Ɉaan 9
9
Jesus ə ɲɛ̨ipumun da ɲɛ̨i hvoloon
1Jesus kɛɛ tɛɛi, ə hulɔnu ta kaa, yii di ɉɔlɔɓo lɔ ɲɛ̨ipuɔ. 2Nwɔ́ kalan nɛai di mąąni kɛ, diɛ mą: «Mąąkwɛli kɛmun, lə mɛ̨nį ɓa, ɉulɔnui ŋɛ̨i di gaa lɔ ɲɛ̨ipuɔ? Gbɛɛ kɛ nɛ̨ŋɛ̨n nąą pɔɔ li? Yaa kpinįi ɓə, awala kɛ tii gaa nuą?»
3Jesus ə di woo pulu pənə yɛ diɛ: «Yaa mąŋoo, gaa nuą-oo di ta hvo nɛ̨ŋɛ̨n ɉəɠə li. Kɛlaa, ə kɛ tii, əgɛ, Yálá kɛ mɛ̨nįɠaa di kulɔ pono ɲą a mąą mɛ̨nį. 4Yii kɛɛ ponoɔ̨ ni, nui ŋɛ̨i dɔ́ɔ́, hvo kɛli gu yee ə kɛ nwɔ kolóɠaai diɛ. Kpini kaa pai pɛlɛi, nu ta hva pɛli kólo kɛi. 5Yii kpɔ gáá ni ɓɛ yɛnɛ̨ɛ̨, yɛnɛ̨ɛ̨ nwɔ kɛɛ pono.»
6Ə kpɛɛ lɔ a nwoo tii ɓoɔ, ə nɛaya pu nɔi ɓa, ə ɲee kiin ɉu, ə ɉiɛ ɲɛ̨i. 7Yɛ mą: «'Li, ə́ ə́ waa Siloe bówa hu.» Siloe mukulaa ɓaa: «Di dɔɔ.»
Ɲɛ̨ipumun tii ə li ə nwaa, gɛɛ pənəi yɛ pa, ɲɛ̨i hvolonŋąą.
8Nąą kwɛlɛ nuą, da nuąi kɛ kɔ́lɔn a bɔlɔ, diɛ gaa yɛ nuą hvɛli, di kɛi mo di kee lɔwai diɛ kɛ: «Akɛ tii, ɲɛ̨ipumun ŋɛ̨i kɛi nuą hvɛli, ya ɓəi?»
9Nu taɠaa diɛ kɛ mą: «Yaa li!»
Daɠaa diɛ kɛ mą: «Gulɔmąą lɔ li.»
Kɛlaa, ɲɛ̨ipumun tii yaa kpinįi, yɛ diɛ: «Ɲą́ą́ ɓə kɛ.»
10Nuąi diɛ mą: «Ə ɲɛ̨i ə hvolon bələ kɛ ləi?» 11Ə di woo pulu pənə yɛ diɛ: «Ɉulɔnui ŋɛ̨i da kɛ naa ɓa Jesus, ya ɓə palaya hiɛ ɲɛ̨́i, yɛ mą́ą́: ‹'Li Siloe bówa hu ə́ ə́ waa.› Ɲą́ą́n ŋą́ li, ŋį́ nwáá, ɲɛ̨́i ə hvoloon, gɛ́ kɛɛ kaa.»
12Nuą tii diɛ mą: «Nu kpɔ kaa mį?»
Ə di woo pulu pənə, yɛ diɛ: «Və́ gɛi kɔ́lɔn.»
Nui ŋɛ̨i kɛ ɲɛ̨ipuɔ, Farisiɛ̨ɠaa di mąąnikɛ
13Nui ŋɛ̨i kɛ ɲɛ̨ipuɔ, di ɉon, də li la Farisiɛ̨ɠaa pɔ. 14Mąąhɔlɔɓo, Jesus ə ɉulɔnui tii ɲɛ̨i hvolon a vįitɔɔ yələ. 15Farisiɛ̨ɠaa di ɉulɔnui tii mąąnikɛ diɛ kpɛli, diɛ mą: «Di ə́ ɲɛ̨i hvolon bələ kɛ ləi?»
Ɉulɔnui yɛ diɛ: «Ə palaya hiɛ ɲɛ̨́i, ŋą́ li, ŋą́ nwáá, gɛ́ kɛɛ kaa.»
16Farisiɛ̨ɠaa lɔwai, daɠaa diɛ kɛ diɛ: «Akɛtii, nu kpɔ hvo hvįįtɔɔ yələ kɔ́lɔn? A kɛ yili kaa tii, hvo həɠə li Yálá pɔ.»
Kɛlaa, da kpɛliɠaa diɛ kɛ diɛ: «Nɛ̨ŋɛ̨n ɉəɠəmun nɛlɛ ɓə a pɛli ə gbalo mɛ̨nį taaləi ŋɛ̨i ɲɔ̨nwɔ̨mą gɛi?»
Yili ɓə woo taɠa too la di lɔwai.
17Di pənə nwɔ̨nɔ̨ diɛ ɲɛ̨ipumun ma: «Ɛlɛɛ yáán, ə́ kaa kɛi lə, nui ə́ ɲɛ̨i hvoloon, mąą mɛ̨nį hu?»
Yɛ diɛ: «Yálá kwəi mɛ̨nį hukulɔ mun ni.»
18Da wala kɛ gaa nuą mąąnikɛ, di hvo li kɛ laa na, diɛ kɛ ɲɛ̨ipuɔi kɛ. 19Di ɉulɔnui tii kaa nuą mąąnikɛ, diɛ kɛ diɛ: «Ka laai na kaa diɛ ka lon mɛ̨i a tɛ̨ą, yai ka gaa ŋɛ̨i ɲɛ̨ipuɔ? Ə tɛɛ pələ kɛ ləi yai ɲɛ̨i aa hvolon?»
20Ɉulɔnui tii kaa nuą di di woo pulu pənə diɛ mą: «Ku gɔlɔn gbɔ kuɔ diɛ ku lon ni, ku gaa ɲɛ̨ipuɔ. 21Kɛlaa, pələi ə tɛɛ la ɲɛ̨i yɛ hvolon, ku hvo yili kpaɠala kɔ́lɔn, ə lɛɛ, nui ɲɛ̨i hvolon ku hvo gɔlɔn. Gaa kɛa a nu kɛnɛ̨, a pɛli nwoo hukulɔi, ka mąąnikɛ, ya ka ŋɛ̨i heeni.» 22Ɉulɔnui tii kaa nuą di kɛi mo tii, mąąhɔlɔɓo, di kɛi ɲɔ̨w Ɉuifəɠaa diɛ. Hvó gaai, daa kɛ mo diɛ kɛ: «Nui lɔpee a kɛ diɛ: ‹Jesus kaa a Nwun mąąɓomun Yálá ə naakwɛlanmo›, da gbɛ di wɔ Yálá hvɛli pɛ́lɛ́i mu.» 23Mɛ̨nįi kɛ, ɉulɔnui tii kaa nuą diɛ kɛ mą: «Kaa kpinįi ka mąąnikɛ, gaa kɛa a nu kɛnɛ̨, yaa li.»
24Ɉulɔnui tii kɛ ɲɛ̨ipuɔ, Farisiɛ̨ɠaa di pənə nwɔ̨nɔ̨ di də li, diɛ mą: «Yálá mąąwiɛ. Mąąhɔlɔɓo, ku wɛi ku gɔlɔn kuɔ gaa a nɛ̨ŋɛ̨n ɉəɠəmun.»
25Ɉulɔnui yɛ diɛ: «Akɛ nɛ̨ŋɛ̨n ɉəɠəmun ni, nwɛ́i və́ gɔlɔn tii. Yii ŋą gɔlɔn ya ɓaa: Ɲɛ̨́i puɔi kɛ, yiihu, gáá kɛɛ kai.»
26Farisiɛ̨ɠaa di pənə diɛ mą: «Ə gɛ pələ kɛ ləi yɛ ə́ ɲɛ̨i hvolon?»
27Yɛ diɛ: «Ŋą́ą́ gbɛa háá mo kaa, akɛti, ka hvo mɛ̨n? Lə mɛ̨nį ɓa, ka káá nwɔ̨nɔ̨ pənəi kaa mą́ą́nin kɛ? Kaa kpɛli ka káá bɔ ka kɛ a nwɔ kalan nɛai ta?»
28Farisiɛ̨ɠaa di nalan, diɛ mą: «Yɛ ɓə ə́ kaa a nwɔ kalan non, kɛlaa, ku wɛi, Moisə nwɔ kalan nɛa ɓaa a kuɔ. 29Ku kili kaa ɉu kuɔ diɛ, Moisə wɛi, Yálá ɓə dɔɔ; kɛlaa, nui ŋɛ̨i nwɛi, ku hvo ɉəɠəi kɔ́lɔn.»
30Ɉulɔnui yɛ diɛ: «Gwəi pili mąą mɛ̨nį gaa ɉu ya ɓaa: ka hvo ɉəɠəi kɔ́lɔn, kɛlaa, aa ɲɛ̨́i hvolon. 31Gu gɔlɔn kpɔ guɔ diɛ: Yálá hva nɛ̨ŋɛ̨n ɉəɠə nuą woo pulu pənə. Kɛlaa, nui a Yálá mąąwiɛ, yɛ niiɓa kɛ, ya ɓə Yálá a nwoo pulu pənə. 32Gu hvo ta mɛ̨n ni li diɛ kɛ, di nu ta kaa ɲɛ̨ipuɔ, nu ta aa ɲɛ̨i hvolon. 33Akɛ kɛ nui ŋɛ̨i hvo həɠə li Yálá pɔ, hvə li pɛli kɛ mɛ̨nįɠaa ŋɛ̨i kɛi.»
34Diɛ mą: «Yɛ́i di ə́ kaa, ə́ ɓo a nɛ̨ŋɛ̨n dee teei, yɛ́ ɓə yɛ́ ə́ ku kalan?»
Di di yee hee mą, di bili ɲɛnɛ̨ɛ̨ pələ.
Kili hu ɲɛ̨ipu
35Jesus ə bələ mɛ̨n, diɛ daa ɲɛ̨ipumun tii kpɛ. Da Jesus kwiɛn, ə mąąnikɛ, yɛ mą: «Ə laai Nu Lon na?»
36Ɉulɔnui tii ə Jesus woo pulu pənə yɛ mą: «Ną́mu, gbɛɛ ɓə, ə gɛ, ŋį́ laa na?»
37Jesus yɛ mą: «Yaa gbɛa gaa, nui ŋɛ̨i ka yaa ka káá mɛ̨nį ɓoi, yaa ɓə.»
38Nąąlɔwai, ɉulɔnui tii ə mo mą, yɛ mą: «Ną́mu, ŋą́ą́ laa na.»
Ə nɛ̨ɛ̨mą ə kwɛli hvilɛn Jesus ɓa.
39Jesus yɛ mą: «Ŋą́ pa ɲɛnɛ̨ɛ̨ ŋɛ̨i hu, kiti tee mɛ̨nį ɓa. Ə gɛ, nuąi di ɲɛ̨ipuɔ, di kɛɛ kaa. Yiiɠaai di ɲɛ̨i hvo pu li, di ɲɛ̨i ə pu.»
40 Farisiɛ̨ɠaa tii kɛ gwɛlɛ, yii kɛa di nwoo tii mɛ̨n, diɛ Jesus ɓa: «Akɛti, kuɔ kpɛli mąn, ku kaa mɔ̨ɔ̨ ɲɛ̨ipu nuą?»
41Jesus yɛ diɛ: «Ə li kɛ ka ɲɛ̨ipuɔi kɛ, nɛ̨ŋɛ̨n və li kɛ kaa. Kɛlaa, kɛi ka moi yiihu ka kaai, ka wɔ nɛ̨ŋɛ̨nŋąą kaa lɔ kaa.»
Currently Selected:
Ɉaan 9: BKPDCG
Označeno
Share
Copy
Want to have your highlights saved across all your devices? Sign up or sign in