Imbombo 2
2
Ukwiza ukwa Muzimu Umuzelu
1 #
Lev. 23.15-21; Ukk. 16.9-11 Pisiku ilya Pentekositi abitiki bosi bakabungana poka munyumba. 2Umwakuchenusya bulo ichongo chikivwika ngati yo mpepo iyamaka iyakukuka ukufuma kumwanya nukwizula munyumba yosi mumo bakikalagha. 3Po bakennya vimo vivyo vikaba ngati zyo ndimi izya moto zizyo zikanyampana nukumupalamasya umuntu wesi yuyo akaba mulamula. 4Bosi bakizula nu Muzimu Umuzelu nukwanda pakunenela mundimi injeni ukuyana namumo u Muzimu akababuzizya pakunena.
5Palapala pakabapo aba Yuda babo bakikalagha mu Yelusalemu, abantu abakumwiputa u Chala, babo bakafuma muvyisu vyosi ivyapasi. 6Bo bivwa ichongo chila, ichilundilo ichikulu chikabungana. Bosi bakaswigha pakuti umuntu wesi mumwabo akivwa abitiki bakunenela muneno iyabo ni yabo. 7Bakaswigha nkani, sona chikabamala nkani amahala, po bakanena bakati, “Abantu banaba babo bakunena bunubu bate ba Galileya? 8Nkimba zili bulibuli, ukuti twebosi twivwe bakunenela muneno izyitu ni zyitu? 9Twe bamo twafuma ku Palitiya naku Mediya naku Elamu naku Mesopotamiya, naku Yudeya naku Kapadokiya naku Ponti naku Asiya 10ku Filigiya naku Pamfiliya, kuchisu icha Ijiputi na muvigaba ivya Libiya, papipi nu Kileni. Twe bamo twafuma ku Loma, 11aba Yuda na bantu babo bate ba Yuda babo bakapindukila ku Chiyuda, sona twe bamo twafuma ku Kileti na ku Alebiya—loli twebosi tukubivwa bakunena ineno izyitu ni zyitu izya vintu ivikulu vivyo u Chala abombite!” 12Bakaswigha nkani, sona chikabamala nkani amahala, nukulalusannya ukuti, “Nkimba ichi chikung'anamula choni?”
13Loli bamo bakabaseka abitiki nukuti, “Abantu banaba bakolizwe!”
Ubulumbilili ubwa Pitala
14Po u Pitala akimilila poka na batumiwa abamwabo 11 bala. Akanena na mazyu agha pamwanya akati, “Mwee ba Yuda na mwebosi mwe mukwikala mu Yelusalemu, teghelezya kuno muleke imbabuzye ukuti ichi chikung'anamula choni. 15Abantu banaba batakolizwe ukuyana namumo mukubinong'onela pakuti aka ko kabalilo aka nayini koloko pandabindabi. 16Loli izi zyo zizyo umulaghuzi u Yoweli akanena akati,
17 #
Yow. 2.28-32
‘U Chala akati: Izi zyo zizyo nkwiza pakubomba mumasiku aghabumalilo,
nkwiza pakupungulila Umuzimu wane pabantu bosi.
Abana binyu abalumendo na balindu bakwiza pakulaghula,
abaghosi bakwiza pakulota ivilota,
bope abalumendo bakwiza pakwennya ivisetuka.
18Pakabalilo kalakala nkwiza pakupungulila Umuzimu wane,
pa bambombo bane abanavuli na bakolo bulo,
nukulaghula amazyu ghane.
19Nkwiza pakubomba iviswigho kumwanya
nukubomba ivyika pachisu ichapasi.
Kukwiza pakuba ibanda, umoto ni lyosi ilyinji;
20izuba likwiza pakuba ni chisi,
umwezi ghukwiza pakuba muchesamu ngati lyo libanda,
bo isiku ikulu ilya buchindamu ubwa Mwene litafikite.
21Umuntu wesi yuyo akulabila mwitabwa ilya Mwene
akwiza pakupokiwa.’
22“Mwee ba Izilayeli, ivwa kuno! U Yesu uwamu Nazaleti akaba muntu yuyo imbombo zyache izyamaka zikalanjiziwa nukusimikiziwa nu Chala kukwinyu muvyika vyosi ni viswigho vivyo u Chala akabombelagha mumwache. Amwe mwebene muzimenye zinizi pakuti zikabombiwa pakasi papinyu. 23#Mat. 27.35; Mlko. 15.24; Luk. 23.33; Yoh. 19.18U Yesu akapeghiwa kukwinyu ukuyana namumo u Chala akabatikila nukwinong'onela zila. Amwe mukamughogha pakumubika munyobe izya bambibi ukuti akomeliwe pachipinjika. 24#Mat. 28.5-6; Mlko. 16.6; Luk. 24.5Loli u Chala akumuzyusya kubufwe nukumuleka musatuke kumaka agha bufwe, pakuti zitakaba zyakuti zingabombiwa ukuti ubufwe bumupote. 25#Mas. 16.8-11Pakuti u Devedi akanena nizya yunuyu akati,
‘Nkamwennyanga akabalilo kosi u Mwene pamaso papane,
pakuti ali kunyobe yane indilo, po ntakwiza pakuyingana.
26Polelo umoyo wane wahoboka,
sona umuzimu wane ghukusekela.
Ubumi bwane pachisu ichapasi buli nu lusubilo.
27Pakuti utakwiza pakundeka muchisu icha bantu abafwe,
sona utakwiza pakwitikizya ukuti ne mubombi wako umusubiliwa imbolaye.
28Wandanjizya izila iyakubukila kubumi,
sona ukwiza pakunyizuzya nu buhobosu pamaso papako.’
29“Mwee bakamu bane, imbaghiye imbabuzye pabuzelu izya munyenya witu u Mwene u Devedi. Akafwa nukusyiliwa, po ipumpa lyache lili kuno naswe mupaka pisiku ili. 30#Mas. 132.11; 2 Sam. 7.12-13Akaba mulaghuzi, sona akazimanya zizyo u Chala akamulayizya: U Chala akalapa ukuti weka uwaluko lwache akwiza pakupyana ubumwene bwache. 31U Devedi akennya zizyo u Chala akaya pakumubombela muntazi, po akanena izya kuzyuka kubufwe ukwa Kilisitu, bo anena ukuti,
‘Batakamuleka muchisu icha bantu abafwe;
umuvimba wache ghutakabola mwipumpa.’
32“U Chala akamuzyusya u Yesu yunuyu kubufwe, twebosi twe bakaboni ba vintu vinivi. 33U Yesu akakweziwa nukwikala kunyobe indilo iya Chala, akapokela u Muzimu Umuzelu yuyo Uwise akalayizya. Vivyo mukuvyennya nukwivwa ivyabupi vyache vivyo vyapunguliliwa papitu. 34#Mas. 110.1Pakuti ate we Devedi yuyo akakwela kumwanya, loli umwene akati,
‘U Mwene akamubuzya u Mwene wane akati:
Ikala apa kunyobe yane indilo
35mupaka imbabike abalwani bako
kusi kunyayo zyako.’
36“Ilelo aba Izilayeli bosi naloli bamanyaghe ukuti u Yesu uyu, yuyo mukumukomela pachipinjika, weyuyo u Chala amubika pakuba we Mwene, sona we Kilisitu!”
37Bo abantu bivwa zinizi, bakapalamasiwa mumoyo, po bakamulalusya u Pitala na batumiwa abanji bakati, “Bakamu bitu, nkimba tubombe choni?”
38U Pitala akababuzya akati, “Mwebosi mupinduke nukuzileka imbibi zyinyu nukoziwa mwitabwa ilya Yesu Kilisitu. Po u Chala akwiza pakubahobokela imbibi zyinyu, nukupokela ichabupi icha Muzimu Umuzelu. 39Pakuti u Chala akabalayizya ichi amwe poka na bana binyu, sona na bantu bosi babo bali kubutali—abantu bosi babo u Mwene u Chala witu akwiza pakubitizizya kukwache.”
40U Pitala akababuzya na mazyu aghanji aghakubasoka akati, “Mwipoke mwebene ku lufundo lulo lukwiza pabantu ababibi abankulilo iyi!” 41Po abantu abinji bakasubila amazyu ghache nukoziwa. Pisiku lilalila abantu abakukwana 3,000 bakonjeleziwako ku kabukatila kabo. 42Bakabika umoyo wabo pa vimanyisyo vivyo abatumiwa bakamanyisyanga, bakaba mubupoka nukumenyannya ichibama pakumukumbuka u Mwene, sona bakaba poka munyiputo.
Mumo abitiki bakikalilagha
43Abantu bosi bakizula nubogha pachifukwa icha vyika ivyinji ni viswigho vivyo vikabombiwanga na batumiwa. 44#Imbo. 4.32-35Abitiki bosi bakendelela pakuba mubupoka nukugabana ivintu vivyo bakaba navyo. 45Bakaghulizyanga amaghunda ghabo na vivyo bakaba navyo nukugabana indalama ukuyana namumo umuntu wesi akasobeliwanga. 46Isiku ni siku bakakomanagha pakabukatila mu Nyumba iya Chala, nukumenyannya ichibama poka munyumba zyabo, bakalyanga mubuhobosu na moyo aghakwiyisya, 47pakumupalizya u Chala, sona abantu bosi bakahoboka nabo. Isiku ni siku u Mwene akonjelezyanga ku kabukatila kabo abantu babo bakapokiwanga.
Currently Selected:
Imbombo 2: LMBNT2016
Označeno
Deli
Kopiraj
Want to have your highlights saved across all your devices? Sign up or sign in
The copyright is jointly and equally held by:
©️ The Bible Society of Malawi, 2014
©️ The Word for the World International, 2014
Več o prevodu Ulufingo Ulupya