MAK 13
13
Luwbuk Inn ava Kmawng chra dida Jisu ngi mdo The
1Ungta Mma ngi luwbuk Inn thungki mvan thuw thungta, Mma siikhu khatti Mhin theda, “Asuw, Chukpu, hava lung rekka tija thung ngi tnga chaak ndaat ki Inn rek kurthuwk daatta!” 2Ungbi Jisu ngi theda, “Nangva hava klin klin Inn rekka adea? Lung khat leenni khat kurtuwn daatti tden thung preva ma nime; mkheng kheng ngi kvar pthii ra.”
Kja Kakham mdo Pṭhun
3Ungu Mma ngi luwbuk Inn raalpha ki kruwn lown leen mku on thungta, Pitor, Jeems, Johon, ungu Andrija ngi tuprutti Mhin paukhewl chlam da. 4“Hava tden thung rang, mhai the pik chaan? Hava nong rek mkheng mkurkhum nra titinna talu ka am rang da?” 5Ungbi mhin inni Jisu ngi kthe pṭhun da, “Ku mii khat lee ngi lam lelee tha ado tiṭhi ma nraan, cheek kirsin chaan. 6Nei kmiing ngi mii knempok thleng donle, ‘Nea Mma ping!’ di don kthe ra, ungu mmaanni mii knempok ava lam lele tha kṭhi ra. 7Ungta naanni rawl rek leh rawl ki titi aryaak in mpha thu, plung kpurthlown maan; ru kri reeppi hava kthuwk ra, pdainu mṭut na rang ki ava pme. 8Mleija paam khat ki mii ngi paam khat ki mii kahal chra, kruwngpaam khatti kruwngpaam khat kahal chra; mmun kteen thung ngi ringnaang kthuwk ra, poi tham ka am ra; pdainu hava ava nao kuplu rang ngi kdung kṭou heppi kupṭhun ra.
9Pdainu adaksaan tuk asut dei chaan; mleija mmaanni karseel lop thu akṭhi raan; synagog rek thung ngi akbun raan, ungu Nei ktummi rinpaumin kuhur rangki paam kpu rek leh kruwngrek maiṭhuwm mi rip naan di. 10Ungu kṭha paumin ava ru kri ngi chati rek mkheng thung ngi ado paryaam raan. 11Ungta mmaanni akjowng in donle atparlaan pthiin mpha thu, mdu ngi ado the raan ava plung purdun psuk maan; pdainu mpha ava kat thung ngi ado the raan ava akpii chraan, mleija kpau rang nga naan ra ava pme; pdainu pthla kchiir ra. 12Ungta unao khatti mu u mnao khat kdiyou rang ngi kparlaan pthii ra, mpah ngi mnao anto ktlo ra, ungu mnaole ngi mpah leh mnuh hal chdonle ke eayou ra. 13Ungta Nei kmiing leenni naanna mii mkheng ngi asnuwm in nime. Pdainu mṭut na kpha dekki kdiil pchaang mii ava kaktlan pik ra.”
Klin lang lang ki Tiṭit Kirvei Krowl
14“Pdainu naanni tiṭit kirvei am liit nma ra mun thung ngi ka am ava adee in mpha thu ‘Kpa cha mii ngi adei pindi chaso’, Jihudia thu ka am rekki lown rek tha kchen ra; 15innthlun leen ka am mii ruk va junṭum mso, mi inn thu lut da do khat lee lou mso; 16bil thung ngi ka am mii ruk va mdo mna klou ra mdil kinle mso. 17Mpha ava thu nao kuhur leh nao kakai snu rek ava tija thung ngi msuw kthi chdaat ta! 18Phalbiw thung ngi mthuw ma nra aṭhil dei chaan! 19Mleija ava nit rek thung ngi Isowr ri dultipaam kapṭhang mupṭhun daat ki kthuwk mlai ungu kthuwk nowl kma ra suwk thuw ava ka amra. 20Ungta Mukpu ngi mnit rek muptoi pthii ma ngaallu, dulti mii ku khat lee pre ktlan nime; pdainu kchol da mdo pankai rek tummi mnit rekka mdo ptoi pthii. 21Ungta naan hin ku mii khatti, ‘Asuw in, Khrista ava hava tha!’ mdit mata ‘Mma, va suw in!’ dida mtheen ta rin chmaan. 22Kindit kma khrista rek leh kindit kma khulpu rekki titinna leh tnga na tdet donle, mrot khim khai thu mdo kchol dok rek ava lele tha kṭhi lamra. 23Pdainu tuk kursut dei chaan; mpha ava marvan du ngi mkheng akthe pik dok inna.
Kurjung ra Mii Chapa
24“Pdainu nit rek ava thu, suwk kthuwk ava dil tha, kniw ngi kjiing chra, thla ngi mar awng pii nime, 25parwaan ki bursi rek arjun ktla ra, ungu parwaan ki rutan rek kunchun ra. 26Ungta Mii Chapa ava ngi armei thung ngi mrutan leh mlaarnee klin lang lang ngi kurjung mmaanni kdei lamra. 27Ungu ava dil tha Mma ngi mtamsii rek sii donle, markil plii thungki mdo kchol Mma mii rek ava, dulti donna leh parwaan donna thungki kpurkuk ra.
Kduwt Ding Lei Kurchuk
28“Kduwt ding ngi ekurchuk chaan. Kdowng deekki mbaak jamda, marnaa rek muksun daat le, kunjou kveija tdit naanni ado dee in. 29Ava lulu ngi hava khim khai kthuwk adee inta, mpha knaija, paltong be ngi knai tekka, tdit naanni adei in. 30Kinditti, Neiji ahin thaanni kthea, hava mkheng mthuw du khim khai hava charuwl ava maang nime. 31Parwaan leh dultia kmaang chra, pdainu Nei kpauna rekka maang nime.
Ku Khat lee ngi Mnit Mṭhang Deime
32“Pdainu mnit mdit mata mṭhang ava ku khat lee ngi dei me, parwaan ki waan tamsii rek daat don, mdit mata Mchapa daat don deime, pdainu Mpah daatti kdeira. 33Tuk asut inra, asuw pṭoi chaan; mleija mpha ava tden kurjung rang tdit naanni dei maan ti. 34Ava miilai khatti kipjiin rang ngi, msra owr rek mii ktai hin mnong raan trat da, thurngot ksut pṭoiji kṭha ngi mdo sut pṭoi nra pau reen thida mi inn mada mipjiin chaak ava hep daat ra. 35Ava leiji asut pṭoi dei chaan mleija inn kpupa ava tden kthlung rang tdit naanni dei chmaan ti, kjiing ngi, mdit mata thanṭim mi, mdit mata harkhuwn ni, mdit mata jiingsun kpanma ngi kthlung kro. 36Mma ngi murjun tengle ki iip daatti ado tphaak ma nraan, 37Neiji naan hin kdothe ava mii mkheng hin kdo the kurthuwk; asut pṭoi chaan.”
Currently Selected:
MAK 13: LAMKBSI
Označeno
Share
Copy
Want to have your highlights saved across all your devices? Sign up or sign in
Lamkang NT with PSA and PRO - REN PAURIINA
Copyright © Bible Society of India, 2002.
Used by permission. All rights reserved worldwide.