Laataanooji 28
28
1Isiyaaku ewni Yaakubu, barkiɗini mo. O umri mo: “Taa te'u debbo haa ɓiɓɓe rewɓe Kanaana. 2Umma, yah haa Paddan-Aram, haa saare Betu'iila, maama ma, a te'a debbo ton haa ɓiɓɓe rewɓe Laban, kaawu ma. 3Allah Baawɗo barkiɗine, o ɗuuɗɗine, ngam laatoɗa mooɓre le'i. 4O hokke barka Ibrahiima, an e danygol ma bee maaɗa, ngam a mara lesdi koɗamku ma ndi o hokki Ibrahiima#Laat 17:4-8..” 5Isiyaaku jaɓɓiti Yaakubu, kaŋko o yehi Paddan-Aram haa Laban ɓii Betu'iila Aramiijo, deerɗiraawo Rebekka, daada Yaakubu e Isuwa.
Isuwa te'i debbo feere
6Isuwa nani no Isiyaaku barkiɗiniri Yaakubu, jaɓɓiti mo o yaha Paddan-Aram, ngam o te'a debbo haa ton. Yaake o ɗonno barkiɗina mo, o umruɗo mo boo: “Taa te'u debbo haa ɓiɓɓe rewɓe Kanaana.” 7Yaakubu ɗowtani saaro'en muuɗum. Saa'i man o dilluɗo Paddan-Aram. 8Isuwa faami ɓiɓɓe rewɓe Kanaana pottanaay baaba muuɗum Isiyaaku, 9o yehi haa Isma'iilu, o te'i, dow rewɓe ɓe o mari, Mahalat deerɗiraawo Nebayot, ɓii Isma'iilu ɓii Ibrahiima.
Allah waŋgani Yaakubu nder koyɗol haa Baytila
10Yaakubu ummi Biirsaba, yehi Haran. 11O yotti nokkuure woɗnde, o waali ton ngam naaŋge muti. O hoo'i woore haa kaa'e nokkuure maajum, o wafli nde. Nden o waali ton. 12O hoyɗi: O yi'i ɓaargal darnaaŋgal dow lesdi, hoore maagal meemi asama. Malaa'ika'en Allah ɗonno mba'oro ngal e ɗonno njippiro ngal#Yuh 1:51.. 13Jawmiraawo ɗonno dari yeeso maako, wi'i: “Min woni Jawmiraawo, Allah maama maaɗa Ibrahiima e baaba ma Isiyaaku. Lesdi ndi mbaaliiɗa dow muuɗum, mi hokkete ndi, an e danygol ma#Laat 13:14-15.. 14Danygol ma ɗuuɗan bana njaareendi. Ngol yaajan haa hiirnaaŋge e fuunaaŋge, haa woyla e fombina. Ummaatooje duniyaaru fuu laatoto barkiɗinaaɗe ngam daliila ma e danygol ma#Laat 12:3; 22:18.. 15Anndu, mi ɗon wondi bee ma. Mi aynete haa njahata fuu. Mi lornete nder lesdi ndi'i, ngam mi wudintaa ma, sey to mi hiɓɓini ko mbi'maami.” 16Yaakubu fini, wi'i: “Fakat, Jawmiraawo ɗon haa nokkuure nde'e, min boo mi anndaano ɗum.” 17O hultori, o wi'i: “Nokkuure nde'e hulniinde! Suudu Allah ɗon ɗo, haa ɗo dammugal asama woni.”
18Yaakubu dawi cub, hoo'i hayre nde o wafluno go, darni nde siftinorde. Nden o rufi nebbam dow hoore maare ngam senugo nde. 19O inndi nokkuure maajum Baytila#28:19 Baytila yiɗi wi'go suudu Allah., ammaa naane innde berniwol ngol Luus. 20Nden Yaakubu togi togayeere nde'e, wi'i: “To Allah ɗon wondi bee am, to o ayni yam dow laawol ngol njahanmi, to o hokki yam nyaamdu ngam nyaamugo e limce ngam ɓornaago, 21to mi loroyi jam haa saare baaba am, nden kam Jawmiraawo laatoto Allah am. 22Hayre siftinorde nde ndarnumi nde'e, laatanto ma suudu. Haa ko ndokkata mi fuu, mi ittante zakka#Am 4:4. .”
Aktuálne označené:
Laataanooji 28: FBDC
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
DEFTERE ALLAH © Alliance Biblique du Cameroun, 1994.