Imbombo 4

4
U Pitala nu Yohani pamaso pa balongi aba Chiyuda
1Bo u Pitala nu Yohani bachili bakunena na bantu, abaputi bamo nu songo uwa basilikali aba mu Nyumba iya Chala, naba Sadukayi bamo bakafika. 2Bakakalala pachifukwa ichakuti abatumiwa babili bala bakabamanyisyanga abantu ukuti u Yesu azyukite kubufwe, chicho chikasimikizyanga ukuti abafwe bakwiza pakuzyuka nukuba nubumi sona. 3Po bakabalema nukubighalila mujele mupaka indabi yache pakuti kukaba ukuti kwila kale. 4Loli abinji babo bakivwa amazyu bakasubila. Sona ubwinji ubwa bitiki bukonjelela pakufika pa 5,000.
5Indabi yache abalongozi aba Chiyuda, abasongo na bamanyisi aba Ndaghilo bakabungana mu Yelusalemu. 6Bakakomana nu muputi usongo u Anasi poka nu Kayafa, nu Yohani, nu Alikizandala, sona na bamwabo babo bakaba bamunyumba iya muputi usongo. 7Bakabimika abatumiwa pamaso papabo nukubalalusya ukuti, “Nkimba mukabomba bulibuli chinichi? Nkimba muli na maka ghoni, pamo mukabombelagha mwitabwa ilya wenu?”
8U Pitala bo izuye nu Muzimu Umuzelu, akabamula akati, “Mwe balongozi aba bantu na basongo; 9nanti tukulalusiwa ilelo nizya mbombo inyiza yiyo yikabombiwa pa muntu umulemazu namumo akapolela, 10po mwebosi, sona naba Izilayeli bosi mumanyaye ukuti umuntu uyu imiliye pamaso papinyu apola ukwendela mumaka agha itabwa ilya Yesu Kilisitu uwamu Nazaleti yuyo mukamukomela pachipinjika, loli u Chala akamuzyusya kubufwe. 11#Mas. 118.22U Yesu weyuyo Amasimbo ghakuti,
‘Ibwe lilyo mwe bazenga nyumba mukalikana,
ilelo lyaba lyakulondiwa nkani ukuchila amabwe ghosi.’
12Mumwache mwene momumo muli ubupoki pakuti pachisu chosi ichapasi nayumo umuntu yuyo u Chala atupiye ukuti angatupoka.”
13Abalongi bala bakaswigha pakwennya ubujivu ubwa Pitala nu Yohani, nukuzyaghannya ukuti bakaba bantu bulo, babo batakaba nu bumanyi nabumobumo. Po bakazyaghannya ukuti bakabanga poka nu Yesu. 14Loli chitakabapo nachimochimo ichakunena pakuti bakamwennya umuntu, yuyo akapola imiliye palapala poka nu Pitala nu Yohani. 15Po bakababuzya ukuti bepemo munyumba yiyo bakalongelaghamo inongwa, po bakanda pakunenezannya benebene. 16Bakalalusya bakati, “Nkimba tubombe ichoni na bantu aba? Pakuti abantu bosi mu Yelusalemu bazimenye ukuti ichika ichikulu ichi chabombiwa nabo, sona tutangachikana. 17Pakunyila ukuti ipangwi ili lingasata pakasi pabantu, zagha tuboghofye ukuti batakanenepo sona nu muntu yumo mwitabwa ilya Yesu.”
18Po bakabitizya nukubachinyintizya ukuti batakanenepo pamo ukumanyisya mwitabwa ilya Yesu. 19Loli u Pitala nu Yohani bakabamula bakati, “Mulonge mwebene, nkimba choni chicho chizapo pamaso pa Chala—ukubivwila amwe pamo ukumwivwila u Chala? 20Pakuti tutangaleka pakunena zizyo twiyenezya na maso ghitu, sona nukwiyivwila na makutu ghitu.” 21Po abalongi bakabasoka nkani nukubaleka ukuti babukaye. Bakennya ukuti chitakababaghila ukuti bafundiwanje pakuti abantu bosi bakamupalizyanga u Chala pavivyo vikabombiwa. 22Umuntu yuyo ichika chikabombeliwapo papache akaba na maka aghakuchila pa 40.
Abitiki bakwiputa ukuti babanje bajivu
23Bo u Pitala nu Yohani basatuliwa, bakanyokela ku kabukatila kabo nukubabuzya zizyo abaputi abasongo na balongozi aba Chiyuda banenite. 24#Ukf. 20.11; Neh. 9.6; Mas. 146.6Bo bivwa zinizi, bosi bakaba poka munyiputo kwa Chala nukuti, “Wee Mwene Uwamaka Ghosi ukapela kumwanya ni chisu ichapasi ni nyanja sona na vyosi vivyo vili mulamula! 25#Mas. 2.1-2Nu Muzimu Umuzelu ukanena ukwendela mu munyenya witu u Devedi, umubombi wako ukati,
‘Nkimba abantu babo bate ba Yuda bakakalala choni.
Nkimba choni chicho abantu bakabatikagha ivyamwalwe?
26Abamwene aba muchisu ichapasi bakiyannya bene
sona abalaghili bakabungana poka
pakumusambukila u Mwene nu Mupakiwa wache?’
27 # Mat. 27.1-2; Mlko. 15.1; Luk. 23.1, 7-11; Yoh. 18.28-29 “Naloli, u Helodi nu Pontiyo Pilati bakakomana poka mukaya akakulu nkani kanaka na bantu babo bate ba Yuda, naba Izilayeli pakumusambukila u Yesu, umubombi wako umuzelu, Umupoki yuyo ukamupakazya pakuba we Mwene. 28Bakabungana poka pakubomba vyosi vivyo awe na maka ghako, sona nu bwighane bwako ukabatika ukuti vikwiza pakubombiwa. 29Polelo Mwene, wenelezye mumo bakutoghofesezya, po utwavwe aswe twe, babombi bako, pakulumbilila amazyu ghako nu bujivu nkani. 30Gholosya inyobe yako nukupozya abantu, sona witikizye ukuti ivimanyilo ni viswigho vibombiwe ukwendela mwitabwa ilya Yesu, umubombi wako umuzelu.”
31Bo bamala pakwiputa, ubuzilo bubo bakakomanaghapo bukayingana. Bosi bakizula nu Muzimu Umuzelu nukwanda pakulumbilila amazyu agha Chala nu bujivu nkani.
Abitiki bakugabana ivintu vyabo
32 # Imbo. 2.44-45 Akabukatila kosi aka bitiki kakaba ni nyinong'ono nu moyo ghoka. Nayumo umuntu uwa bantu banaba akanena ukuti ivintu vivyo akaba navyo, vyache mwene, loli bosi bakagabana vyosi vivyo bakaba navyo. 33Na maka amakulu nkani abatumiwa bakendelela pakusimikizya nizya kuzyuka kubufwe ukwa Mwene u Yesu. Po u Chala akapungulila ulusayo ulukulu nkani pa bosi. 34Atakabamo nayumo umuntu umupotwe mukabukatila kabo yuyo akasobeliwanga pakuti bamo babo bakaba ni nyumba na maghunda bakaghulizyanga nukubapa abatumiwa indalama zila. 35Po indalama zila bakagabila abatumiwa ukuyana namumo umuntu akasobeliwanga.
36Ukuyana namumo u Yosefu uwaluko ulwa Levi uwamu Sayipulasi, yuyo abatumiwa bakamwitizya ukuti Balanabasi (chicho chikung'anamula ukuti, “Yuyo akubakazya abamwabo.”) 37Akaghulizya umughunda wache, akiza ni ndalama nukubapa abatumiwa.

Currently Selected:

Imbombo 4: LMBNT2016

Označeno

Deli

Kopiraj

None

Want to have your highlights saved across all your devices? Sign up or sign in