San Mateo 4
4
Jesuuz guc preb mi
1Gazeꞌ nu Espiriit Yon ni Ñgyoozh gua num Jesuuz tub lugaar ub zi par nu gyicy nuras preb mi.
2Brim cyuu dzi nu cyuu rel nunu rila wangow mi gyit. Orzeꞌ despuees byan mi. 3Orzeꞌ bechaꞌ nuras lom par nu gyicy yu preb mi. Orzeꞌ nay:
―Benu ru rishli gaal nac ru iꞌñ Ñgyoozh, orzeꞌ mnii lo de gyitaꞌ ii nu gyac ñi gyishtily ―nay.
4Orzeꞌ Jesuuz nam rab mi nuras:
―Lat de riidz ni Ñgyoozh rniiñ: “Walab gyishtily ziꞌl gyicy ñi nu cui mbañ mbecy, sinu niꞌ ziꞌl dela riidz nu rnii Ñgyoozh gyicy ñi nu cui mbañ dey”, rniiñ ―nam.
5Gazeꞌ nu za nu nuras mi par Jerusaleeng, gyedz ni Ñgyoozh. Orzeꞌ pshup yu Jesuuz zeꞌ nu gya zir ni yuꞌ nu driib zily de mbecy Israeel Ñgyoozh. 6Orzeꞌ nay rab yum:
―Benu ru rishli gaal nac ru iꞌñ Ñgyoozh, bzut yeñ gashtal lo yu re, gun ryat ru lat de riidz ni Ñgyoozh ornu rniiñ:
Ñgyoozh cuꞌm riiñ yaa de anc nim nu ña dey ru.
Orzeꞌ laagy yaa dey ru
gun orzeꞌ cueꞌ nu gad güii
par ni gyiꞌr lo de gyitaꞌ,
rniiñ ―na nuras.
7Orzeꞌ Jesuuz nam rab mi nuras:
―Niꞌ ziꞌl rniiñ lat de riidz nim: “Cueꞌ gyicy ru preb Ñgyoozh Shuaan ru, biñ nu nac Ñgyoozh nir”, rniiñ ―na Jesuuz.
8Gazeꞌ nu za nu gaꞌ nuras mi gashtal too tub bicy ily. Orzeꞌ blyuuy dela lugaar nu yuꞌ gyishlombecy nu dela gyel lily niñ lom. 9Orzeꞌ nay rab yum:
―Ya̱ rica̱ dela nde nir benu zu tib ru lo̱ par nu riib zily ru ya̱ ―nay.
10Orzeꞌ Jesuuz nam rab mi nuras.
―Bruu chu lo̱ ii nuras, gun lat de riidz ni Ñgyoozh rniiñ: “Briib zily Shuaan ru biñ nu nac Ñgyoozh nir, nunu coz nu rlagy ziꞌl mi gyicy ru”, rnii riidz nim ―na Jesuuz.
11Orzeꞌ nuras bruu chuy lo Jesuuz. Orzeꞌ bruꞌña de anc par nu locyuub dey mi.
Jesuuz brugyiꞌ ricy mi riiñ Galilea
12Ornu Jesuuz güeñ mi nu pshet lag mbecy Waa pres, orzeꞌ zam par Galilea. 13Tees wancyiiñ mi Nazaret sinu guam pcyiiñ mi tub gyedz nu la Capernaum. Capernaum ndeꞌ garee riñ ruꞌ nisyudoo lo yu ni de nez mbecy Zabulón nu ni nez Neftalí. 14Ni mod guc ñi par nu gyuꞌ niñ gal nu pcaa Isaías, yu nu mnii por cuen ni Ñgyoozh:
15De yu ni nez Zabulón nu de yu ni nez Neftalí
nu ri tub la gaꞌ ruꞌ gyoow Jordaang
garee ruꞌ nisyudoo,
gal nu de lo yu ni Galilea,
zeꞌ nu yuꞌ mbecy nu walab mbecy Israeel,
16de mbecy nu yuꞌ lugaar zeꞌ rded dey zeꞌ nu cow.
Gzac dey tub gyi ily nu cuic ñi yaa.
Gyi zeꞌ ndeꞌ cuic ñi yaa lat de mbecy nu yuꞌ zeꞌ nu cow,
zeꞌ nu yuꞌ mbecy nu na gal nu na mbecy gut,
rniiñ.
17Nese tiem zeꞌ brugyiꞌ Jesuuz nu rshaal mi de coz ni Ñgyoozh. Orzeꞌ nam:
―Mneꞌ der dela cyi nu ricy ru gun sñuu ga cyid gyel gubier ni Ñgyoozh ―nam.
Jesuuz bredz mi tap de yu nu rub bel
18Lat nu gusa Jesuuz de ruꞌ nisyudoo ni Galilea, orzeꞌ bzaac mi cyup mbecy nuy bicy yu. Tub yu lay Simo̱o̱, nunu laab yu zeꞌ rnii dey Bed. Zeꞌ tuubaꞌy lay Ndrees. Rup laa dey nac yu mbecy rub bel. Yuꞌ dey nu rneꞌy gyish niy lo nis. 19Orzeꞌ na Jesuuz rab mi dey:
―Da ca der icha̱. Orzeꞌ ya̱ gyicya̱ nu gal nu rub der bel, niꞌ ziꞌl teꞌ der mbecy gun orzeꞌ cyid ca dey icha̱ ―nam.
20Orzeꞌ laab or la zeꞌ bzeeñ dey gyish niy za ca dey ich mi.
21Orzeꞌ bzam sñuu miiñ par lo. Zeꞌ bzaacaꞌm tub cyupaꞌ dey nuy bicy yu: Santiag nuy Waa. De yu zeꞌ nac yu iꞌñ Zebedeo. Yuꞌ dey nañ tub barc nuy uz yu. Laabaꞌ gyish nu rub bel ricy nap dey. Orzeꞌ Jesuuz bredz mi dey. 22Orzeꞌ lueg la bzeeñ ga dey barc niy. Bzeeñ ga la dey uz yu. Orzeꞌ za nu dey mi.
Jesuuz rlyuum ni zigy mbecy
23Jesuuz gusam dutuub la lo yu ni Galilea. Tub ga la lugaar nu rded mi, rlyuum ni de mbecy nañ de yuꞌ nu rsyaꞌ dey riidz ni Ñgyoozh, nunu pshaal mi de riidz nu sac ni gyel gubier nim, nunu bicy yac mi de lo la güii nu rac ni de mbecy. 24Orzeꞌ bzu laa riidz dutuub la lo yu ni Siria de coz nu ricy mi. Orzeꞌ brugyiꞌ rza nu dey dela mbecy nu rat de lo la güii lom, nu dela mbecy nu rzac de lo la coz deet. Rza nu dey de yu nu bicy ni nuras. Rza nu gaꞌ dey de yu nu nash bi. Nunu rza nu gaꞌ dey de yu nu nac mbecy chi̱. Orzeꞌ Jesuuz bicy yac mi dela dey. 25Nunu tonaꞌ la mbecy zigy bruuy lo yu ni Galilea, bruu dey lat de tii gyedz nu rnii dey Decápolis, nunu bruu gaꞌ dey Jerusaleeng, nunu bruu gaꞌ dey de la lo yu ni Judea, nunu bruu gaꞌ dey tub laꞌ gaꞌ lo yu ni ruꞌ gyoow Jordaang. Orzeꞌ dela de yu zeꞌ guay lo Jesuuz.
Aktuálne označené:
San Mateo 4: zpz
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
© 2004, Wycliffe Bible Translators, Inc. All rights reserved.
