Luku 20
20
Hai iwoi yiikoi Jesu wa naa
(Cɔ Matie 21:23-27; Maaku 11:27-33)
1Ajɔ nŋu gɔ si bɛi Jesu wa kɔ zamaau si cio bantumai kpasɛ̃i Ilaaɔ̃ wa sisi laabaau jiidau, inɛ ngboi woo weei Ilaaɔ̃ ŋa do woo kɔ inɛ ŋa si wooda ŋa do inɛ ngboi Zuifu ŋa à faata wa. 2Nɔ à ni, sɔ̃ wa, yiiko yoomai ì waa ceò mii ŋau ihɛ̃, mà yooi í naɛ kpãaɛ. 3Ŋɔi í sɔ̃ ŋa í ni, amu mɔ, an bee ŋɛ ide gɔ. I jɛɛm ŋa, 4hai iwoi Zãa í ba yiiko iyi í dasiò inɛ ŋa inyi. Hai bi Ilaaɔ̃ de, mà hai bi amanɛ ŋa. 5Ŋɔi à waa busi njɛ à waa ni, bɛirei aa ka jɛaa. Nsɛi nɔɔ, bii à jɛaa à ni hai bi Ilaaɔ̃i, á bee wa bɛirei í ce a kù dasi Zãa naanɛ. 6Bii à nɔ à ni hai bi amanɛ ŋai, inɛ ŋa aa na a ta wa kuta domi inɛ fei í dasi naanɛ iyi Zãa waliii. 7Ŋɔi à jɛ à ni, a kù mà hai iwoi í ba yiikoɛ. 8Nɔ Jesu í sɔ̃ ŋa í ni, amu mɔ, n kaa n sɔ̃ ŋɛ yiikoi inɛ iyi ǹ wa n ceò mii ŋau ihɛ̃.
Mɔndai gaanɔɔma laalɔ ŋa
(Cɔ Matie 21:33-46; Maaku 12:1-12)
9Si anyiɛ nɔ Jesu í kpaa inɛ ŋa mɔndau ihɛ̃ í ni, inɛ gɔ í ce ikoɛ nɔ í lɔ si jĩi ndii rezɛ̃ɛ ŋa. Ŋɔi í so gaanɔɔma ŋa í dasi ŋa si ikou a maa logooɛ, í bɛi í bɔ ilu koo kpɛ bɛ. 10Waati iyi jĩi ŋau à so à to ku ka, ŋɔi í bɛ woo ce icɛ gɔ bi gaanɔɔma ŋau koo gba iyi í jɛ ti nŋu wa. Nɔ gaanɔɔma ŋau à cãa à leleɛ í nɛ awɔ ngbɛ. 11Nɔ ilu ikou í bɛ woo ce icɛ mmu má. Nɔ à cã nŋu mɔ, à buu yaka yaka, à sindaɛ awɔ ngbɛ. 12Nɔ í bɛ amanɛ mɛɛtasia wa má, nɔ à mɛɛ nŋu mɔ à bɛi à leleɛ. 13Ŋɔi ilu ikou í ni, bɛirei an ce. An bɛ ama akãm iyi ǹ bi jiidaui. Aa yɔkɔ a jirimaɛ. 14Amma iyi gaanɔɔma ŋau à yɔɔ, à busi njɛ à waa ni, i cɔ inɛ iyi á na ku jɛ tubuu. Ka kpaa ku ba ilɛu ku jɛ tu wa. 15Ŋɔi à muu à fitaɛ hai si ikoi jĩi nɔu nɔ à kpaa.
Ŋɔi Jesu í ni, to, nsɛi, bɛirei ilu ikou takaɛ á ce nŋa. 16Á koo ku kpa ŋai, nɔ ku dɛ inɛ mmu ŋa ku dasi ŋa si ikou. Iyi à gbɔ ideu, ŋɔi à ni, Ilaaɔ̃ ku maà jɔ̀ ku ce bɛɛbɛ. 17Amma Jesu í cɔ ŋa, nɔ í ni, bii bɛɛbɛi, yoomai í jɛ yaasei kukɔu ihɛ̃ iyi wa ni,
kuta iyi woo ma ŋa à kɔ̀siu,
nŋui í baa í jɛ kuta sintei icui ileu.#20:17 Cɔ Iri ku kɔ̃ 118:22.
18Inɛ iyi í cuku si kutau fei, á cɛi. Inɛ iyi í nɔ í bata mɔ á lɔlɔ lafɛ̃ɛi nɛkɔ̃ nɛkɔ̃.
Fiai lɛmpoo ku sã
(Cɔ Matie 22:15-22; Maaku 12:13-17)
19Iyi inɛ ngboi woo weei Ilaaɔ̃ ŋa do woo kɔ inɛ ŋa si wooda ŋau à gbɔ ideu gbakã ŋɔi à waa dɛ bɛi aa ce a mu Jesu. Amma à waa ce njoi zamaau. À waa bi a muui domi à mà iyi na irii aŋai í kpa mɔndau. 20Na ŋɔi í jɔ̀ si fei ndɛɛ à ya maa ce laakaiɛ. Nɔ à bɛ siɛ woo zamba gɔ ŋa iyi à yɛ bɛi inɛ jiida ŋa a koo a cɔ laakaiɛ. À bɛ ŋai ku ba a leaa taai ide nɔ a ba kpãa a muu a daa ilu ilɛu si awɔi nŋu iyi í nɛ gbugbã. 21Inɛ ŋau à sɔ̃ɔ ide à ni, Mɛɛtu, à mà iyi ideɛ do cio iyi ì waa kɔ inɛ ŋa siu, fei ndɛɛ dee deei. I ci ya na inɛ gɔ ntɔ na kubi, ì waa nyisi inɛ ŋa kpãai Ilaaɔ̃ si ntɔɛ. 22Á sĩa ka sãa ilaalu Sezaa fiai lɛmpoo? Mà ka maà sãa. 23Amma Jesu í mà muafiti nŋa, nɔ í ni, 24i nyisim kpɛkɛlɛ akã wa n cɔ. Fotooi yooi í wa si kpɛkɛlɛu ihɛ̃ nɔ irii yooi à kɔ si. Ŋɔi à ni, ti Sezaai. 25Ŋɔi Jesu í sɔ̃ ŋa í ni, to, i sãa Sezaa iyi í jɛ tɛɛ ŋa. Nɔ i sãa Ilaaɔ̃ mɔ iyi í jɛ tɛɛ ŋa. 26Ŋɔi à mɔngɔ ku too awɔ do ideɛ ŋa iyi wa fɔ si wajui zamaau. Ŋɔi à biti do ide ŋa iyi í jɛ, nɔ à coko nŋa.
Idei kujĩi iku ŋa
(Cɔ Matie 22:23-33; Maaku 12:18-27)
27Si ajɔ akãu Sadusi gɔ ŋa mɔ à naa bi Jesu. Aŋai à ya maa ni iku ŋa a kaa jĩ. Iyi à to bi tɛɛ ŋɔi à beeɛ à ni, 28Mɛɛtu, ide iyi Moizi í kɔ nwa wee. Í ni bii inɛ gɔ í ku í jɔ̀ aboɛ, nɔ nŋu do aboɛ a kù nɛ ama, ifɔɛ ku so jaaɔ̃u ku ba ku bía igbãɛ ama.#20:28 Cɔ Wooda ku kɔsi 25:5. 29Wee inɛ mɛɛje gɔ ŋa à wɛɛ iyi à jɛ amai baa akã. Igbã nŋa í so abo nɔ í ku, kù nɛ ama do abou baa akã. 30Ŋɔi inɛ minjisiau 31do mɛɛtasiau à so jaaɔ̃u. Nɔ bɛɛbɛi í ce si gãmɛi aŋa mɛɛjeu fei, nɔ à ku. Kãma nŋa kù ba ama do abou. 32Nɔ si anyiɛ abou mɔ í na í ku. 33To, ajɔ iyi iku ŋa aa na a jĩ, aboi yoo nŋai á jɛ, si bɛi aŋa mɛɛjeu fei à soo aboi.
34Ŋɔi Jesu í jɛ nŋa í ni, si andunyau ihɛ̃ inɛmɔkɔ do inaabo ŋa à ya so njɛ. 35Amma inɛ ŋa iyi Ilaaɔ̃ í jɔ̀ à jĩ hai si balɛ à ba kuwɛɛi ala, abo do mɔkɔ ŋa a kaa ya so njɛ má. 36Aa yɛi bɛi amaleka ŋa, a kaa ku má. Aa jɛ amai Ilaaɔ̃ ŋa si na iyi í jɔ̀ à jĩ hai si balɛ. 37Si waati iyi Moizi í yɛ ama jĩi iyi í mu ina nɔ kù waa jou, nŋu takaɛ í fɔ mam mam iyi iku ŋa aa jĩ. Waati nŋu í kpe Ilaaɔ̃ Lafɛ̃ɛi Aburahamu do Izaaki do Zakɔbu.#20:37 Cɔ Kufita 3:6. 38Ntɔ ntɔ, Ilaaɔ̃ kù jɛ Lafɛ̃ɛi iku ŋa, ti ilu hunde ŋai, domi bi tɛɛ, inɛ fei ilu hundei. 39Ŋɔi woo kɔ inɛ ŋa si wooda ŋau, gɔgɔ ŋa à gba ide à ni, ide iyi ì fɔu bɛ Mɛɛtu, dee deei. 40Si anyiɛ a kù jɛ a kù beeɛ ide gɔ má.
Davidi* do inɛ iyi Ilaaɔ̃ í cica*
(Cɔ Matie 22:41-46; Maaku 12:35-37)
41Nɔ Jesu í bee ŋa í ni, bɛirei aa ce a ni inɛ iyi Ilaaɔ̃ í cicau tɔkui ilaalu Davidii. 42Davidi takaɛ í fɔ si tiai iri ku kɔ̃ ŋa í ni,
Aɔ̃ Lafɛ̃ɛ í sɔ̃ Lafɛ̃ɛm í ni,
buba do ikpa awɔ njɛm ihɛ̃,
43hee n ce mbɛɛɛ ŋa bi ku lesi isɛɛ.#20:43 Cɔ Iri ku kɔ̃ 110:1.
44To, bii Davidi takaɛ wa kpoo Lafɛ̃ɛ, bɛirei á ce ku jɛ tɔkuɛ má.
I mu ara nŋɛ do woo kɔ inɛ ŋa si wooda* ŋa
(Cɔ Matie 23:1-36; Maaku 12:38-40)
45Si bɛi inɛ fei wa de si Jesu itĩ, ŋɔi í sɔ̃ mɔcɔɛ ŋa í ni, 46i mu ara nŋɛ do woo kɔ inɛ ŋa si wooda ŋau, aŋa iyi à ya bi a maa dabii do ibɔ jaba ŋa, nɔ à bi a ya ce aŋa fɔɔ do jirima nla nla si bantuma. A ci ya bi kaa kitãi inɛ ngbo ŋa ile bi kutɔtɔɔ do inya sinte bi ku ce jingau ŋa. 47À ya takii jaaɔ̃ ŋa a gba mii ndu ŋa ŋa fei, nɔ à ya maa ce kutɔɔ sisɔ ku ba a yɛ ŋa nŋu akã. Na ŋɔi í jɔ̀ ijuukpã nŋa á la ku caa.
Currently Selected:
Luku 20: MKL
Označeno
Share
Copy
Want to have your highlights saved across all your devices? Sign up or sign in
2021, SIM International et UEEB