Jenesis 2
2
1Yndella kowlwrys veu an nevow hag oll an lu anedha. 2Ha'n seythves dydh Duw a worfennas y ober re wrussa gul, hag ev a bowesas an seythves dydh a'n ober oll re wrussa. 3Ha Duw a vennigas an seythves dydh ha'y sakra drefenn ev dhe bowes a'y ober oll re wrussa Duw formya ha gul.
An Kreasyon: Nessa Vershyon
4Hemm yw istori an nevow ha'n nor pan vons i formys y'n jydh may hwrug an Arloedh Duw an nor ha'n nevow.
5Pan nag esa hwath prysk an gwel y'n dor, ha pan na devis hwath losow an gwel, rag ny wrussa an Arloedh Duw gasa glaw dhe goedha war an norvys, ha nyns esa den dhe wonedha an dor, 6mes dowr a frosas yn-bann#2:6 mes dowr a frosas yn-bann: Po mes y sevis niwl. dhiworth an dor ha dowra oll enep an tir, 7an Arloedh Duw a formyas mab-den mes a dhoust an dor ha hwytha yn y dhewfrik anall bewnans, ha den eth ha bos enev bew.
8Ha'n Arloedh Duw a blansas lowarth yn Eden troha'n howldrevel ha gorra ena an den re wrussa formya. 9Ha'n Arloedh Duw a wrug dhe devi mes a'n dor pub gwydhenn a vo teg dhe weles ha da rag boes, an wydhenn a vewnans ynwedh yn kres an lowarth, ha'n wydhenn a wodhvos da ha drog.
10Hag yth esa avon ow resek yn-mes a Eden dhe dhowra an lowarth, ha dhiworth an tyller na y feu rynnys dhe dhos ha bos peder skorrenn. 11Hanow an kynsa yw Pishon, hag a resek oll a-dro dhe dir Havila, le may ma owr; 12hag owr an tir ma yw da: yma ena bedellium ha men onyks. 13Hanow an nessa avon yw Gihon: henn yw an keth usi ow resek a-dro dhe oll an pow a Kush. 14Hanow an tressa avon yw Tigris; an keth henna usi ow resek est dhe Assyria. An peswora avon yw Ewfrates.
15Ha'n Arloedh Duw a gemmeras an den ha'y worra a-berth yn lowarth Eden dh'y wonedha ha dh'y witha. 16Ha'n Arloedh Duw a erghis dhe'n den, ow leverel, ‘Ty a yll dybri yn surredi a bub gwydhenn y'n lowarth. 17Mes a wydhenn an godhvos a dha hag a dhrog ny wre'ta dybri, rag y'n jydh may tybrydh anedhi ty a wra merwel yn surredi.’
18Hag yn-medh an Arloedh Duw, ‘Nyns yw da bos an den y honan; my a vynn gul gweres, gwiw dhodho.’ 19Ha mes a'n dor an Arloedh Duw a formyas pub best a'n gwel ha pub edhen a'n ayr ha'ga dri dhe Adam dhe weles fatell vynna aga henwel, ha pypynag a henwis Adam pub kreatur bew, yndella y feu y hanow. 20Hag Adam a ros henwyn dhe oll an chatel ha dhe ydhyn an ayr ha dhe bub best a'n gwel, mes nyns esa kevys gweres, par gwiw dhodho.
21Ha'n Arloedh Duw a wrug dhe gosk down koedha war Adam. Ha pan esa yn kosk ev a gemmeras onan a'y asennow ha degea an kig yn hy le. 22Ha'n Arloedh Duw a wrug an asenn re wrussa kemmeres dhiworth Adam dhe vos benyn ha'y dri dhe Adam. 23Hag yn-medh Adam,
‘Homma wortiwedh yw askorn a'm eskern vy,
ha kig a'm kig vy.
Hi a vydh henwys Gwreg,
rag hy bos kemmerys mes a wour.’
24Ytho gour a vynn gasa y das ha'y vamm ha glena orth y wreg hag i a vydh unn kig. 25Ha noeth ens i aga dew, Adam ha'y wreg, ha ny gemmerens meth.
Currently Selected:
Jenesis 2: ABK
Označeno
Share
Copy
Want to have your highlights saved across all your devices? Sign up or sign in
© Kesva an Taves Kernewek 2004, 2024
© Cornish Language Board 2004, 2024