Mat 6
6
Ŋaazɩnyɔ 'la klalɩlɩɛ 'la cɩa wɔlɩ
1«A ‑ka ɩmɩa Laagɔ 'clalɩ 'lɛ anyɩ na, nʋda ‑kʋ na, a zʋlʋ pɔlɛ 'kʋ ɩya a 'la nʋnʋɩ ncaacikʋ le ma 'ka anyɩ 'cikʋzʋlʋ. A ka sɛɛ nʋ na, 'a cɩ 'ta a Toa ‑ɔ ‑kʋ 'lɛ ‑laagɔɔn na, dluuplʋlɩɛ wlɩɩn 'lɩlɩ. 2Na, gbazɩ ‑n ‑ka ŋaazɩnyɔ lʋʋ va na, ‑naa 'palɩɩ bhubhu 'kʋ, le saa yooyoncɛlɩa nʋ 'lɛ bhibhiepalɩa* ‑zɔn ɩya 'clikpua nɩkplaan, le ncɛlɩ 'ka sɛ maa 'ŋwleenfalɩ na. N solu anyɩ, ɩ ‑glɩ ‑nʋawlɛ, lebhe: Ma ya mala dluuplʋlɩɛa 'lɩ. 3‑Ma ‑mɔ, gbazɩ ‑n ‑ka ŋaazɩnyɔ lʋʋ va na, ‑naa 'daba sɔa 'la cibhlilia ɩmɩa ‑naa 'lipasɔ sɔa nʋ 'lɛ na, 4ɩya ‑naa klalɩlɩɛa 'ka ziziekoteen 'plɩlɩ ɩya ‑n Toa, ‑ɔ ‑jlɛ 'lɛ ziziekotea nɩkplaan na, 'ka ‑naa dluuplʋlɩɛa 'nyɩ.
Bhibhieli 'la cɩa wɔlɩ
5Gbazɩ a ‑ka bhibhieda ‑kʋ na, a 'la nʋa yooyo ncɛlɩa 'bhisa: Ma ‑ka bhibhieda ‑kʋ na, ‑ma ‑wa bhibhiepalɩa ‑zɔn ɩya ‑gugoglagbʋʋn 'nylugolɩɛ, le ncɛlɩ 'ka sɛ maa 'lɩ. N solu anyɩ, ɩ ‑glɩ ‑nʋawlɛ: Ma ya mala dluuplʋlɩɛa 'lɩ. 6‑Ma ‑mɔ, gbazɩ ‑n ‑ka ‑wa le ‑n ka bhibhie na, ble ‑naa pʋdaa, kpaslɩlɩ ‑naa gbinea ɩya ‑n bhibhie ‑n Toa ‑ɔ ‑kʋ 'lɛ 'dɛ 'nyɩ ‑ɔ ‑jlɛ 'lɛ ziziekotea nɩkplaan na ɩya ɔ 'ka ‑naa dluuplʋlɩɛa 'nyɩ.
7A ‑ka bhibhieda ‑kʋ na, a 'la zubholia wɔɔnyɩtʋ le ncɛlɩa ‑ɔ 'ta 'lɛ Laagɔ ‑ci na. Ma gugu lebhe wɔɔnyɩtʋa 'la zubholilɩɛa nɩkplaan Laagɔ cɩ 'ka 'lɛ maa ɩmɩa ma 'clalɩ 'lɛ na, 'nyɩ. 8A 'la nʋa maa 'bhisa, sa 'fɩɔn a 'ka 'lɛ a To 'clalɩ na, ɔ ‑ci tooto ɩmɩa a ‑mie 'lɛ na.
‑A Toa ‑ɔ ‑kʋ 'lɛ ‑laagɔɔn na
(Luk 11.2-4)
9Na, anyɩ, a bhibhie ‑sa:
‑A Toa ‑ɔ ‑kʋ 'lɛ ‑laagɔɔn na,
'naa ‑naa 'ŋlɩa ɩ ‑kplɔ,
10'naa ‑naa ‑kwleliea ɩ ci,
'naa ‑naa pɔɔsa ‑nʋɔ
‑dʋdʋa 'kʋ le ‑laagɔɔn.
11'Maa 'nyɩ ‑anyɩ ‑yaka 'la clɩɩa 'la 'flawoa.
12'Maa va ‑anyɩ ‑ala ‑ngasi
le saa ‑anyɩ ‑ma a va 'lɛ maa ‑ɔ tʋ 'lɛ -ala ‑ngasi na.
13Ɩya ‑naa 'talɩa ‑anyɩ 'ciin ‑a 'la bhlilia gbɩɩnclalɩɛɛn,
‑ma 'maa ‑sa ‑anyɩ gbɩɩnclanyɔa wlɩɩn.
[Sa ‑kwlelie, 'tɛtɩ ɩya 'klʋagba ‑glɩ ‑nanɩ 'lʋkʋlʋkʋ ɩya 'lʋkʋlʋkʋ. Ɩ kʋ sɛɛ.]
14‑Masa, ɩ ‑ka ‑kʋ le a ‑ka ncɛlɩ 'la ‑ngasi va na, a Toa ‑ɔ ‑kʋ 'lɛ ‑laagɔɔn na, ɔmɔ ‑ma, ɔ cɩ 'ka anyɩ va. 15'Nyɩ a 'ta ncɛlɩ mala ‑ngasi va na, a Toa ‑ɔ ‑kʋ 'lɛ ‑laagɔɔn na, 'ɔ cɩ 'ta anyɩ ‑ma anɩa va.
‑Zelizlolie 'la cɩa wɔlɩ
16Gbazɩ a ‑ka ‑zelizloda ‑kʋ na, 'klʋ 'la 'kua anyɩ, le yooyo ncɛlɩa 'klʋ ku 'lɛ le ma 'ka sɛ ncɛlɩ pala lebhe ma zlozeli na. N solu anyɩ, ɩ ‑glɩ ‑nʋawlɛ: Ma ya mala dluuplʋlɩɛa 'lɩ. 17‑Ma ‑mɔ, ‑n ‑ka ‑zelizloda ‑kʋ na, wɔlʋ 'klʋ, zʋ ‑asʋnbanyɩ 18ɩya ncɛlɩ 'la ka sɛ cibhlili le ‑n zlo ‑zeli, ‑ma ‑n Toa ‑ɔ ‑kʋ 'lɛ 'dɛ ziziekotea nɩkplaan na ‑tɛɛ. Ɩya ‑n Toa ‑ɔ ‑jlɛ 'lɛ ziziekotea nɩkplaan na, 'kɔɔ ɩla dluuplʋlɩɛa 'nyɩ.
A 'matɩ ‑laagɔɔn 'la 'bhɛlɩa
(Luk 11.33-34)
19A 'la 'wlalɩa 'bhɛlɩ 'wlu ‑wɔlʋ ‑dʋdʋa 'kʋa ŋlɔ ɩya nɔ nyumo 'lɛ lɩa ‑tɛtɛa 'nyɩ 'winya wla 'lɛ gbini 'nyɩ ma ghli 'lɛ na. 20‑Ma a 'wlalɩ 'bhɛlɩ ‑laagɔɔn 'wlu, gbazɩa ŋlɔ ɩya nɔ nyumo 'ta 'lɛ lʋʋ 'nyɩ 'winya wla 'ta 'lɛ gbini ɩya ma 'ka ghli na. 21Sa, daa ‑naa 'bhaklɔa ‑kʋ 'lɛ na, dɩpɩa ‑naa pɔlɛa ‑kʋ 'lɛ.
'Nyɛkɛa 'la ‑kanie
(Luk 11.34-36)
22'Nyɛkɛ 'la ‑kanie ‑glɩ 'lɛ 'ci. Gbazɩ ‑naa 'cia ‑ka ‑ja na, ‑naa 'nyɛkɛa ‑tɛtɛa ‑kʋ zezezeliin. 23‑Ma gbazɩ ‑naa 'cia 'ta ‑ja na, ‑naa 'nyɛkɛa ‑tɛtɛa ‑kʋ 'tutuun. Na, gbazɩ zezezelia ‑ɩ ‑kʋɔ 'lɛ nɩkplaan na, ɩ ‑ka 'tutu ‑glɩ na, 'tutu ‑naa 'ta 'yʋ ‑ka.
Nclɔɔ cɩ 'ta ‑kwletocɩ ‑mɔsɔ lobholɩɛ mino
(Luk 16.13)
24Nclɔɔ cɩ 'ta tocɩ ‑mɔsɔ lobholɩɛ mino: Ɔ cɩ 'ka bhlo zɔbhɛlɩ ɩya ɔ 'ka ‑danaanɔa wabha, ‑aana ɔ cɩ 'ka bhlo cɩ mɛ ɩya ɔ 'la ka ‑danaanɔa bu. 'A cɩ 'ta mino a 'ka Laagɔ ɩya 'dala lobho.
A 'la plea pɔlɛ
(Luk 12.22-32)
25'Lɩka wɔlɩa 'wlukua, n cla 'lɛ anyɩ lebhe: A 'la plea ala jabhʋa 'la pɔlɛ, lʋʋa [a cɩ 'ka 'lɛ li, a cɩ ka 'lɛ 'mla] na 'la gbʋ, ‑aana lʋʋa a cɩ 'ka 'lɛ cɩ zʋ na 'la gbʋ. Jabhʋ 'ta lilinyɩ 'kʋzi bha? 'Nyɩ 'nyɛkɛa 'ta lokwi 'kʋzi bha? 26A kopeka, ‑laagɔɔn 'la libhlia: 'Ɩ golo 'ta naa, 'ɩ 'dɩ 'ta 'nyɩ ɩ 'ta ‑gbogbu ‑ka. ‑Ma a Toa ‑ɔ ‑kʋ 'lɛ ‑laagɔɔn na, ɔ nyɩɩ nyɩ. Na anyɩ, a 'ta gbʋ kalɩ a 'tɩɩ 'kʋzi bha? 27'Nyɩ anyɩ sidiin, ‑anɔsaa, ɔla pɔɔplelɩɛa nɩkplaan, ‑ɔ ‑cɩ ka 'lɛ ɔla clɩɩa 'ŋwacɩwlu 'kʋgbɛlɩɛ mino bha?
28Na, 'lɩsaa 'la gbʋ a plea 'lɛ lokwi 'la pɔlɛ bha? A kopeka saa 'kwlɩa nɩkplaan 'la ‑pitia pʋ 'lɛ na. 'Ɩ nʋ 'ta lobholi 'nyɩ ɩ bhla 'ta loku. 29‑Ma 'bhlɩmɔɔn n cla anyɩ lebhe Salomɔɔn 'titi, ɔla 'klʋagba nɩkplaan, ɔ 'taa 'nanɩ bibie ɩya ɔ 'ka bhlogbɩɩ 'kʋzi. 30'Kwlaan 'la ‑pitia, ‑ɩ ‑kʋ 'lɛ 'dɛ ‑yaka, 'nyɩ -ɩ ‑cɩ ka 'lɛ ‑cɩpa ‑dɩɔ ɩya ‑ɩ 'ka ‑sieo na, Laagɔ ‑kɩɩ ‑sa bibie na, anyɩ 'ɔ cɩ 'ta 'lɛ bhɔsʋalɩɛ mino ɩya ɔ 'kɩɩ 'lɛ 'kʋzi bha? Anyɩ ‑ma sɛɛnɩ, 'nda ala pɔɔtɛtɛa ‑kʋa 'lɛ bha? 31Na, a 'la plea pɔlɛ ɩya a 'la 'claa lebhe: 'Lɩsaa ‑a ‑cɩ kaa 'lɛ li, 'lɩsaa ‑a ‑cɩ kaa 'lɛ 'mla 'nyɩ 'lɩsaa ‑a ‑cɩ kaa 'lɛ bibie bha? 32Maa ‑ɔ 'ta 'lɛ Laagɔ ‑ci na, maa ‑ɔ ple 'lɛ clɩɩa 'fɩan ɩmɩ ‑naa ‑tɛtɛa 'la pɔlɛ. ‑Ma a Toa ‑ɔ ‑kʋ 'lɛ ‑laagɔɔn na, ɔ ‑ci sɛɛ le ɩ ‑fata lebhe a kalɩɩ. 33A 'matɩlɩ Laagɔ 'la Nyɩbhɛlɩdua* ɩya ɔla 'kʋnylugolulɩɛa ‑bɛɛ ɩya Laagɔ 'ka ɩmɩ ‑naa ‑tɛtɛa 'dɛ ‑gbɛ ɩya ɔ 'ka anyɩ 'nyɩ. 34Na, a 'la pleanɩ ‑cɩpa 'la pɔlɛ. ‑Ma, ‑cɩpa cɩ 'ka ɩmɩ 'titi ɩcɩa pɔlɛ ple. Clɩɩ clɩɩ 'la slokplalɩɛ ‑ka ɩla nyɩ.»
Aktuálne označené:
Mat 6: NTLD13
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Dida New Testament © Bible Society of Côte d'Ivoire, 2013.