MAK 6
6
Jisua Nasareth thung ngi mdo Rotmaan
1Jisu ngi ava mmun ma thida mdaksaa ki khuwpaam tha arvang da; ungu msiikhu rek va mdil ṭoi da. 2Ungta sabath nitti Mma ngi synagog thung ngi lut da kpurchuk pṭhunda. Ungta Mma do purchu karyaa mii mkheng nga ngak chda,ungu the lamda, “Hava mkheng nga Mma va talu thungki mdo phaak da? Mma hin mdo piik lousing nga tak hep kdu lu daat da? Mkhutti klin klin nong mdo tlotta! 3Hava ding kparnaal lik, ungta Mery chapa ungu Jeems leh Josi, Juda ungta Simon le u pa, ungta mcher rek ruk nenni ta am ṭhiin daat pme mo?” kdingi mmaanni plung kpurri bin lam da. 4Ungbi Jisu ngi mhin inni theda, “Khulpua mdaksaa ki khuwpaam, mri mlam thu, mphungka thung kma donle, mii do kjat nma ra ame.” 5Ungta Mma ngi kukoi rek angṭhe leen mkhut khiing da mii mdo pdam ava kma donle, mun ava thu Mma ngi nong klin tlo pchaang me. 6Mmaan do rin ma leiji ngak chda.
Ungta Jisu ngi marveel ki khuw rek thung ngi tlowng da purchuk da.
Jisu ngi Siikhu rek Sowm lei Knii mdo Sii
7Ungta Mma ngi sowm lei knii rek Mhin own thida, pthla ktobor rek leen rutan mdo thloi nraan pii lamda, knii nii ngi sii lamda. 8Naanni kchung kma donle alam ṭoi raan thungki ra do khat lee ado hur in ro nime; thenpen, thowngja, ungu arkowl riin thung ngi sum ado hur in ro nime kdingi parseel lamda. 9Pdainu khu kok rek ava knaa cha krora, dona karsakki ku hur rome. 10Ungta Mma ngi mhin inni theda, “Naanni alu naan inn ava thung ngi asun duin khim khai ji am daat in. 11Ungu naan akup thlung kmaan, amat in da akaryaak pik kmaan ma am ta, asun thaanni mmaan rinpaumin kipthleiji, akhuwn arbaat akṭho pthiin.” 12Ava leiji mmaanni duwn tha chet lamda, mii ava ngi plung mdo pinlet ra kdingi paryaam lamda. 13Mmaanni tarnam rek rei pthii lamda, thao pbul lamda kukoi rek knempok pdam lamda.
Baptis Kuptlot Johon Diyo
14Jisu miing kunton na tdit kruwng Herod ti aryaa da, mii angṭhe va, “Baptis kuptlot Johon kdiyou thungki kardel; ava leiji Mma thung ngi ktlo ki rutan rek ka am,” dilam da. 15Pdainu angṭhe rek va theda, “Elijah pi di lamda,” ungu angṭhe rek nowl va, “Chodu ki khulpu rek arlakki khat pi” di lamda. 16Pdainu Herod ti maryaak thungta, mma ngi theda, “Neiji mluw kdo reen Johon ava kardel,” pi dida. 17Mleija Herod ti Johon kukjowng mii mdo sii na ki mleija, mma mdak kat naopa Philip numei lowng da mnumei tpurthuw da, Herodia tum daatti Johon na bowl da rowng inn thung ngi mdo khum pthii. 18Mleija Johon ni Herod hin theda, “Anaopa numei ado paal ṭhi ava Nowlam do rot pme.” 19Ava leiji Herodia va Johon na kdung ngi mraal pii da, aeyou nuwm da, pdainu pchaang me. 20Herod va Johon na kchiir rinkindit miilai khat tdit mdo dee leiji ṭi da, kṭha ngi mdo thiik. Mma ngi mdo aryaak na thung ngi tija mning mul na am daat joso kanpa ngi Mhin aryaa chda. 21Pdainu mpha kcha arvang da, mleija Herod ṭou na nit ava thu mma ngi, klin rek, nong klin kpuw rek, Galil paam thung ki ber ksu rek ava pmaal da. 22Ungbi Herodia chanu ngi vang lut da mkardaam thungta, Herod leh mmal rek ning ptlung da; ava leiji kruwng ngi nalanao hin theda, “Ado ngei khim khai athe neiji arot pik nik di. 23Nang ngi ado tiṭhil khim khai ku kruwngpaam mṭim kpha thu apii nik di.” 24Ungbi mma ngi vang thuwk da mnuh hin, “Talu ṭhil chnik da,” kdingi mthe thungta, “Baptis kuptlot Johon luwchai aṭhil,” dida mnuh va theda. 25Ungbi mma ngi kruwng hin vang lut teng da, kakja haiji, “Baptis kuptlot Johon luw arkuw thung ngi ado tpiik chaak ra neiji kngeija,” dida theda. 26Hava ngi kruwng plung kdung ngi pja da; pdainu mpau reel dok leh mmal rekki mlei kurthuwk da, mpauna ava leek nuwm me. 27Ungta kruwng va kseel rawlmii khat own da mluw mdo arvan sin nra pau pṭum da. Ungbi mma ngi va da rowng inn thung ki mluw reen da; 28ungu arkuw thu arvan sin da, nala nao hin pii da, ungta nala nao va mnuh hin pii da. 29Msiikhu rekki ava maryaak thungta, va lamda mdak kluwng ava lou lamda thlaan thu alruwl chlamda.
Jisu ngi Mii Pun Parnga mdo Pmaal
30Kenyee rekki Jisu hin mdil kinle lamda, mnong tlot in leh mpausaam mkheng Mhin song lamda. 31Ungbi Mma ngi mhin inni theda, “Asangtlaak inni arva inra mmun ktliing khat thu ekarnga chaan,” Mleija karva kvang mii mnem reen leiji kmaal ki mpha ruk pha chlam me. 32Ungbi mmun ktliing khat thung ngi arkuwng leen tuwng lam da msang tlaak inni va lam da. 33Mii maknem mi mhai in ava sut pṭoi da, dei lamda, ungu khuw mkheng thungki mii rekki mkhu inni chen pṭoi lamda, mun ava thu mmaanni ru ri dok lamda. 34Mma ngi dii biing ngi mhai thungta kurtuwl mii knempok deida, ungbi wonsat lo chlam da, mleija kseel ra ktaak jaonao rek heppi deida; pau knempokki kpurchuk pṭhun da. 35Ungta khuw mjiin rui rui thungta msiikhu rek Mhin arva da the lam da, “Mmun hava ktliing nga, ungu mpha rukka kuk to dokka, 36apsun chlam, mkhuw paam in leh khuw rek tha chet lam sora, mdo chaak raan then aren chlam so.” 37Pdainu Mma ngi arthawng da, “Mdo chaak raan do mruk naanni apii chaan,” Ungbi mmaanni theda, “Mmaan do chaak rang nga neenni hava dinari arjaa knii ngi va da ren pik ni kaan mo?” 38Ungbi Mma ngi mhin inni the da, “Thenpen tija athloi inna? Vang inra asuw in.” Mmaanni suw lam thida the lamda, “Thenpen parnga leh tuwlva knii ka amma.”
39Ungta Mma ngi mii mkheng nga nowm suwl ke er leen lop loppi mko on nraan mhin inni pau pṭum da. 40Ava leiji mmaanni lop loppi arjaa khat khat leh som parnga nga ngi ko ong lam da. 41Ungta Mma ngi thenpen parnga leh tuwlva knii lou da parwaan hansuw da phowl kṭha parlaan thida pkuida mii rek mdo them pik nlam ra msiikhu rek hin parlaan da; thida tuwlva knii ruk khuida them pik lamda. 42Mii mkheng ngi poi kpa sappi maal da. 43Ungta then kekleem ava tomkal sowm lei knii jilli purkuk lamda. 44Thenpen kchaa mii rek ava mii pun parnga lik.
Jisu ngi Dii leen Mche
45Ungta Mma ngi kuknotti kurtuwl mii rek mupsun slii chunni msiikhu rekka Bethseida kpha ra raalpha khat tha mdu betti haisii lamda. 46Ungu mii rek tu mkinṭhen diltha, Mma ngi lown tha kṭhil chra hang da. 47Khuw jiing da, arkuwng nga truwn leen mvan slii arlaanni, Mma ava msangtlaakki laan tha am daat da. 48Mma ngi leer khatti mhai sut lam thungta, msiikhu rek kja lang lang ava hai dei da, mleija mdu suk inni tirthli ngi raan lamda,jaan ki ṭhang plii arveel ro ngi Mma ngi dii leen mkhu ngi chet da pha lamda. Mma va mbe thaanni chet nuwm da, 49pdainu mbe thaanni truwn leen mche ava mmaanni mdee in thungta, raothla pak da kdingi owng lamda. 50Mleija mkheng inni Mma mdee in thungta piir lamda. Pdainu Mma ngi pau teng da mhin inni theda, “Plung apnet in, Nei ping; ṭi maan.” 51Ungta arkuwng leen mmaan ku on ṭhi lamda, tirthli kraang ruk down dok da. Ungbi mmaan na kdung ngak chlam da, 52mleija thenpen mlei thu mmaanni dei pindi chlamme, pdainu muplung inna pchai set set da.
Kenisarit thu Kukoi rek mdo Pdam
53Ungu mmaanni raalpha khat tha mvan arkaan in thungta, Kenisarit paam van pha lamda, dii biing ngi priik lamda. 54Arkuwng leenki mṭum in thungta, Jisua mii rek va tin chteng da. 55Ungbi mmaanni mveen in khim khai thu chen karvel lamda, kukoi mii rek ava mi ii naan tu kdom lam da, Jisu am na mun thlaam lamda paphaak chlam da. 56Ungta Mma ngi mche na ktai thu khuw tee don, khuwpii daat don,mdit mana paampii ki mii rek kurbu na mun ktai thu pi iip lamda, mmaanni miphrik mdo thown chaak nlam ra Mhin ktham chlam da; ungu kthowng cha mii knem pokka dam chda.
Currently Selected:
MAK 6: LAMKBSI
Označeno
Share
Copy
Want to have your highlights saved across all your devices? Sign up or sign in
Lamkang NT with PSA and PRO - REN PAURIINA
Copyright © Bible Society of India, 2002.
Used by permission. All rights reserved worldwide.