MARK 7
7
Jisue lüsiküseko mu Phariseeko künga küsü
1Sülize Phariseeko mu Lüsiküseko humi Jerusalem lüno tavori Puce künguyi. 2Mu pukoe Pu sadziko humi ube mütümo die tsükhrüda ti küba ngo die thata. 3Kükrelamori, Phariseemiko mu Jewmi koe mülhimiko zho müdzi die ube mütü kümothe mhati mhakra yo mo tila. 4Süla pukoe lhethothi kolü ta die vori lize puko khrü kümüsa va kümothe mhati mhakra yomo. Süzo kümo ukrü zho kükre kükrori ngopüh züh tayo: süko ukhu uhe mu ule, müsüh püh küthi mhabühko mu mez kükhrü biti zhoko züh tayo. 5Süsa Phariseeko mu lüsiküsekoe Pu kütso die; dipüh la n sadzikoe ube mütümo die mhati die pethimi zhoko varhü tatale? Zita. 6Pue süko zü küla die sü; Isaiah sadzühküseoe neko küthürakütiko hila; hihibi die tho nve shüh püh müta. Thüma hiko u takhülü a rhoyo, eli uko lün azüh kümücu tayo. 7Ukoe thüma celün ngo küyi kümütha züko püh mi mütha die uko a rüsu thüdo thi tayo. 8Nekoe pooe khaküsü zhoko khava die thüma celün küyie püh küvori zhoko: sükosü le mükhu tühe khrü küti zhoko mu süsübi küti kükro züh tayo, zita. 9Mu Pu puko yisü, Nekoe netho nezhoko züh ba küta la Pooe zü khaküsüko khava vayo. 10Mosae poküti, Npo nzu rhoyite, mu upo uzu rüshu kütio posa tate, ziyo. 11Eli nekoe po küti; mhaceno mipühe pupo mori pu zu yisü; Korban te, süosü acelü nve küyi müsühko püh Poo prüve zi küsüce puyo mhapühri thi mota die pu khasü vayo. 12Mu süo pupo puzu la mhapühri thisü mo tayo. 13Sidie ne zho kha küsüko la Poo züko khi püh puco küdi thiva yo, Mu nekoe süsü bi ti kükre thi tayo. 14Sidie Pu makroo ci püh Puce süyi die sü, mütüko a khü rünyiyi die seyite; 15Shozuco no thüma lü lütiko pühri thüma va mürho vayomo, eli mha pu lüno küprariko sükosü thüma va mürho vayo. 16Thüma kühopühri uni ne die rüniyi kütomi po rüniyite, zita. 17Süze Pu thüma kroo lüno tasü ce pühlü lü küyice Pu sadzikoe züve süo co kütso ta. 18Mu Pu süko yisü, nekori mha se kükreyi mozo me? Shozuco no püh thüma lülü tikoe thüma va mürho va yomo. 19Kükrelamori, sükosüe pu mülü lü mo die pu vadelü vo tayo, sidie mha mütü thi kümüsa va die putho pusho müsühlü laprari tayo küti nekoe se mo me? 20Mu Pue podie; thüma lüno küprari kosü mi thi mürho vayo. 21Kükrelamori, thüma lüno küprari kosü, lüdoküsu, kükhrüküzüh küti, kürüzü. 22Küdokhri, kürüyo, mhakümüho, ugwiküne, küphoma külü, müho münyi küti. 23Mi ngo umhü külo, Poo kütha, kümüko, kübado, mhaküsü hikohi mütü thüma lüno prari die thüma thi müsu vayo.
Syrofanicismi pü püh thi küsührho küsü
24Sülize Pu sülüno süri die tasü Tyre mu Sidon taralü voriyi. Sidie Pu cepühlü lüri küyicie mipühri po senyi mota, süri Pu rüsü kündi ta. 25Kükrelamori, Pu küvori sesü die, thünopühmi püh Pu nupüe küsu rüpü po kübü küta pü püh vori die tü Pu phelü prüta. 26Thüno hipüe Syrofonicia yemi Greekmipü püh, pu Jisu po pu nupü yo thürüküsü rüpüo huva no die mülo büh ta. 27Süsa Jisu pu yisü; natsimiko po mügu mürate, kükrelamori natsimi lüva khiyi die kügü püh tüshiko mhuzülü sü küti vemo tila, zita. 28Süri süpü Puce po la die sü, süri Nyepoo, tüshikori mez khrolüno natsimi lüva kürako pati yo zo le, zita. 29Mu Jisu süpü yisü, zü hio la no tavo tate, küsu rüpüo n nupü lüno ta prari taho, zita. 30Sidie pu celü vori tice küsu rupüo punupü lüno ta prata die pu püh thüzi lü müzü küta ngoyi.
Niji mu züpo küthomi püh thi nve küsü
31Li cono ta la sü Decapolis püthü sü Galilee dzükütü co voriyi. 32Sücesü mi uni rüji mu Züpo küyidu küta mi püh züh Pu ce vori die Pupo Pu be püh punyi sü no die shota. 33Süla Pu makroo dolüno süo züh prari die, Pu becine püh pu nicelü süyi mu mhütsa sü die pu meyi nyi sü. 34Sidie tosü tüyo pe die mühi sü, sidie süo yisü “Ephphatha” puco veyi tate, zisü. 35Süzi sü mütha pu ni veyi die mha khü seyi ta, mu pu meyi ri veyi die Züpo utü thiyi ta. 36Mu Pu puko po püh mipühceri pohi no sü, eli Pu uko po püh pohi noku mu ukoe püh po küthi sakuta. 37Sidie pukoe u malhü thizo die sü; pu mha mütü thi nve süve, Pu niji miri po mhakhü seyite, mu züpo kethomiri po züpoyite, zita.
Currently Selected:
MARK 7: NAG5BSI
Označeno
Deli
Kopiraj
Want to have your highlights saved across all your devices? Sign up or sign in
Chakhesang Chokri Naga New Testament © Bible Society of India, 2015. Used by permission. All rights reserved worldwide.