkanyangka. 17-18Panya paluṟu tili tjuṯa ilkaṟingka tjunu manta irnyaṟa utintjaku, tjiṉṯungku pakaṟa irnyaṟa kaḻaḻankunytjaku, piṟa kililpi tjuṯa mungangka irnyantjaku. Alatji paluṟu tili tjuṯa tjunu munga kaḻaḻa tiṯutiṯu rawa ngaṟanytjaku. Munu paluṟu nyakula pukuḻaringu wiṟu mulapa ngaṟanyangka. 19Ka tjiṉṯu nyanga kutjara kutjaritja mungartjirira mungaringkula ngalya-tjiṉṯuringu.
20Ka Godalu wangkangu, “Pala uṟungka unngu kuka tjuṯa utiringkula tjuṯariwa antipina kutjupa kutjupa tjuṯa mungilyi mulapa, waṉampi tjuṯa, uṟu unngutja kutjupa kutjupa uwankara. Munu ilkaṟingka tjuḻpu kutjupa kutjupa tjuṯa parpakaṟa para-ngaṟama mungilyi mulapa.” 21Alatji Godalu wangkangku palyaṉu waṉampi kutjupa kutjupa puḻka tjuṯa munu antipina kutjupa kutjupa tjuṯa, uṟu unngutja uwankara paluṟu tjunu uṟungka unngu para-ngaṟanytjaku. Munu paluṟu ilkaṟingka para-ngaṟanytjaku tjuḻpu kutjupa kutjupa uwankaraṯu tjunu. Munu paluṟu nyakula pukuḻaringu wiṟu mulapa ngaṟanyangka. 22Munu paluṟu tjananya uwankara pukuḻmanu wangkara, “Kuḻunytjararingkulayanku tjuṯaringama. Uṟu unngutja tjuṯa uṟungka mungilyirira lipiringama, kayanku tjuḻpu tjuṯa kuḻu mantangka tjuṯaringama.” 23Ka tjiṉṯu nyanga maṉkur-kutjaritja mungartjirira mungaringkula ngalya-tjiṉṯuringu.
24Ka Godalu wangkangu, “Mantangka utiringkula ngaṟama para-ngaṟapai kutjupa kutjupa tjuṯa, panya kuka tjuṯa, munu kuka wiya tjuṯa kuḻu, ngultju tjuṯa munu inuṟa tjuṯa, puḻka tjuṯa munu tjukutjuku tjuṯa kuḻu, tjuninguṟu ankupai tjuṯa kuḻu utiringkula para-ngaṟama.” Ka mulapaṯu alatjiringu. 25Godalu mantangka para-ngaṟapai kutjupa kutjupa uwankara palyaṉu, inuṟa kutjupa kutjupa tjuṯa, ngultju kutjupa kutjupa tjuṯa, munu tjukutjuku tjuṯa kuḻu, tjuninguṟu ankupai tjuṯa uwankara mulapa. Munu paluṟu uwankara nyakula pukuḻaringu wiṟu mulapa ngaṟanyangka.
26Palulanguṟu Godalu wangkangu, “Wanyula nganaṉanku puṟunypa aṉangu palyala nganaṉa puṟunypa nyinanytjaku.#1:26 Nganaṉa panya wati, minyma, tjitji tjuṯa kuḻu wangkapai aṉangu tjuṯa nganampa wangkangku, palu Jew tjuṯangku tjanampa wangkangku adam wangkapai panya wati ngaṉmanyitjaku ini puṟunypa. Kaya aṉangu paluṟu tjana kuka uwankaraku mayatja ngaṟaku antipina tjuṯaku, tjuḻpu tjuṯaku, mantangka para-ngaṟapai uwankaraku, puḻka tjuṯa munu tjukutjuku tjuṯaku kuḻu.” 27Munu mulapaṯu Godalu aṉangu paluṉu paluṟunku puṟunypa. Ka paluṟu pula wati munu kungka. 28Munu Godalu pulanya pukuḻmanu alatji wangkara, “Nyupali tjitji tjuṯatjararingama, kaya nyupalilanguṟu walytja tjuṯaringama munuya manta winkingka ma-mungilyirira nyinama maḻatja maḻatja, munuya ngura tjuṯa mulapa palyanma tjiwariwari pukuḻpa palya nyinanytjikitjangku. Munuya kutjupa kutjupa uwankara mayatjangku kanyinma, antipina tjuṯa, tjuḻpu tjuṯa, kuka tjuṯa, mantangka para-ngaṟapai uwankara kuḻu tjunguṟa.”
29“Munu nyawa! Ngayulu ukiṟi uṉinypatjara kutjupa kutjupa uwankara, puṉu maitjara kutjupa kutjupa uwankara, mai mantatja uwankara kuḻu mantangka tjunu nyura ngalkula paḻtjaringkunytjaku. 30Munu ngayulu mai ukiṟi, mai parka puḻka mulapa mantangka tjunu kukangku, tjuḻpungku, mantangka para-ngaṟapai uwankarangku ngalkuntjaku.” Ka mulapa alatjiringu Godalu wangkanyangka. 31Ka Godalu uwankara palyantjatjanungku nyakula pukuḻaringu uwankara wiṟu mulapa ngaṟanyangka. Ka tjiṉṯu nyanga maṉkur-maṉkuritja mungartjirira mungaringkula ngalya-tjiṉṯuringu.
Currently Selected:
Genesis 1: PITJ
Označeno
Share
Copy
Want to have your highlights saved across all your devices? Sign up or sign in
© Bible Society Australia