Mateus 7
7
Ustsa bo ahaharerewabymybarabyihu.
1Sesus tuk zinymyrykynahatsa bo nipamykysokozo:
— Kyze ustsa kytsa soho ty batu tyso “O atakta batu imysapy” ba zikaha. Iwa batu tyso. Kyze Deus asoho ty batu tyso. “Atakta batu imysapy” my. 2Hawa ustsa kytsa soho ty tsimytsasoko atsawatu Deus asoho motsaso. Hawa ustsa kytsa soho bo mytsaty tsimy iwa Deus asoho bo mytsaty my.
3Ahatukytsa simysapybyitsa tu mykaranaha zeka batu iktsa tsimy. Iktsa tsimy zeka maku wata atahi hwi piak tsibik bo iziky hyrizik eze iktsa my. Hwi puho tahyrizikok eze tuze batu zikozo. 4Tsimytsaso zeka “O byri kaziky, uta ahyrizik oke bo humo hu my” tsimy. Anaharere batu isapy my. Hwi puho ahyrizik eze tuze batu iktsa ziky. Tapara hwi puho ahyrizik eze taty hyrybokty iwaze aziky hyrike bo hu ty. Atsawatuze “O utakta kamysapyrẽta” tsimykara. Ikia batu amysapy tsimy. 5Taparaka ahamysapybyitsa tu tsimykaranahaze pyktahaktsa. Iwaze zuba ustsa kytsa tysitsumuẽhĩnaha — niy.
6— Amy ty tisapyrẽna, anaharere Deus botu ahabo nipamykyso ana kino kytsa Deus humo batu sispirikpo batu tyso tsimy. Asaktsa sispirikpobyitsa tu tsikuparinitsa watsa maha. Mydisahawy tisapyrẽna ty batu tsikuparinitsa bo nyny tsimaha. Atsawatu amy ty tisapyrẽna Deus botu ahabo nipamykysoko kytsa Deus humo batu sispirikpo batu sibo tyso. Kyze amy ty tsipokzitsiarẽna atsawy wata pazaharezatsa bo batu nyny tsimy. Atsawy watsa ty nyny tsimy zeka mysiharatotonaha zuba, amy ty tisapyrẽna humo batu sihyrinymyry. Iwaze amy ty tisapyrẽna Deus ahabo nipamykysoko kytsa simysapybyitsa batu wabytokto zikaha iwatsahi sibo batu tyso. Asaktsa Deus wasania ty yhỹ byri nikaranaha iwaze tsimyserekek ustsa kytsa bo tsimaha — Sesus niy.
Deus humo tsimyspirikpokonahaktsa.
7Sesus tihi:
— Kyze batu ahape tu ahasopyk “Deus mybo piwaby ja, batu kahyrinymyry” Deus bo tsimyzapykynaha zeka Deus ahabo nyny my. Deus bo tsipiberikinaha zeka tsimozikahanaha. Hokbowy humo toto tsimaha zeka hokbowy ty zoksapare my. 8Aty isapyrẽnikia ty myzapyky zeka Deus ibo nyny my. Aty Deus bo piberi zeka ibo natakaha. Aty Deus bo huahua my zeka Deus piwaby hokbowy zoksapare mynakara.
9Aty ahatukze ikiahatsa izo zeka iwaze itse ipe my zeka: “O kazo atsikara ty kabokta!” my zeka ikia atse bo harahare ty ba ibo nyny ziky. 10Itse ipe my zeka:
“Kazo piknu ty kabokta!” my zeka ikia atse bo pyryhyk ty ba nyny ziky. 11Ikiahatsa ahamysapybyitsa tu tsimykaranaha zeka iwatsatu amy ty tisapyrẽna ty ahahyrytsa bo nyny tsimaha. Niwazuba! Azo hi bijoikpe eze tahi imysapyrẽnikita. Ibo hi tsimyzapykynaha zeka isapyrẽnikia ty zuba ahabo nyny mynakara.
12— Kyze amy tisapyrẽna ty ustsa kytsa bo niwatihi tahaktsa! Hawa tisapyrẽnikia ty ahabo tsimyzihikiknaha atsatu sisopyk tsimaha. Tsisapykynahaktsa! Ana soho Moises harere my. Deus sohokotsitsa kino niwatihi atsatu nitsasokonaha. Taharere hi Deus nitsasoko hỹ — Sesus niy.
Ske petokuruk.
13Nisihyrinymyrykyzo:
— Kyze hokbowy jakebyita Deus bo mopupunaha! Aba Deus tuk tsimyzurukunaha zeka ske jakebyita tsibik wata buruk tu tsimykurunaha. Usta ske buruk sinini ykarawy bo, ata ske hi tsiakiarẽta, kytsa sizubarẽtsa ata ske buruk mokurunaha. Ata sketa batu ihokdaha iwatsahi sizubarẽtsa ataske buruk mokurunaha.
14Asaktsa Deus tuk mynapykyryknaha. Mekywatu siske. Ata ske buruk bijoikpe bo tsihokdaharẽna asaktsa ata bo mokurunaha Deus tuk tahawahi mynapykyknaha. Sakurẽtsa. Ata ske buruk kytsa batu sizuba mokurunaha, batu sizuba hokbowy wata paku maha — Sesus niy.
Deus sohokobyitsa soho pinymyryky.
15Sesus nipamykysokozo:
— Pykyhytutaha! Kytsa ikiahatsa kaske buruk pão pão byitaha sisopyk iwaze asa tihi: “Katsaktsa Deus sohokotsa tsimaha” mybarapetu mykaranaha. Deus harere zimyikinaha. Ahabo mozumunahaze ahaharereziuwy watsa, batu ba asaktsa parinitsa watsa batu sisapy maha. Kaske buruk tsimykurunaha zeka batu siakparawy, kaharere bo hỹbyri tsimaha zeka anahi mozihikiknaha, iwatsahi pykyhytutaha! 16Hawa simysapybyitsa tu mykaranaha humo tsipimytsatyhykynaha, “O isapy byizeka sispihikbatakanahatsa” tsimaha. Pisapybyinahaze simyspihikbatarẽtsa tsipinymyrynaha. Wihara batu tsarak taypykykze iktsa tsimaha zeka katsa hi: “Atahwi isapy byizeka” tsimaha. Hwi batu sapy byizeka ihara kino niwatihi batu itsãrãk. Tahwi ty umaha wata “duabohotsa” watsa batu ihara ty zizyzykyryknaha. Maku wasani mytsaty mynakara zeka tsimysapyrẽta mozik. Maku batu wasani mytsaty mynakara zeka imysapybyitatu mynakara. Hawa mytsaty tsimykaranaha ana tihi tsimykaranaha. Maku isapybyikita tu mykara ibo iktsa tsimahaze “O atakta batu wasani mytsaty mykara” myhyrinymyrẽtsa.
17Hwi taypykyk zeka tisapyrẽna ihara kino tisapyrẽna hwi isapybyita tu taypykyk zeka ihara kino batu isapy maha. 18Hwi tisapyrẽna taypykyk zeka ihara kino tisapyrẽna. Hwi isapybyita taypykyk zeka ihara kino batu isapy. 19Kytsa atahwi hi piwekenaha iwaze izo bo pioktsotsoknaha. 20Iwaze kytsa wihara watsa. Hawa mykaranaha humo sisoho ahahyrinymyrẽtsa. Iwatsahi asaktsa tihi: “Katsaktsa Deus sohokotsitsa tsimaha” mybarapetu nikaranaha, anatyhi ahahyrinymyrẽtsa. Hawa mykaranaha humo ahahyrinymyrẽtsa — Sesus niy.
Deus zinymyrykyta.
21Nisihyrinymyrykyzo:
— Kytsa kabo motsasokonaha zeka “O ikia kapehatsa” mytsaty ahabyi mykaranaha. Asahi hawa Deus mozihikik anahumo hi yhỹ hãbyri zeka asahi Deus sapy bo ba ziknapupunaha, Deus tyryktsa ba zikyziknaha. Asazuba Deus harere bo hyỹ mykaranaha, hawa Deus mozihikik anahumo zuba ma mykaranaha asa zuba Deus sapy bo mynapupunaha.
22Hana wa puruze Deus myzubaha pe my “Ikia tsamysapyrẽta” my. Usta pe “Ikia batu amysapy” my. Asaktsa hawa Deus zikzihikik naha humo batu yhỹ ziknakaranaha ipe:
“O mypehatsa mysapyrẽtsa tsiknakaranaha wasania ty tsiktsasokonaha aharere ty kytsa bo tsiksihyrinymyrykynaha, anaro humo hyrikoso sapybara tsiksiksiwyhiknaha. Hawa kytsa zikaha bara ty katsa tsikykaranaha azikwy humo zuba. Iwatsahi atuk tsimynapykyryknaha” maha. 23Iwaze Deus ispe my:
“Ikiahatsaktsa batu kanyhy. Hana iknyktsa skaraba. Ahamysapybyitsa tsikykaranaha iwatsahi kasapy bo paku pakubyitaha! Nabo pãotaha” my — niy. Iwa mymyhyrinymyryky Sesus ziwatawy.
Petok wahoro humo nisispirikpoko.
24Iwaze Sesus tihi:
— Aty skaraba kaharere ziwabytahi kaharere bo hyỹ nikara. Atakta maku wata zinymyrytatu haraharetsa bete tawahoro nizokniki. Tukuke bo iharakorowy sapy tsioke tsihyrizizirẽna bo zitsek. 25Kyze zopoktsa mynabybyknahaze, hyritsik mynawõze. Pihik wytyk ikny mynapokze. Pihik mynapokze wahoro bo mozumuze batu ziknatsehepetok. Iwa maha zeka ba ziknazuru. Atakta kaharere bo hyỹ nikarata myhyrinymyrytsa wata my.
26— Aty skaraba kaharere ziwabytahi kaharere bo batu yhỹ ziky. Atakta maku wata ihyrinymyrybyitatu tawahoro nizukniki nimyra eze tu ziukuru. Jokboha zuba batu ioketsehezeze iwa tawahoro nizokniki. Tukuke bo tsikaeni zuba ziu. Iharakorowy sapy batu ioketsehezeze batu zihi bo tohi ahabyitatu. 27Zopoktsa mynabybyknahaze, hyritsik nawõze. Pihik wytyk ikny inapokze. Pihik mynapokze wahoro bo mozumuze wahoro naktsehepetokyk. Mynakbi — niy.
Kytsa Sesus humo sipybyrẽtsa.
28Sesus nisihyrinymyrybaze myzubaha sipybyrẽtsa. 29Kytsa nisihyrinymyryze Sesus tihi:
— Uta ahape hawa tsimaha — niy. Hawa ha ty Deus mozihikik naha humo tsihyrinymyrẽta. Sudeutsa sihyrinymyrykytsa tihi:
— Amy ty taparaktsa nikaranaha ahape hawa ja mytsaty zuba tsimaha — niaha. Iwaze kytsa Sesus harere humo sipybyrẽtsa — O iharere wasani my — niaha.
Aktuálne označené:
Mateus 7: rkb
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
© 2011, Wycliffe Bible Translators, Inc. All rights reserved.
