CAWA'TA TUNITA 29
29
Yakub co hay ziyna vi Laban
1Yakub tun goy hay hagata, nam kalay hay nagata vi sum sa gal kuɗuwna. 2Nam ɗuw na kayni, iram wi kaata hay fulda, ɗuw na kayni, farana vi fokŋa ɦidi ka molay gaa kela'a, kay farayn ci niy kayn kel kaat na'ta, hiɗiy ma dukum vun kaat na'tana nam nek ŋolo. 3Farayn kaf ci yalam hay liy namu keɗele' tuwa, bugol kayn nisi ligat hiɗiyn goy vun kaata, farayn ci niyna, bugolda lo nisi hot duk hiɗiyn vun kaata may. 4Yakub di tam sum sa del kaata: Ɓosiyonna, nigi si sum sarige? Nisi hot dita: Numa sum sa hay Karan. 5Nam hot disiya: Laban goora vi Nakor nigi wum su? Nisi ala: numa wumu. 6Nam hot disiya: Nam ka ŋaa su? Nisi ala awa nam ka gaŋaya, Rakel goota valam kaw ɗaw tuɗay hiɗi farayn ni. 7Nam disiya: Sargi tige, fatta ka kulo ŋol tuwa, liyn may asay a mol farayn yam tuwam tuwaɗi, nigi vulgi niy mi fok-dimin vul', hotom goy ŋoma. 8Nisi dumu: Numa as a li kaynɗi. Say farayn tok yalam kaf tuwa; nala numa ligat hiɗiyn goy vun kaata, farayn ci niyo may.
9Hay li ma nam ka law hiɗi nisi tuwa zawn kayni, Rakel coyawa hiɗi farayna vi bu'a, kay na'a ti goota ta ŋom farayna. 10Hay li ma Yakub wi Rakel goota vi Laban ma ɓasum sulumna, hiɗi faray gurayna vi Laban kaw, nam ma goboyo, ligat hiɗiyn goy vun kaata, vul niyn mi farayna vi Laban kaw. 11Yakub bow Rakel, nam tiy hiɗi delem kulo ŋolo. 12Yakub di Rakel ala nam mi sugol bu'na, ala nam mi goora vi Rebekka. Na' kalay jaŋi kay vi labar namna mi bu'a. 13Hay li ma Laban hum labara vi Yakub goora vi ɓasulumta na kayni, nam kal kiram jaŋi, nam bowomu, ŋaf vun tuwsiya, nam maram vo hay ziyna valamu. Slen namna cani Yakub vum labaram mi Laban kafe. 14Laban dumu: Naŋ gasi mi sliwan nan lay, mi zokan nan lay. Yakub mus vo hay ziyna vi Laban vi til ɗaw.
Leya hiɗi Rakel
15Bugol kayni Laban di tam Yakub: Wulin kayni naŋ as sunan goy ɦawa'a kuɗ ta' ala naŋ mi sugolonnat su? Danay tige, wurakŋa vaŋ mi mige? 16Laban ka hiɗi guro-boyn ma': Ta ŋolda ya' Leya, ta goota ya' Rakel. 17Leya ira' kulo giɗeŋ huɗus', may Rakel wuli kulo fiyoko, ira' tuni jifiy lay. 18Yakub iram vi Rakel, nala nam di'e: Nan min sunaŋ ir busat siɗiya kay Rakel goota vaŋ ta goota. 19Laban di'e: Vula' maŋ naŋ kayn kiran ŋaa'a suw ma vula' mi sa mara'a. Musaŋ tan tani. 20Ki kayn nala Yakub sun Laban ir busat siɗiya kay Rakel, Busat ta siɗiyata muɗi kir Yakub ki buur neeɗa ɦawa nala, kay nam min Rakel ŋolo.
21Yakub di tam Laban: Vulan cata van yo, kay liyna van asawa, nan min ga' kalaf kuɗanu. 22Laban tok sum sa hay liyn kaf nam li yuldeta. 23Hay vulatita, nam vi Leya, ga' kalaf kuɗ Yakub, nam bur ta'a. 24Laban vul gorvota valam Zilpa mi Leya kay suna'a. 25Liyn fo goy grawt kayni, dolay na' ti Leya. Nala Yakub di tam Laban: Naŋ lum tan nala kayn mi mige? Nan laŋ lop kayn may kay Rakelɗi su? Naŋ ɗutan kayn kay mige? 26Laban di'e: Kay vul ta goota goy jew ta ŋolda kayni, gatta hay liyn tani may di naɗi. 27Laŋ buur hiɗi na' siɗiya, numa min vulaŋ ta heta lo kay lop ma naŋ ma lum hay ziyna vuma ir busat siɗiya lo ɗawni.
28Yakub li ki kayn nala. Nam vat buur ma siɗiyan hiɗi Leya: Bugol kayni Laban vulum goota valam Rakel ca'a. 29Nam vul gorvota valam Bilha mi Rakel kay suna'a. 30Yakub kal bur tam Rakel kaw, na'a nam mina' suw Leya; nala nam sun Laban ir busat siɗiya mara lo.
Gurona vi Yakub
31Hay li ma Ma-Vatɗin wi ala Yakub may min Leyaɗi; nam vula' vuɗna, may Rakel na' gediya. 32Leya sli haya, na' vuɗ goor kepe, goor namna na' tunum selem ala Ruben. Kay na' di'e: Ma-Vatɗina wan sarta vanawa, wulin kayn jufan ma minanu. 33Na' sli hay mara lo, na' vuɗ goor mara'a, na' di'e: Ma-Vatɗin waawa ala nan noyay goyo, kuɗ na'ta nam vulan hen kayni lo. Na' tunum selem ala Simeyon. 34Na' vi hay mara'a lo: na' vuɗ gooro; na' di'e: wulin ɗawni jufan ma minan yo; kay nan vuɗum guronawa ɦidi! Kay na'ta nisi tunum selem ala Levi, 35Na' sli hay lo, vuɗ goor mara'a, nala na' di'e: kuɗ ta wulinta kayni nan min subur sem Ma-Vatɗina. Na' tunum selem ala Yuda. Bugol kayni vuɗa' cola.
Aktuálne označené:
CAWA'TA TUNITA 29: Massana
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
BIBALDA TA PELDETTA © L'Alliance Biblique du Cameroun, 2001