MATHI 15
15
Alraang ki Mii do Purchu
1Ungta ava dilli Jerusalem ki kthleng Pharisi rek leh Nowlam chukpu rekki the lamda, 2“Talu leiji Nah siikhu rek va alraangki nopa mdo leek inda? Mleija mmaanni mmaal in mpha thung ngi mkhut in alṭhu lamme.” 3Mma ngi mhin inni arthawng da, “Ungta talu leiji naanva alraangki nopa tum daatti Isowr paureen ado leek in da? 4Mleija Isowr ri paureen da, ‘Apah leh anuh akjat cha,’ Ungta ‘Mpah mdit mata mnuh leen kṭhakma kthe mii ava kdiyou kat ra.’ 5Pdainu naanva theen tinu, ‘Ku mii khatti mpah mdit mata mnuh hinni, naanni nei kihin ki ado phaak raan ava Isowr hin kpiik dok,’ kdingi theen tinu, mma ngi arleek setti mpah leh mnuh mdo kjat nra ame. 6Ava leiji naanni alraangki tum daatti, Isowr pauna ava leek pthiin tinu. 7Ṭha tlot ktlo naan! Naanki lei thung ngi Isaijah va hanto mdo the dok:
8‘Hava mii rekki mner daat inni makjat lamda,
pdainu muplung ril inna Nei kihin ki kdung ngi lam kar latta;
9mmaanni mii ki paurin nopa ava ktlo ngi,
Neia do ksii kma ngi luw mbuk lamda.’ ”
Do Khatti Miilai mdo Tpubur
10Ungta Mma ngi mii rek Mhin own thida mhin inni theda, “Aryaa inra adei pindi chaan: 11miilai khat ner thung ngi jung klut ava ngi mii kchou me, pdainu ner thungki arhan kthuwk ava ngi miilai khat ava mdo kchou kre.” 12Ava dilli siikhu rekki Mhin arva lamda, the chlam da, “Nang ngi hava athe mpha thu Pharisi rek plung kpur ava dei mti mo?” 13Mma ngi arthawng da, “Kpah parwaan ki ngi mdo phun ma dinglung haikhe khim khaija kphui pthiira. 14Ama pthiin; mmaanna mik ktot kṭhi rek lam. Ungta mik ktot khatti mik ktot khat mṭhibi, mikniing inni khur thung ngi ktla you lamra.” 15Pdainu Pitor ri Mhin theda, “Pau purtol ava mhai the pindit pik chaan.” 16Ungbi Mma ngi theda, “Nang rukka tun kpha ngi kdei pindi kma pa pti mo? 17Ner thung ngi jung klut khim khaija poi thung ngi jungda karthleng jowk jowk daat ava nang va dei mti mo? 18Pdainu ner thungki kthuwk ava plung thungki arhan kthuwk, ungu ava ngi miilai mdo kchou kre. 19Mleija plung thungki ngi kṭha kma mdo thuwṭhi, mii ke eayou, losang kṭhi, nala tartlaang kturkui, kupru, kindit kma thu sakhi kpii, kuhowng cha, 20hava le ngi miilai khatta mdo kchou kre; pdainu khut kulṭhu kma ngi then kchaa ava ngi mii kchou me.”
Snu KhatDorin chaak
21Ungta Jisu ngi ava thungki kurlouda Tyr leh Sidon paamkowl tha kunsun da. 22Ungu asuwn, paamkowl avaki Kenan ki snu miilai khatti arvada ungu owngda, “O, Devid Chapa, Mukpu, aplungnee mhai tdet cha; kchanu ava kdung reenni tarnam khatti pja chda.” 23Pdainu Mma ngi pauna khdaat preva arthaan pik me. Ungta msiikhu rekki arva lam da, Mhin ktham chlam da the lamda, “Ndil in ṭoida mma kṭappa, apsun pthii.” 24Jisu ngi arthawng da, “Neia Jao kmawng kcha Isreel inn thung daatti mdo tsii.” 25Pdainu mma ngi Mmaiṭhuwm mi arvada pkhup pi tardiil da the chda, “Mukpu, mhai bom cha.” 26Ungu Mma ngi arthawng da, “Kmo rek thenpen louda ui rek hin kvar pthii ava kursuk pme.” 27Mma ngi theda, “Oji, Mukpu, anto daat joso ui rek rukva mmaan kpupa rek tebol leenki mikri ktla ava mdo chom chaak pi.” 28Ava dilli Jisu ngi mhin arthawngda, “O, Snu ado rin chaakka klin lang lang nga! Nah do ngei dil kṭoiji ekurthuwk so.” Ungta mchanu ava mpha ava kat thu dam chda.
Jisu ngi Mii Knempok mdo Pdam
29Ungta Jisu ngi Galil truwn biing ki ksun ra kurlou da. Ungu lown leen hangda, ava thu ku ong da. 30Ungta kurtuwl mii rek klin lang lang ngi Mhin arhang lamda, mmaanni mkhu kseek, kyeng cha, mik ktot, ki ewng, ungu ktlok knempok ki kukoi Mhin ni arhan ṭhi lamda, mkhu ther ri thii lamda, ungu Mma ngi pdam pik lamda. 31Ava leiji kurtuwl mii rekka ngak chlam da, ki ewng cha ava ngi mpau thuwk da, kyeng cha ava ngi karjii da, khu kseek ava ngi chet da, ungu mik ktotti khuw mdee thungta, Isreel ki Isowr ava panpaak chlam da.
Jisu ngi Mii Pun Plii mdo Pmaal
32Ava dilli Jisu ngi msiikhu rek Mhin own thida theda, “Kurtuwl mii rek hava kwon ksa lamma, mleija hava nii kdum lik thung ngi mi amṭhiin da, ungta mdo chaak raan do khat lee thloi chlam me; ungu mpoi in ktham daatti sii pthii nuwm lam maang, lam tha purthlokki klou kro lam.” 33Ungu siikhu rekki Mhin the lamda, “Kurtuwl mii rek klin lang lang ava hava kbowk laiju thenpen kokhopva tva ki tphaak raan da?” 34Ungbi Jisu ngi mhin inni theda, “Thenpen tija athloi inna?” Mmaanni arthawngda, “Tikheu, ungu tuwlva kdil sisi mruk suwn.” 35Ungta kurtuwl mii rek ava dul leen mko on nraan paureen da, 36Mma ngi thenpen tikheu leh tuwlva kdil sisi ava lou da, phowl kṭha parlaan thida msiikhu rek hin pii da, ungu siikhu rekki kurtuwl mii rek hin them pik lamda. 37Ungu mmaan mkheng inni mpoi in kpa ngi chaa sap lamda; ungta mkekleem kṭik ava bowr tikheu kdim jilli chom lamda. 38Kmaal mii rek ava snu rek leh kmo rek kthe kma pselpa mii pun plii arveel. 39Ungta kurtuwl mii rek psun thida, Mma ngi arkuwng leen tuwngda, Magadan paamkowl tha vangda.
Currently Selected:
MATHI 15: LAMKBSI
Označeno
Share
Copy
Want to have your highlights saved across all your devices? Sign up or sign in
Lamkang NT with PSA and PRO - REN PAURIINA
Copyright © Bible Society of India, 2002.
Used by permission. All rights reserved worldwide.